ବିଜେଡି ବିଧାୟିକାଙ୍କୁ ଗାଦିଚ୍ୟୁତ କରିବାକୁ ବିଜେଡି କର୍ମୀଙ୍କ ସମରଶଯ୍ୟା,
ପୁଣି ବିଧାୟିକାଙ୍କୁ ଖୋଲାଖୋଲି ଚ୍ୟାଲେଞ୍ଜ ଦେଲେ ପୁରୁଣା କର୍ମୀ
ଢେଙ୍କନାଳ, ୧୬/୧ (ସୁଜିତ୍ କୁମାର ବେହେରା) : ବଢୁଛି ହିନ୍ଦୋଳ ବିଧାୟିକାଙ୍କ ଅଡୁଆ । ତେଜୁଛି ଜନ ଆନ୍ଦୋଳନ । ଏଥର ନେତୃତ୍ୱରେ ହେବ ପରିବର୍ତନ । ନଚେତ୍ ଦଳକୁ ଭୋଗୁବାକୁ ପଡିବ ଅନେକ ପ୍ରତିଘାତ । ଏଭଳି କିଛି ଭାବନା ନେଇ ହିନ୍ଦୋଳ ବିଧାୟିକାଙ୍କୁ ଖୋଲା ଚ୍ୟାଲେଞ୍ଜ ଦେଉଛନ୍ତି ପୁରୁଣା କର୍ମୀ । ଦଳ ବନାମ ଦଳ ଭିତରେ ଲାଗିଛି ଦ୍ୱନ୍ଦ । ଢେଙ୍କାନାଳ ଜିଲ୍ଲା ହିନ୍ଦୋଳରେ ଏକ ବଡ ଧରଣର କମ୍ପନ ଦେଖିବାକୁ ମିଳୁଛି । ଦ୍ୱିତୀୟ ଥର ପାଇଁ ଅସନ୍ତୁଷ୍ଟ ବିଜେଡ଼ି କର୍ମୀମାନେ ଖୋଲା ଖୋଲି ଭାବେ ବିଧାୟିକା ସୀମାରାଣୀ ନାଏକଙ୍କ ଏକଛତ୍ରବାଦ ଶାସନ ଓ ମନମୁଖୀ ଆଚରଣ ବିରୁଦ୍ଧରେ ବିଷ ଓଗାଳି ଥିବା ଦେଖିବାକୁ ମିଳୁଛି । କର୍ମୀ ନବୀନ, ପାଣ୍ଡିଆନ୍, ବବି ଜିନ୍ଦାବାଦ କରୁଥିବାବେଳେ ସେହି ଦଳର ବିଧାୟିକା ସୀମାରାଣୀ ମୁର୍ଦାବାଦ ନାରା ଏବେ ହିନ୍ଦୋଳରେ ଏକ କମ୍ପନ ସୃଷ୍ଟି କରିଛି ।
ସୂଚନା ଅନୁସାରେ ହିନ୍ଦୋଳ ବ୍ଲକର ପୂର୍ବତନ ଯୁବ ବିଜେଡ଼ି ସଭାପତି ତଥା ବରିଷ୍ଠ କର୍ମୀ ପ୍ରଦୀପ ସାମନ୍ତଙ୍କ ଆବାହନରେ ବିଜେଡିର ଶତାଧିକ ପୁରୁଣା କର୍ମୀମାନଙ୍କୁ ନେଇ ହିନ୍ଦୋଳ ବ୍ଲକ ରାସୋଳ ପଂଚାୟତ ଦାମାନି ପ୍ଲାଜାରେ ଏକ ବୈଠକ ଅନୁଷ୍ଠିତ ହୋଇଥିଲା । କଂଗ୍ରେସ ଦଳରୁ ଆସି ୨୦୧୪ ମସିହାରେ ବିଜେଡ଼ି ଟିକେଟରୁ ଲଢ଼ି ବିଧାୟିକା ହୋଇଥିବା ସୀମାରାଣୀ ନାଏକ କିଛି ଆମଦାନୀ ନେତାଙ୍କ କୋଠେରୀ ମଧ୍ୟରେ ରହି ଦଳର ପ୍ରତିଷ୍ଠାତା ଓ ପୁରୁଣା କର୍ମୀଙ୍କୁ ଅଣଦେଖା କରୁଛନ୍ତି ବୋଲି ଅସନ୍ତୋଷ କର୍ମୀ ମାନେ ଖୋଲା ଖୋଲି ପ୍ରତିକ୍ରିୟା ଦେଇଥିଲେ । ଆଗାମୀ ନିର୍ବାଚନରେ ସୀମାଙ୍କୁ ପ୍ରାର୍ଥୀ କଲେ ହଜାର ହଜାର କର୍ମୀ ଏହାର ପ୍ରତିବାଦ କରିବେ ବୋଲି ସେ କହିଥିଲେ ।
ଏହି ପ୍ରତିବାଦ ସଭାରେ ବିଭିନ୍ନ ପଂଚାୟତର ବରିଷ୍ଠ କର୍ମୀ ମାନେ ଯୋଗ ଦେଇଥିବାର ଦେଖିବାକୁ ମିଳିଥିଲା । ତେବେ ଆଗାମୀ ଦିନରେ ଏହି ଆକ୍ରୋଶ କେଉଁ ମୋଡ ନେଉଛି ତାହା ଦେଖିବାକୁ ବାକି ରହିଲା ।
