ନିଜ କିଡନୀ ବିକି ଲୋକଙ୍କ ସେବା କରିବେ ସରପଞ୍ଚ ରଣଜିତ୍…

ଜନତାଙ୍କ ସେବା ପାଇଁ ସରପଞ୍ଚ ଆଗଭର, ମାତ୍ର ପ୍ରଶାସନର କାର୍ଯ୍ୟକୁ ନେଇ ପ୍ରଶ୍ନ ?

ଢେଙ୍କାନାଳ, ୨୬/୧୨ (ସୁଜିତ୍ କୁମାର ବେହେରା) : ଜନତାଙ୍କ ସମର୍ଥନରେ ସରପଞ୍ଚ ଗାଦିରେ ବସିଥିଲେ ରଣଜିତ୍ ପ୍ରଧାନ । ଜନତାଙ୍କୁ ଦେଇଥିବା ପ୍ରତିଶ୍ରୁତିକୁ ମଧ୍ୟ ପୂରଣ କରିବାକୁ ସମସ୍ତ ଚେଷ୍ଟା କରିଛନ୍ତି ସେ । ହେଲେ ପଞ୍ଚାୟତର ଉନ୍ନୟନ କାର୍ଯ୍ୟରେ ବାଧକ ସାଜୁଛନ୍ତି କନିଷ୍ଠଯନ୍ତ୍ରୀ ସିଲା ସାହୁ । ଦୀର୍ଘ ଏକ ବର୍ଷ ଧରି ପଡ଼ି ରହିଛି ବାଉଁଶ ପୋଖରୀ ପଞ୍ଚାୟତରେ ସରକାରଙ୍କ ଉନ୍ନୟନ କାର୍ଯ୍ୟ । କନିଷ୍ଠ ଯନ୍ତ୍ରୀ ସିଲା ସାହୁଙ୍କ ମନମୁଖି କାର୍ଯ୍ୟ ଓ ପଞ୍ଚାୟତ ଉନ୍ନୟନରେ ବ୍ରେକ ଦେବା ନେଇ ସରପଞ୍ଚ ସମେତ ସାଧାରଣ ଲୋକଙ୍କ ମଧ୍ୟରେ ଅସନ୍ତୋଷ ପ୍ରକାଶ ପାଉଛି । ଶେଷରେ ବହୁ ବାଦ ବିବାଦ ପରେ ନିଜର ପ୍ରତିଶ୍ରୁତିକୁ ପୂରଣ କରିବା ପାଇଁ ଦୃଢ ନିଷ୍ପତ୍ତି ନେଇଛନ୍ତି ରଣଜିତ୍ । ଜନତାଙ୍କ ସୁବିଧା ପାଇଁ ସମସ୍ତ ଉନ୍ନୟନମୂଳକ କାର୍ଯ୍ୟକୁ ପୂରଣ କରିବ ପାଇଁ ସେ ନିଜର କିଡନୀ ବିକ୍ରି କରିବେ ବୋଲି କହିଛନ୍ତି ।

ଢେଙ୍କାନାଳ ଜିଲ୍ଲା ହିନ୍ଦୋଳ ବ୍ଲକ୍ ଅନ୍ତର୍ଗତ ବାଉଁଶ ପୋଖରୀ ପଞ୍ଚାୟତର ସରପଞ୍ଚ ରଣଜିତ୍ ପ୍ରଧାନ ସାମ୍ବାଦିକ ସମ୍ମିଳନୀ ଜରିଆରେ ଏକଛତ୍ରବାଦ ଶାସନ ତଥା ପ୍ରଶାସନିକ ବ୍ୟବସ୍ଥା ଉପରେ କ୍ଷୋଭ ପ୍ରକାଶ କରିବା ସହିତ ଏଭଳି ଚାଞ୍ଚଲ୍ୟକର ବୟାନ ଦେଇଛନ୍ତି । ପ୍ରାଶାସନିକ ଅଧିକାରୀ ଏବଂ କନିଷ୍ଠ ଯନ୍ତ୍ରୀଙ୍କ ଅସହଯୋଗ କାରଣରୁ ନିଜକୁ ସମ୍ପୂର୍ଣ୍ଣ ଅସହାୟ ଦର୍ଶାଇ ନିଜର କିଡ଼ନୀ ବିକ୍ରି କରି ଲୋକଙ୍କ ସେବା କରିବେ ବୋଲି କହିଛନ୍ତି ରଣଜିତ୍ ।

