ଗତ ୨୦ ବର୍ଷ ମଧ୍ୟରେ ଗଣମାଧ୍ୟମର କ୍ରମବିକାଶ ଘଟିଛି – ମେୟର

ଭୁବନେଶ୍ୱର, ୧୭/୧୧ (ଅଭିଜିତ୍ ସିଂ) : ଭୁବନେଶ୍ୱର ମହାନଗର ନିଗମ (ବିଏମ୍ସି) ପକ୍ଷରୁ ଜାତୀୟ ଗଣମାଧ୍ୟମ ଦିବସ ପାଳିତ ହୋଇଯାଇଛି । ବିଏମ୍ସି ମୁଖ୍ୟାଳୟସ୍ଥିତ ଏକାମ୍ର ହଲରେ ଏହି ଉପଲକ୍ଷେ ଆୟୋଜିତ ସଭାରେ ଭୁବନେଶ୍ୱର ମେୟର ଶ୍ରୀମତୀ ସୁଲୋଚନା ଦାସ ଅଧ୍ୟକ୍ଷତା କରିଥିଲେ । ଅନ୍ୟମାନଙ୍କ ମଧ୍ୟରେ ଷ୍ଟାଣ୍ଡିଂ କମିଟିର ଅଧ୍ୟକ୍ଷ ଶ୍ରୀ ବିରଂଚି ନାରାୟଣ ମହାସୂପକାର, ଅତିରିକ୍ତ କମିଶନର ଶ୍ରୀ ଶୁଭେନ୍ଦୁ କୁମାର ସାହୁଙ୍କ ସମେତ କର୍ପୋରେଟରମାନେ ମଂଚାସୀନ ଥିଲେ ।
ଜାତୀୟ ଗଣମାଧ୍ୟମ ଦିବସ ଅବସରରେ ସମ୍ବାଦ, ସାମ୍ବାଦିକତା, ସମାଜ ପ୍ରତି ଦାୟୀତ୍ୱବୋଧ ଇତ୍ୟାଦି ସଂପର୍କରେ ଉପସ୍ଥିତ ଗଣମାଧ୍ୟମ ପ୍ରତିନିଧିମାନେ ଆଲୋକପାତ କରିଥିଲେ । ସାମ୍ବାଦିକମାନେ ସମ୍ବାଦ ପରିବେଷଣ କରିବା ସମୟରେ ସେମାନଙ୍କ ଉପରେ ବିଭିନ୍ନ ପ୍ରକାର ଚାପ ରହିଥାଏ । ଗଣମାଧ୍ୟମ ସଂସ୍ଥାର ମାଲିକଙ୍କ ଚାପ, ବରିଷ୍ଠ ଅଧିକାରୀଙ୍କ ଚାପ, ସମାଜର ଚାପ, ରାଜନୈତିକ ନେତା, ସରକାର, ଅସାମାଜିକ ବ୍ୟକ୍ତି ଏପରିକି ଜୀବନ ଯିବାର ମଧ୍ୟ ଭୟ ଥାଏ । ଏହାରି ଭିତରେ ସମସ୍ତଙ୍କ ମଧ୍ୟରେ ସମନ୍ୱୟ ରଖି ସାମ୍ବାଦିକକୁ ଆଗେଇବାକୁ ପଡେ । ଶୁଣା କଥାକୁ ଖବରଭାବେ ଗ୍ରହଣ ନ କରି ବାସ୍ତବତା ଅନୁଧ୍ୟାନ କରିବା ସାମ୍ବାଦିକର ଧର୍ମ ହେବା ଦରକାର । ଲୋକମାନଙ୍କ ସମସ୍ୟାକୁ ସରକାରଙ୍କର ନିକଟରେ ଏବଂ ସରକାରଙ୍କ ବିଭିନ୍ନ ଯୋଜନା, ନୀତି, ନିୟମ ଇତ୍ୟାଦିକୁ ଲୋକମାନଙ୍କ ନିକଟରେ ପହଂଚାଇବା ଗଣମାଧ୍ୟମର ଧର୍ମ ହେବା ଉଚିତ । ସମସ୍ତ ଚାପର ଉଦ୍ଧ୍ୱର୍ରେ ରହି ସତ୍ୟ ଲୋକଲୋଚନକୁ ଆଣିବା ଦରକାର ବୋଲି ସମାମ୍ବାଦିକ ବିବୁଧ ମହାନ୍ତି, ସ୍ୱାତୀ ଜେନା, ସୁମନ୍ତ ସୁନ୍ଦରାୟ, ସୌମ୍ୟରଂଜନ ନାୟକ, ଚିତରଂଜନ ମାଝୀ, ପ୍ରମୁଖ ମତବ୍ୟକ୍ତ କରିଥିଲେ ।
