ବାଇକ ଦୁର୍ଘଟଣାରେ ଦୁଇ ଗୁରୁତର ଆହତ…

ହିନ୍ଦୋଳ, ୨/୧୨ (ସୁଜିତ୍ କୁମାର ବେହେରା) : ଢେଙ୍କାନାଳ ଜିଲ୍ଲା ହିନ୍ଦୋଳ ଉପଖଣ୍ଡରେ ଦୁଇ ବାଇକ ମୁହାଁମୁହିଁ । ଦୁର୍ଘଟଣାରେ ଦୁଇ ବାଇକ ଆରୋହୀ ଗୁରୁତର ଆହତ । ଖବରରୁ ପ୍ରକାଶ ଯେ, ଶୁକ୍ରବାର ସନ୍ଧ୍ୟା ସମୟରେ ହିନ୍ଦୋଳ ଥାନା ଅନ୍ତର୍ଗତ ଆଲୁସିଂ ଗ୍ରାମର ଏନ୍ଏସି ସଫେଇ କର୍ମଚାରୀ ନରେଶ ନାଏକ (୪୮) ଝିଅଘରକୁ ଯାଇ ମହୀଧରପୁର ଆଡୁ ଏକ ଗ୍ଲାମର ବାଇକ ଯୋଗେ ଫେରୁଥିଲେ । ଏହି ସମୟରେ ହିନ୍ଦୋଳ ଥାନା ହିନ୍ଦୋଳ ବ୍ଲକ ବାଉଁଶପୋଖରୀ ପଂଚାୟତ ନୂଆକୂଟ ଗ୍ରାମର ଅକ୍ଷୟ ନାଏକଙ୍କ ପୁଅ ଅନନ୍ତ ନାଏକ (୨୫) ଏକ ସିଡ଼ି ଡୀଲକ୍ସ ବାଇକ ଯୋଗେ ନୂଆକୂଟ ପଟୁ ଆସୁଥିବାବେଳେ ନରେଶଙ୍କ ବାଇକ ସହ ମୁହାଁମୁହିଁ ଧକ୍କା ହୋଇଥିଲା । ଫଳରେ ଉଭୟେ ଛିଟିକି ପଡ଼ି ଗୁରୁତର ଆହତ ହୋଇଥିଲେ । ଦୁର୍ଘଟଣା ଦେଖି ସ୍ଥାନୀୟବାସୀ ଅଗ୍ନିଶମ ବିଭାଗକୁ ଖବର ଦେବାରୁ ଅଗ୍ନିଶମବାହିନୀ ତୁରନ୍ତ ଘଟଣା ସ୍ଥଳରେ ପହଂଚି ଉଭୟଙ୍କୁ ଉଦ୍ଧାର କରି ହିନ୍ଦୋଳ ଡାକ୍ତରଖାନା ଆଣିଥିଲେ । ଉଭୟ ଗୁରୁତରଙ୍କୁ ଚିକିତ୍ସା ଜାରି ରହିଥିବାବେଳେ ଅନନ୍ତ ନାଏକଙ୍କ ଗୋଡ଼, ପାଦରେ ଗଭୀର ଆଘାତ ଲାଗିଛି ଏବଂ ନରେଶଙ୍କ ସମଗ୍ର ଶରୀର ଖଣ୍ଡିଆ ଖାବରା ହୋଇଯାଇଛି । ଖବର ଲେଖା ହେବା ପର୍ଯ୍ୟନ୍ତ ହିନ୍ଦୋଳ ଥାନାରେ କୌଣସି ଅଭିଯୋଗ ହୋଇନଥିବା ଜଣାପଡିଛି ।