ଆବାସକୁ ଚାହିଁ ଚାହିଁ ଚାଲିଗଲେ ଭୁଜବଳ, ଅସହାୟ ଅବସ୍ଥାରେ ପରିବାର…

ଧର୍ମଗଡ଼, ୨୨/୩ : ଜୁନାଗଡ଼ ବ୍ଲକ ଅନ୍ତର୍ଗତ ଦାସୀ ଗାଁ ଗ୍ରାମ ପଂଚାୟତର ଆଦିବାସୀ ଅଧ୍ୟୁଷିତ ଜଙ୍ଗଲ ପାହାଡ଼ ଘେରା ତାଳପଦର ଗ୍ରାମରେ ବସବାସ କରନ୍ତି ଭୁଜବଳ ସଗଡ଼ିଆ । ବୟସ ମାତ୍ର ୩୩ ବର୍ଷ । ଦୀର୍ଘ ବର୍ଷ ହେଲା ଭଙ୍ଗା ,ଦଦରା ଘରେ ବହୁ କଷ୍ଟରେ ବିଧବା ମାଙ୍କ ସହ ୬ ପ୍ରାଣୀ କୁଟୁମ୍ବ ରହୁଥିଲେ । ଅନେକ ଥର ପ୍ରବଳ ଲଗାଣ ବର୍ଷାରେ ଘର ଭୁଶୁଡ଼ିଛି । ଘର ସଜାଡ଼ିବାକୁ ମଧ୍ୟ ହାତରେ ଅର୍ଥ ନାହିଁ । ଏତେ ବଡ଼ ପରିବାର ମଧ୍ୟରେ ଜଣେ ମାତ୍ର ରୋଜଗାରକ୍ଷମ ହେଉଛନ୍ତି ଭିନ୍ନକ୍ଷମ ଭୁଜବଳ । ଘରେ ଜମି ବାଡ଼ି ବୋଲି କିଛି ନାହିଁ । କୂଲି କଲେ ପରିବାର ଚଳୁ ଥିଲା । ଏଭଳି ସ୍ଥିତିରେ ଭୁଜବଳଙ୍କ ମନରେ କିଛି ବୁଦ୍ଧି ବାଟ ଦିଶୁ ନ ଥିଲା । କାରଣ ଦୀର୍ଘ ବର୍ଷ ହେଲା ଘର ଖଣ୍ଡିଏ ପାଇଁ ଅନେକ ଥର ପଂଚାୟତ କାର୍ଯ୍ୟଳୟଠାରୁ ଆରମ୍ଭ କରି ବ୍ଲକ ପ୍ରଯ୍ୟନ୍ତ ଦୌଡ଼ି ଦୌଡ଼ି ନିରାଶ ହେଲେ । କେବଳ ଉଚ୍ଚ ଅଧିକାରୀଙ୍କ ପ୍ରତିଶୃତି ଛଡା ତାଙ୍କୁ କିଛି ମିଳିଲା ନାହିଁ । ଏପରିକି ବିଧାୟକ ଏବଂ ପ୍ରଶାସନ ଅଧିକାରୀଙ୍କୁ ମଧ୍ୟ ଗୁହାରୀ କଲେ, ମାତ୍ର ତାହା ମଧ୍ୟ କିଛି କାମ ଦେଲା ନାହିଁ । ଆବାସ ଯୋଜନାରେ କିପରି ଘର ଖଣ୍ଡିଏ ମିଳିଲେ ଦୁଃଖ ଦୂର ହେବ ବୋଲି ସଦା ବେଳେ ସେ ଚିନ୍ତାରେ ରହୁଥିଲା । ହେଲେ ବିଧିର ବିଧାନ ଥିଲ ଭିନ୍ନ ପ୍ରକାର ଶେଷରେ ଭିନ୍ନକ୍ଷମ ଭୁଜବଳ ସଗଡ଼ିଆ ଆବାସ ଘର ଖଣ୍ଡିକକୁ ଜଗି ଜଗି ଗତ ୮ ତାରିଖରେ ମୃତ୍ୟୁବରଣ କଲେ । ତାଙ୍କ ମୃତୁ୍ୟ ପରେ ପରିବାର ଏବେ ଅସହାୟ । ଜଣେ ମାତ୍ର ରୋଜଗାରକ୍ଷମ ବ୍ୟକ୍ତି ଏବେ ପରପାରିରେ । ଭୁଜବଳଙ୍କ ମୃତୁ୍ୟ ପରେ ପରିବାରର ବିଧବା ମା, ସ୍ତ୍ରୀ ଏବଂ ଚାରି ଛୁଆ ଅନାଥ ହୋଇଗଲେ । ଏମାନେ କେମିତି ଚଳିବେ, କଣ ଖାଇବେ, କଣ ପଢିବେ ତାକୁ ନେଇ ଚିନ୍ତାରେ ପରିବାର ଲୋକ । ଏଣୁ ଏହି ପରିବାର ପ୍ରତି ସରକାରୀ କିମ୍ବା ବେସରକାରୀ ଅନୁଷ୍ଠାନ ପକ୍ଷରୁ ସମସ୍ତ ଖର୍ଚ୍ଚ ବହନ କରି ତାଙ୍କୁ ଉତମ ଶିକ୍ଷା ପ୍ରଦାନ ଦିଗରେ ସହାୟକ କରିବା ପାଇଁ ଗ୍ରାମବାସୀମାନେ ନିବେଦନ କରିଛନ୍ତି ।