ଆଇଏମ୍ଆଇର ଏକାଦଶ ଦୀକ୍ଷାନ୍ତ ସମାରୋହ ଅନୁଷ୍ଠିତ…
ଭୁବନେଶ୍ୱର : ଭୁବନେଶ୍ୱରସ୍ଥିତ ଇଣ୍ଟରନ୍ୟାସନାଲ ମ୍ୟାନେଜମେଣ୍ଟ ଇନଷ୍ଟିଚ୍ୟୁଟ (ଆଇଏମ୍ଆଇ)ର ଏକାଦଶ ଦୀକ୍ଷାନ୍ତ ସମାରୋହ ୨୦୨୪ ମହାସମାରୋହରେ ଅନୁଷ୍ଠିତ ହୋଇଯାଇଛି । ଏହି ଅବସରରେ ୨୦୨୧-୨୩ ବ୍ୟାଚର ମୋଟ ୧୦୯ ଜଣ ଛାତ୍ରଛାତ୍ରୀଙ୍କୁ ଗ୍ରାଜୁଏଟ୍ ଡିଗ୍ରୀ ପ୍ରଦାନ କରାଯାଇଛି । ଆୟୋଜିତ ଦୀକ୍ଷାନ୍ତ ସମାରୋହରେ ଶିଳ୍ପ ଜଗତର ପ୍ରତିଷ୍ଠିତ ବ୍ୟକ୍ତିତ୍ୱ ତଥା ଆଦିତ୍ୟ ବିର୍ଲା ଗ୍ରୁପର ପୂର୍ବତନ ମାନବ ସମ୍ବଳ ନିର୍ଦ୍ଦେଶକ ଡକ୍ଟର ସନ୍ତୃପ୍ତ ମିଶ୍ର ଯୋଗ ଦେଇ ଛାତ୍ରଛାତ୍ରୀଙ୍କ ଉଜ୍ୱଳ ଭବିଷ୍ୟତ କାମନା କରିଥିଲେ । ଏହି ଅବସରରେ ଡକ୍ଟର ସନ୍ତୃପ୍ତ ମିଶ୍ର ନିଜର କର୍ପୋରେଟ୍ ଜଗତର ଦୀର୍ଘ ବର୍ଷର ଅଭିଜ୍ଞତା ବିଷୟରେ ଛାତ୍ରଛାତ୍ରୀଙ୍କ ସହିତ ଆଲୋଚନା କରିଥିଲେ । ଦୀର୍ଘ ୨୮ ବର୍ଷ ଧରି ସେ ଆଦିତ୍ୟ ବିର୍ଲା ଗ୍ରୁପରେ କାର୍ଯ୍ୟରତ ଥିଲେ । ଏହାସହ ସେ ବିର୍ଲା କାର୍ବନର ନିର୍ଦ୍ଦେଶକ ଭାବେ ମଧ୍ୟ ନିଜର ଦାୟିତ୍ୱ ସମ୍ଭାଳିଛନ୍ତି । ତେବେ ଓଡିଶାର ଜନସାଧାରଣଙ୍କ ପାଇଁ କାର୍ଯ୍ୟ କରିବାର ଉଦ୍ଦେଶ୍ୟ ନେଇ ଡକ୍ଟର ମିଶ୍ର ବିଜେଡିରେ ଯୋଗ ଦେବା ସହ ବର୍ତ୍ତମାନ ଶାସକ ଦଳର ରାଷ୍ଟ୍ରୀୟ ମୁଖପାତ୍ର ଭାବେ ଦାୟିତ୍ୱ ଗ୍ରହଣ କରିଛନ୍ତି ।
ଆଇଏମ୍ଆଇ ଭୁବନେଶ୍ୱର ରାଜ୍ୟରେ ଏକ ଦୀର୍ଘ ମିଆଦି ଶିକ୍ଷାନୁଷ୍ଠାନ ଭାବେ ନିଜର ପରିଚୟ ହାସଲ କରିବାରେ ସକ୍ଷମ ହୋଇପାରିଛି । ଆଇଏମ୍ଆଇ ସର୍ବଦା ଛାତ୍ରଛାତ୍ରୀଙ୍କ ଗୁଣାତ୍ମକ ବିକାଶ ଉପରେ ଗୁରୁତ୍ୱ ଦେଇଥାଏ । ଛାତ୍ରଛାତ୍ରୀଙ୍କୁ ଉନ୍ନତ ଶିକ୍ଷା ପ୍ରଦାନ କରିବା ସହ ସେମାନଙ୍କ ବାଣିଜ୍ୟ ଭିତିକ ଅନୁଭବ ଏବଂ ଉଦ୍ୟୋଗୀ ମନୋଭାବକୁ ପ୍ରୋତ୍ସାହିତ କରିବା ପାଇଁ ଆଇଏମ୍ଆଇ ସବୁବେଳେ ତତ୍ପର ରହିଥାଏ ।
