ସ୍ୱାବଲମ୍ବୀ ହେବାକୁ ଗାଁରେ ପାର୍ଲର ଖୋଲିଲେ ଶିକ୍ଷିତା ମହିଳା…

ସାଲେପୁର, ୯/୧ (ଅଭୟ ଜେନା) : କଟକ ଜିଲ୍ଲା ମାହାଙ୍ଗା ବ୍ଲକର ବିରୂପା ଗେଙ୍ଗୁଟି ଦୀପାଂଚଳ ଅନ୍ତର୍ଗତ କୋଠପଦାଠାରେ ଯୁବତୀ ଓ ମହିଳା ମାନଙ୍କ ରୂପସଜ୍ଜା ଓ କେଶ ବିନ୍ୟାସ ପାଇଁ ଏକ ଆଧୁନିକ ବିୟୁଟି ପାର୍ଲର ଉଦଘାଟିତ ହୋଇଯାଇଛି । ଗ୍ରାମାଂଚଳରେ ମହିଳା ମାନଙ୍କ ରୂପଚର୍ଯ୍ୟା କ୍ଷେତ୍ରରେ ଏହି ନୂଆ ପାର୍ଲରଟି ବେଶ ଉପଯୋଗୀ ହୋଇପାରିବ ବୋଲି ଏହାର ପ୍ରୋପାଇଟର ସସ୍ମିତା ଜେନା ସୂଚନା ଦେଇଛନ୍ତି । ପାଠପଢି ଚାକିରୀ ପଛରେ ନଦୌଡ଼ି ନିଜ ଗୋଡ଼ରେ ଛିଡା ହେବାକୁ ସସ୍ମିତା ସଂକଳ୍ପ ନେଇଥିଲେ । ସ୍ୱଳ୍ପ ଖର୍ଚ୍ଚରେ ଯେ କୌଣସି ମହିଳା ଓ ଝିଅ ମାନେ ଏଠାରୁ ନିଜ ନିଜର ରୂପଚର୍ଯ୍ୟା କରିବା କ୍ଷେତ୍ରରେ ଅନେକ ସୁବିଧା ପାଇ ପାରିବେ ବୋଲି ସସ୍ମିତା କହିଛନ୍ତି । ଅଭିଜ୍ଞ ବିୟୁଟିସିଆନଙ୍କ ଦ୍ୱାରା ଶ୍ରୀ ଲେଡ଼ିଜ ବିୟୁଟି ପାର୍ଲରରେ ମହିଳା ମାନଙ୍କୁ ସେମାନଙ୍କ ମନ ପସନ୍ଦର ରୂପଚର୍ଯ୍ୟାର ସୁବିଧା ମିଳିପାରିବ । ସ୍ଥାନୀୟ ବନଗୁରିଆ ଅଂଚଳର ଜଣେ ଶିକ୍ଷିତା ମହିଳା ସସ୍ମିତା ଜେନା ନିଜେ ଆତ୍ମନିର୍ଭରଶୀଳ ହେବାକୁ ଏହି ପ୍ରତିଷ୍ଠାନ ଖୋଲିବା ଜଣା ପଡିଛି । ସସ୍ମିତାଙ୍କ ସ୍ୱାମୀ ମନୋଜ ଜେନା ନିଜେ ଜଣେ ଯୁବ ଉଦ୍ୟୋଗୀ । ସେ ବ୍ୟାଙ୍କରୁ ସହାୟତା ନେଇ, ପନôୀ ସସ୍ମିତାଙ୍କ ପାଇଁ ପାର୍ଲର ଖୋଲି ତାଙ୍କୁ ଆତ୍ମନିର୍ଭରଶୀଳ ହେବାକୁ ପ୍ରୋତ୍ସାହନ ଦେଇଛନ୍ତି । ଏହାସହ ଆଗାମୀ ଦିନରେ ଅନ୍ୟ ମହିଳାମାନଙ୍କୁ ରୋଜଗାରକ୍ଷମ ହେବାକୁ ଉତ୍ସାହିତ କରିବା ପାଇଁ ମଧ୍ୟ ସେ ମତ ପୋଷଣ କରିଛନ୍ତି ।