ଏଠାରେ ଉଲ୍ଲେଖଯୋଗ୍ୟ ଯେ ରଣଜିତ୍ ପଞ୍ଚାୟତ ନିର୍ବାଚନ ବେଳେ ଲୋକଙ୍କ ପାଇଁ କେଉଁ ଗ୍ରାମରେ କଣ ଉନ୍ନୟନ କାର୍ଯ୍ୟ କରିବେ ସେ ନେଇ ପ୍ରତିଶ୍ରୁତି ଦେଇଥିଲେ । ଆଉ ନିର୍ବାଚନ ଜିତିବା ପରେ ସେ ସେହି ଅନୁସାରେ କାର୍ଯ୍ୟ କରାଇପାରୁ ନାହାନ୍ତି । କାରଣ ପଞ୍ଚାୟତରେ ସରକାରଙ୍କ ଉନ୍ନୟନମୂଳକ କାର୍ଯ୍ୟର ଲେବର ଡିମାଣ୍ଡ ଉଦେ୍ଦଶ୍ୟମୂଳକ ଭାବେ କରାଇ ଦିଆଯାଉନାହିଁ । ଏପରିକି ପ୍ରତ୍ୟେକ କାମରେ ପଞ୍ଚାୟତର କିଛି କୁଜି ନେତା ତଥା ଚେୟାରମ୍ୟାନଙ୍କ ଲୋକ ବିଧାୟିକାଙ୍କ ଲୋକର ପରିଚୟ ଦେଇ କିଛି ୱାର୍ଡ ମେମ୍ବରଙ୍କୁ ହାତବାରିଷ କରି ଉପଖଣ୍ଡ ପ୍ରଶାସନ ଓ ଜିଲ୍ଲା ପ୍ରଶାସନ ନିକଟରେ ମିଥ୍ୟା ଅଭିଯୋଗ ଆଣି କାମ ହେଇଥିଲେ ମଧ୍ୟ ସମସ୍ତ କାମକୁ ବ୍ରେକ ଦେଉଥିବା ଅଭିଯୋଗ ହୋଇଛି । ଏହାସହ ଉନ୍ନୟନ କାର୍ଯ୍ୟକୁ ଏକ ବର୍ଷ ଧରି ବନ୍ଦ କରି ରଖିଛନ୍ତି କନିଷ୍ଠ ଯନ୍ତ୍ରୀ ଯାହା ଏହା ଏକ ଆକ୍ରୋଶ ମୂଳକ ଭାବେ ହେଉଛି ବୋଲି ସରପଞ୍ଚଙ୍କ ସମେତ ସ୍ଥାନୀୟ ବୁଦ୍ଧିଜିବୀମାନେ ମଧ୍ୟ ମତ ଦେଇଛନ୍ତି ।

ଜନପ୍ରତିନିଧି ହେବା ସହିତ ପଞ୍ଚାୟତର ଶାସନ ଗାଦିରେ ବସି ଯଦି ସେ ଲୋକଙ୍କ ସେବା ନ କରିପାରିବେ ତେବେ ଗାଦିରେ ବସିବାର କି ଲାଭ ବୋଲି କହିଛନ୍ତି ସରପଞ୍ଚ ମହୋଦୟ । ଏଣୁ ନିଜର ଗୋଟିଏ କିଡନୀ ବିକି୍ର କରି ଯେତିକି ସମ୍ଭବ କାର୍ଯ୍ୟ କରିବେ ବୋଲି ଗଣମାଧ୍ୟମ ସାମ୍ନାରେ ପ୍ରକାଶ କରିଛନ୍ତି ସରପଞ୍ଚ ରଣଜିତ୍ ପ୍ରଧାନ । ଆଉ ଯଦି କିଡନୀ ବିକ୍ରି କ୍ଷେତ୍ରରେ ପ୍ରଶାସନ ସହଯୋଗ ନ କରେ ତେବେ ଅନିର୍ଦ୍ଦିଷ୍ଟ କାଳ ପର୍ଯ୍ୟନ୍ତ ଆମରଣ ଅନଶନରେ ବସିବା ସହ ଲିଖିତ ଭାବେ ସମସ୍ତ ଉପରିସ୍ଥ ଅଧିକାରୀ ଏପରିକି ମୁଖ୍ୟମନ୍ତ୍ରୀଙ୍କ ଦୃଷ୍ଟି ଆକର୍ଷଣ କରିବେ ବୋଲି ଚେତାବନୀ ଦେଇଛନ୍ତି ରଣଜିତ୍ ।

ଜଣେ ସୁଶାସକ ହେବା ଲକ୍ଷ୍ୟରେ ରଣଜିତ୍ ଆଗେଇ ଚାଲିଥିବାବେଳେ ପ୍ରଶାସନର ମନମୁଖୀ ଶାସନକୁ ନେଇ ପ୍ରଶ୍ନ କରିଛନ୍ତି ସାଧାରଣ ଜନତା । ଅପରପକ୍ଷେ ସାଧାରଣ ଜନତା ଏଭଳି ଜଣେ ଜନପ୍ରତିନିଧିଙ୍କୁ ପାଇ ବେଶ୍ ଗର୍ବିତ ବୋଲି ପ୍ରକାଶ କରିଛନ୍ତି । ରାଜ୍ୟ ସରକାରଙ୍କ ନିକଟରେ ଏହି ଖବର ପହଁଞ୍ଚିବା ପରେ ମାନ୍ୟବର ମୁଖ୍ୟମନ୍ତ୍ରୀ ଏବଂ ୫ଟି ଅଧ୍ୟକ୍ଷ ଏ ଦିଗରେ କିଭଳି କାର୍ଯ୍ୟାନୁଷ୍ଠାନ ନେଉଛନ୍ତି ତାହା ଦେଖିବାକୁ ବାକି ରହିଲା ।