ଏହି ସମାରୋହରେ ଅନ୍ୟତମ ଅତିଥି ଭାବେ ଭି. ସି. ଅଗ୍ରୱାଲ, ପରାମର୍ଶଦାତା-(ଏଚଆର୍) ଆର୍.ପି. ସଞ୍ଜିବ ଗୋଏଙ୍କା ଗ୍ରୁପ୍, ଡକ୍ଟର ହିମାଦ୍ରୀ ଦାସ, ଡାଇରେକ୍ଟର ଜେନେରାଲ- ଆଇଏମ୍ଆଇ, ଅଜୟ କୁମାର ସାହୁ, ଏକଜ୍ୟୁକେଟିଭ୍ ଡାଇରେକ୍ଟର- ଗ୍ରୁପ୍ କର୍ପୋରେଟ୍ ଏଚଆର, ଡକ୍ଟର ମହୁଆ ବାନାର୍ଜୀ, ଡାଇରେକ୍ଟର- ଆଇଏମ୍ଆଇ, କୋଲକତା, ଶ୍ରୀ ରଘୁନାଥ ପ୍ରତିହାରୀ, ଡାଇରେକ୍ଟର ଏଚଆରଡି- ଓପିଟିସିଏଲ୍ ଏବଂ ଆଇଏମ୍ଆଇ ଭୁବନେଶ୍ୱରର ନିର୍ଦ୍ଦେଶକ ପ୍ରଫେସର ରମେଶ ବେହଲ ଉପସ୍ଥିତ ଥିଲେ ।
କାର୍ଯ୍ୟକ୍ରମରେ ଶ୍ରୀ ବେହଲ ସ୍ୱାଗତ ଅଭିଭାଷଣ ପ୍ରଦାନ କରିବା ସହିତ ଶିକ୍ଷାନୁଷ୍ଠାନର ବାର୍ଷିକ ବିବରଣୀ ଉପସ୍ଥାପନ କରିବା ସହ ଏକାଦଶ ଦୀକ୍ଷାନ୍ତ ବ୍ୟାଚର ଶିକ୍ଷାର୍ଥୀଙ୍କୁ ଦେଖି ବେଶ୍ ଆନନ୍ଦ ଅନୁଭବ କରିଥିବା ପ୍ରକାଶ କରିଥିଲେ । ଏହି ଅବସରରେ ସେ ଗ୍ରାଜୁଏଟିଂ ଶିକ୍ଷାର୍ଥୀଙ୍କୁ ଅଭିନନ୍ଦନ ଜଣାଇଥିଲେ ।
ପିଜିଡିଏମ୍ ୨୦୨୧-୨୩ ବ୍ୟାଚର ମେଡାଲ ବିଜେତାଙ୍କ ମଧ୍ୟରେ ମାସୁମା ସାମିମଙ୍କୁ ସ୍ୱର୍ଣ୍ଣ ପଦକ, ଲକ୍ଷ୍ମୀ ସରାଓଗୀଙ୍କୁ ରୌପ୍ୟ ପଦକ, ଛରିତ୍ରିକା ରାଜପାଲଙ୍କୁ ଡକ୍ଟର ରାମ ପ୍ରସାଦ ଗୋଏଙ୍କା ବେଷ୍ଟ ଷ୍ଟୁଡେଣ୍ଟ ପଦକ ଏବଂ ରୌନକ କରଙ୍କୁ ଡାଇରେକ୍ଟରର୍ସଙ୍କ ପଦକ ସମ୍ମାନ ପ୍ରଦାନ କରାଯାଇଛି ।
ଭୁବନେଶ୍ୱର ଇଣ୍ଟରନ୍ୟାସନାଲ ମ୍ୟାନେଜମେଣ୍ଟ ଇନଷ୍ଟିଚ୍ୟୁଟ (ଆଇଏମ୍ଆଇ) ୨୦୧୧ ରେ ପ୍ରତିଷ୍ଠିତ ହୋଇଥିଲା । ଏହା ଏକ ଯୁବ ଅନୁଷ୍ଠାନ ଯାହାକି ଭାରତ ସରକାରଙ୍କ ଏଚଆରଡି ମନ୍ତ୍ରଣାଳୟ ଦ୍ୱାରା ପରିଚାଳିତ ନ୍ୟାସନାଲ ଇନଷ୍ଟିଚ୍ୟୁସନାଲ ରାଙ୍କିଙ୍ଗ ଫ୍ରେମୱାର୍କ (ଏନଆଇଆରଏଫ୍) ୨୦୨୩ ରେ ୬୭ତମ ସ୍ଥାନ ହାସଲ କରିଛି । ଇଣ୍ଟରନ୍ୟାସନାଲ ମ୍ୟାନେଜମେଣ୍ଟ ଇନଷ୍ଟିଚ୍ୟୁଟ (ଆଇଏମ୍ଆଇ) ସମ୍ପ୍ରତି ପୋଷ୍ଟଗ୍ରାଜୁଏଟ ଡିପ୍ଲୋମା ଇନ ମ୍ୟାନେଜମେଣ୍ଟ (ପିଜିଡିଏମ୍) ଏବଂ ଏଫପିଏମ୍ ପ୍ରୋଗ୍ରାମ ପ୍ରଦାନ କରିଥାଏ, ଯାହାକି ଏଆଇସିଟିଇ ଦ୍ୱାରା ଅନୁମୋଦିତ । ଫ୍ଲାଗସିପ୍ ପିଜିଡିଏମ୍ ପ୍ରୋଗ୍ରାମ ଏଏମବିଏ ଦ୍ୱାରା ସ୍ୱୀକୃତିପ୍ରାପ୍ତ; ଏନବିଏ (ନ୍ୟାସନାଲବୋର୍ଡ ଅଫ୍ ଆକ୍ରିଡେଶନ); ଏନଏଏସି (ନ୍ୟାସନାଲ ଆସେସମେଣ୍ଟ ଆଣ୍ଡ ଆକ୍ରିଡେଶନ କାଉନସିଲ୍) ଏବଂ ଏଆଇୟୁ (ଆସୋସିଏଶନ ଅଫ ଇଣ୍ଡିଆନ ୟୁନିଭରସିଟି)ରୁ ସମାନତା ଗ୍ରହଣ କରିଛି ।
