ପୁରୁଣା ପାଣି ଗାଁରେ ଉକ୍ରଟ ରୂପ ଧାରଣ କରିଛି ପାଣି ସମସ୍ୟା…

ଆଠମଲ୍ଲିକ, ୧୯/୩ : ଆଠମଲ୍ଲିକ ବ୍ଲକ ଠାକୁରଗଡ଼ ପୁରୁଣା ପାଣି ସାହିରେ ଉକôଟ ପାନୀୟ ଜଳ ଯୋଗାଣ ସମସ୍ୟାକୁ ନେଇ ତେଜୁଛି ପ୍ରତିବାଦର ସ୍ୱର । ସାହିରେ ୩୫ ଘରର ପ୍ରାୟ ୩୦୦ ଲୋକ ପାଣି ବୁନ୍ଦାଏ ପାଇଁ ଡହଳ ବିକଳ ହେଉଛନ୍ତି । ଓଡ଼ିଶା ସରକାରଙ୍କ ବସୁଧା ଯୋଜନା ମାଧ୍ୟମରେ ପ୍ରତି ଲୋକଙ୍କୁ ପାନୀୟ ଜଳ ଯୋଗାଇ ଦେଉଥିବା ବେଳେ ଏଠାରେ ଦେଖିବାକୁ ମିଳିଛି ବ୍ୟତିକ୍ରମ । ଦୀର୍ଘ ତିନି ବର୍ଷରୁ ଉର୍ଦ୍ଧ୍ୱ ହେବ ଏହି ସାହିକୁ ପାନୀୟ ଜଳ ଯୋଗାଣ ନିମନ୍ତେ ପାଇପ୍ ଲାଇନ୍ ବିଛାଇ ଷ୍ଟାଣ୍ଡ ପୋଷ୍ଟ ଲାଗିଥିଲେ ମଧ୍ୟ ଅଦ୍ୟାବଧି ଜଳ ଯୋଗାଣ ବନ୍ଦ ରହିଛି । ଏ ସମ୍ପର୍କରେ ଆଠମଲ୍ଲିକ ଜଳ ଓ ଜନ ସ୍ୱାସ୍ଥ୍ୟ ଅଧିକାରୀ ଉମାକାନ୍ତ ବେହେରାଙ୍କୁ ଫୋନ୍ ଯୋଗେ ଯୋଗାଯୋଗ କରିବାରୁ ସେ ଏ ବିଷୟରେ କିଛି ଜାଣି ନଥିବା କହିବା ସହ ପ୍ରସଙ୍ଗକୁ ଏଡାଇ ଯାଇଥିଲେ । ସେହିପରି ଠାକୁରଗଡ଼ ଗ୍ରାମର ଷୋଳପଦା ଡ଼ିଗ୍ରୀ କଲେଜ୍ ପାଖରେ ଥିବା ବସୁଧା ଯୋଜନାର ବୋରୱେଲରେ ମଧ୍ୟ ପାଣି ସଙ୍କଟ ଦେଖାଯାଇଛି । ଫଳରେ ପିଇବା ପାଣି ସମସ୍ୟା ଦ୍ୱିଗୁଣିତ ହୋଇ ପଡ଼ିଛି । ଗ୍ରୀଷ୍ମ ଋତୁରେ ଆହୁରି ଜଳ ସଙ୍କଟ ଭୟାନକ ରୂପ ଧାରଣ କରିବ । ତେଣୁ ଯୁଦ୍ଧକାଳୀନ ଭିତିରେ ଜଳ ସମସ୍ୟାର ସମାଧାନ ପାଇଁ ଜିଲ୍ଲା ପ୍ରଶାସନ ପକ୍ଷରୁ ବ୍ୟାପକ ବ୍ୟବସ୍ଥା ଗ୍ରହଣ କରିବାକୁ ଦାବି ଜଣାଇଛନ୍ତି ଗ୍ରାମବାସୀ ।