ଡିଲରଙ୍କ ରାସନ ଦୁର୍ନୀତି ସାଙ୍ଗକୁ ଜାତିଆଣ ଆକ୍ଷେପରେ ଅତିଷ୍ଠ ଗ୍ରାମବାସୀ…

ଢେଙ୍କାନାଳ, ୯/୧ (ସୁଜିତ୍ କୁମାର ବେହେରା) : ପୁଣି ସାମ୍ନାକୁ ଆସିଲା ଯୋଗାଣ ବିଭାଗରେ ଡିଲରଙ୍କ ରାସନ୍ ଦୁର୍ନୀତି ଏବଂ ଖାଉଟିଙ୍କୁ ଦୁର୍ବ୍ୟବହାର ଅଭିଯୋଗ ଘଟଣା । ରାସନ୍ ସାମଗ୍ରୀ ଚାଉଳ ପାଇବାରୁ ବଂଚିତ ହେଉଛନ୍ତି ଗରିବ ହିତାଧିକାରୀ । ଆଉ ଅଭିଯୋଗ କଲେ ହିତାଧିକାରୀ ଡିଲର ଦେଖାଉଛି ନାଲି ଆଖି । ହିତାଧିକାରୀ ପାଟି ଖୋଲିଲେ ରାସନ୍ କାଟିଦେବାର ଧମକ ସହ ଥାନାରେ କେସ କରି ଦେବାର ଭୟ ଦେଖାଉଛି ଡିଲର । ଏପଟେ ଡିଲରଙ୍କ ବ୍ୟବହାରରେ ଅତିଷ୍ଠ ହେଲେଣି ଅଂଚଳର ସାଧାରଣ ଖାଉଟି ।
ପ୍ରତ୍ୟେକ ଗରିବ ଖଟିଖିଆ ପରିବାରର କ୍ଷୁଧା ନିବାରଣ ନିମନ୍ତେ ସରକାର ଖାଦ୍ୟ ସୁରକ୍ଷା ଯୋଜନାରେ ମାଗଣାରେ ୫କେଜି ଚାଉଳ ଯୋଗାଇ ଦେଉଛନ୍ତି । କିନ୍ତୁ କିଛି ଅସାଧୁ ଖାଉଟି ଡିଲାର ତଥା ଅଧିକାରୀଙ୍କ ଅର୍ଥ ମନୋବୃତି ପାଇଁ ସଠିକ ରୂପେ ଖାଦ୍ୟ ସୁରକ୍ଷା ଯୋଜନାରେ ପାଉଥିବା ଚାଉଳରୁ ବଂଚିତ ହେଉଛନ୍ତି ଗରିବ ଜନସାଧାରଣ । କେତେବେଳେ କଟନି ଛଟନି ତ ଆଉ କେତେବେଳେ ଡିଲରଙ୍କ ଦୁର୍ବ୍ୟବହାର । ଏଭଳି କିଛି ସାଙ୍ଘାତିକ ଅଭିଯୋଗ ନେଇ ଆସିଛନ୍ତି ଢେଙ୍କାନାଳ ଜିଲ୍ଲା ହିନ୍ଦୋଳ ବ୍ଲକ୍ ସଞ୍ଜପଡା ପଂଚାୟତ ବାସୁବହାଳ ଗ୍ରାମର ହରିଜନ ସମ୍ପ୍ରଦାୟର ଲୋକ । ଦୀର୍ଘଦିନ ହେବ ଗ୍ରାମର ରାସନ୍ କାର୍ଡ ଉପଭୋକ୍ତାମାନଙ୍କୁ ରାସନ୍ ସାମଗ୍ରୀ ବଂଟନରେ ବ୍ୟାପକ ଅନିୟମିତତା କରାଯାଉଥିବା ବେଳେ ରାସନ ଚାଉଳ ଆଣିବାକୁ ଯାଇ ଡିଲର ବିଜନ ଭୋକ୍ତାଙ୍କ ଅଶାଳୀନ ଏବଂ ଧମକପୂର୍ଣ୍ଣ ବ୍ୟବହାର ସହିତ ଜାତିଆଣ ଆପେକ୍ଷକୁ ସହ୍ୟ କରୁଛନ୍ତି ଗ୍ରାମବାସୀ ।
ଗ୍ରାମର ଲୋକମାନେ ଗରିବ ଏବଂ ଦିନମଜୁରିଆ ଶ୍ରେଣୀର ହୋଇଥିବା ବେଳେ ସରକାରଙ୍କ ଖାଦ୍ୟ ସୁରକ୍ଷା ଆଇନରୁ ମିଳୁଥିବା ଚାଉଳ ସେମାନଙ୍କ ପେଟକୁ ଦାନା ଯୋଗାଏ । କିନ୍ତୁ ଦୀର୍ଘଦିନ ହେଲା ଏହି ସୁବିଧାରୁ ବଂଚିତ ହେଉଛନ୍ତି ଗ୍ରାମବାସୀ । ତେବେ ଏ ବାବଦରେ ଆମ ପ୍ରତିନିଧି ଖାଦ୍ୟ ଯୋଗାଣ ଅଧିକାରୀ (Acso) ଆଶିଷ ରଞ୍ଜନ ରାଉତଙ୍କୁ ପଚାରିବାରୁ ଖୁବ୍ ଶୀଘ୍ର ଏହାର ତଦନ୍ତ କରାଯିବା ସହ ଡିଲର ଉପରେ କାର୍ଯ୍ୟାନୁଷ୍ଠାନ ଗ୍ରହଣ କରିବେ ବୋଲି ସେ ପ୍ରତିକ୍ରିୟା ଦେଇଛନ୍ତି ।
ତେବେ ଖବର ପ୍ରସାରଣ ହେବା ପରେ ବିଭାଗୀୟ ଅଧିକାରୀ ଏହା ଉପରେ କାର୍ଯ୍ୟାନୁଷ୍ଠାନ ଗ୍ରହଣ କରୁଛନ୍ତି କି ତଦନ୍ତ କରି ଚୁପ୍ ବସି ରହୁଛନ୍ତି ତାହା ଦେଖିବାକୁ ବାକି ରହିଲା ।