ଦୁର୍ନୀତିକୁ ମୁଦ୍ଦା କରି ବେଗୁନିଆପଡା ବ୍ଲକ ଘେରାଉ କଲା ବିଜେପି
ବେଗୁନିଆପଡା, ୨୨/୧୧ (ବାପୁନି କୁମାର ମାଲୁ) : ରାଜ୍ୟରେ ଦୁର୍ନୀତିକୁ ମୁଦ୍ଦା କରି ରାଜରାସ୍ତାକୁ ଓହ୍ଲାଇଛି ବିଜେପି । ଦୁର୍ନୀତି, ଭ୍ରଷ୍ଟାଚାର ଓ ବ୍ୟଭିଚାର ବିରୁଦ୍ଧରେ ରାଜ୍ୟର ସମସ୍ତ ବ୍ଲକରେ ବିଜେପି ପକ୍ଷରୁ ଘେରାଉ କରାଯାଉଛି । ଏହି ପରିପ୍ରେକ୍ଷୀରେ ଗଞ୍ଜାମ ଜିଲ୍ଲା ବେଗୁନିଆପଡା ବ୍ଲକରେ ମଧ୍ୟ ବିଜେପି ପକ୍ଷରୁ ଘେରାଉ କରାଯିବା ସହ ଦାବିପତ୍ର ପ୍ରଦାନ କରାଯାଇଛି ।
ଓଡ଼ିଶାରେ ପିସି କାରବାର, ବର୍ଷକୁ ୧ ଲକ୍ଷ କୋଟି ଟଙ୍କାର ଦୁର୍ନୀତି ଭଳି ସଙ୍ଗୀନ ଅଭିଯୋଗ ଉଠାଇଛି ବିଜେପି । ଗତ ୯ ବର୍ଷରେ ମୋଦି ସରକାର ଓଡ଼ିଶାକୁ ୧୮ ଲକ୍ଷ କୋଟିରୁ ଅଧିକ ଟଙ୍କା ଦେଇଛନ୍ତି । ତେବେ ଗ୍ରାମାଂଚଳର ବିକାଶ ପାଇଁ ଯାଇଥିବା ଅର୍ଥ ହରିଲୁଟ କରାଯାଉଛି ଓ ଏ ଅର୍ଥରେ ବିଜେଡି ନିର୍ବାଚନ ବୈତରଣୀ ପାର ହେବାକୁ ଚାହୁଁଥିବା ଦଳ ଅଭିଯୋଗ କରିଛି । ରାଜ୍ୟ ମହିଳା ଉପସଭାପତି ତଥା ମୁଖପାତ୍ର ଲେଖାଶ୍ରୀ ସାମନ୍ତ ନିଜ ବକ୍ତବ୍ୟରେ କହିଲେ ଯେ, ଆବାସ ଯୋଜନା, ଟଙ୍କିକିଆ ଚାଉଳ, ପାଇଖାନା, ଚାଷୀଙ୍କୁ ସହାୟତା ରାଶି ଏ ସମସ୍ତ କେନ୍ଦ୍ର ସରକାର ଦେଉଥିବା ବେଳେ ନବୀନ ବାବୁ ଏହାକୁ ହାଇଜାକ କରି ନିଜେ ଦେଉଛନ୍ତି ବୋଲି ଡିଣ୍ଡିମ ପିଟୁଛନ୍ତି । ଏପରିକି ଆବାସ ଯୋଜନାରେ ଘର ମୋଦି ସରକାର ଦେବାକୁ ଚାହୁଁ ଥିବା ବେଳେ ନବୀନ ବାବୁ ଆବଶ୍ୟକ ନାହିଁ ବୋଲି କହୁଛନ୍ତି ।
ବିଜେପି ନେତା ପ୍ରତାପ ନାୟକ କହିଛନ୍ତି, ହିତାଧିକାରୀଙ୍କ ନାମକୁ ବାରମ୍ବାର ପରିବର୍ତନ କରି ହଜାର ହଜାର କୋଟି ଟଙ୍କା ଦୁର୍ନୀତି କରୁଛନ୍ତି । ବିଧବା ଭତା ପ୍ରଦାନ, ମନରେଗା ଯୋଜନା, ଆବାସ ଯୋଜନାରେ ବ୍ୟାପକ ଦୃର୍ନୀତି ହେଉଛି । ବରିଷ୍ଠ ନେତ୍ରୀ ଅନିତା ସୁଭଦର୍ଶିନୀ ଓ ଘୁମୁସର ଜିଲ୍ଲା ସଭାପତି ଗୋକୁଳାନନ୍ଦ ମଲ୍ଲିକ କହିଛନ୍ତି ବର୍ତମାନଠାରୁ ନ ସୁଧୁରିଲେ ଦୁର୍ନୀତିକୁ ମୁଦ୍ଦା କରି ସମସ୍ତ ବ୍ଲକ୍ କାର୍ଯ୍ୟାଳୟ ସମ୍ମୁଖରେ ଆନେ୍ଦାଳନ କରିବାକୁ ବାଧ୍ୟ ହେବୁ । ପରେ ବେଗୁନିଆପଡା ଅତିରିକ୍ତ ଗୋଷ୍ଠୀ ଉନ୍ନୟନ ଅଧିକାରୀ ପହଁଚି ଦାବିପତ୍ର ଗ୍ରହଣ କରିଥିଲେ । ରାଜ୍ୟ କାର୍ଯ୍ୟକାରିଣୀ ସଦସ୍ୟ ଅରୁଣ କୁମାର ପଣ୍ଡା, ପ୍ରଭାକର ପଣ୍ଡା, କୋଦଳା ଅଧକ୍ଷ ସୂର୍ଯ୍ୟ ନାରାୟଣ ନାୟକ, ମୀରା ଦେଓ, ଆଲୋକ ଶତପଥୀଙ୍କ ସହ ବହୁ ସଂଖ୍ୟାରେ ବିଜେପି କର୍ମକର୍ତାମାନେ ଉପସ୍ଥିତ ରହି ବ୍ଲକ ଘେରାଉ କରିଥିବା ଦେଖିବାକୁ ମିଳିଥିଲା ।