ସାମ୍ବାଦିକମାନେ ନିରପକ୍ଷତା ରକ୍ଷା କରିବା ଦରକାର । ଅନ୍ୟମାନଙ୍କ ଦ୍ୱାରା ପ୍ରଭାବିତ ନ ହୋଇ ସତ୍ୟଖବର ଲୋକଲୋଚନକୁ ଆଣିବାକୁ ଉଦ୍ୟମ କରିବା ଦରକାର ବୋଲି କର୍ପୋରେଟର ଅଜିତ ବେହେରା କହିଥିଲେ । ସାମ୍ପ୍ରତିକ ପରିସ୍ଥିତିରେ ସାମ୍ବାଦିକତାର ଗୁରୁତ୍ୱବୃଦ୍ଧି ପାଇଛି ଏବଂ ସମ୍ବାଦ ପରିବେଷଣ ଦ୍ୱାରା ଉଭୟ ସରକାର ବା ପ୍ରଶାସନ ଏବଂ ଲୋକମାନେ ସଚେତନ ହେଉଛନ୍ତି । ଫଳରେ ସାମାଜିକ ବିକାଶରେ ବେଶ ସହାୟକ ହୋଇପାରିଛି । ତେବେ ସାମ୍ବାଦିକମାନେ ଉଭୟ ପକ୍ଷର ମତାମତ ନେଇ ସମ୍ବାଦ ପରିବେଷଣ କରିବାକୁ ମତବ୍ୟକ୍ତ କରିଥିଲେ ଷ୍ଟାଣ୍ଡିଂ କମିଟିର ଅଧ୍ୟକ୍ଷ ବିରଂଚି ନାରାୟଣ ମହାସୂପକାର ।
ପ୍ରଶାସନ ଲୋକମାନଙ୍କର ସେବା କରିବା ପାଇଁ ରହିଛି । ସରକାରଙ୍କର ନିର୍ଦେଶକୁ କାର୍ଯ୍ୟକାରୀ କରିବା ପ୍ରଶାସନର କାମ । କାମ କରିବା ପୂର୍ବରୁ ଏବଂ କାମ ସମୟରେ ସରକାରୀ ନୀତି, ନିୟମ, ଲୋକମାନଙ୍କର ଭଲ, ମନ୍ଦ ଆଦି ସବୁ କଥାକୁ ତନ୍ନତନ୍ନ କରି ପରଖିବା ପରେ କାର୍ଯ୍ୟ ହୋଇଥାଏ । ତେଣୁ କୌଣସି ଖବର ପ୍ରକାଶ କିମ୍ବା ପ୍ରସାର କରିବା ପୂର୍ବରୁ ସଂପୃକ୍ତ ବିଭାଗୀୟ ଅଧିକାରୀଙ୍କ ମତାମତ ନେଇ ଖବର ପ୍ରକାଶ କଲେ, ତାହା ଏକ ପାଖିଆନ ହୋଇ ବାସ୍ତବ ଓ ଲୋକମାନଙ୍କର ବିଶ୍ୱସ୍ତ ହୋଇପାରିବ ବୋଲି ମତବ୍ୟକ୍ତ କରିଥିଲେ ଅତିରିକ୍ତ କମିଶନର ଶ୍ରୀ ଶୁଭେନ୍ଦୁ କୁମାର ସାହୁ ।
ସାମ୍ବାଦିକତା ଏକ ସ୍ୱାଧିନ ବୃତି ଏବଂ ଏଥିରେ ଆଗ୍ରହ ରଖିଥିବା ବ୍ୟକ୍ତି ବେଶ ଆତ୍ମସନ୍ତୋଷ ପାଇଥାଏ । ସାମ୍ବାଦିକତା କେବଳ ପେଶା ନୁହେଁ, ନିଶା ମଧ୍ୟ । ବିଗତ ୨୦ ବର୍ଷ ମଧ୍ୟରେ କେବଳ ଓଡିଶା ନୁହେଁ, ସମଗ୍ର ଦେଶରେ ସାମ୍ବାଦିକତାର କ୍ରମବିବର୍ତନ ଘଟିଛି । ବିଶେଷକରି ମହିଳା ସାମ୍ବାଦିକଙ୍କ ଅଗ୍ରଗତି ଘଟିଛି । ସାମ୍ବାଦିକତାର ବିଭିନ୍ନ ଦିଗରେ ନିଜେ ନିଜକୁ ପ୍ରତିଷ୍ଠା କରିପାରିଛନ୍ତି । ଓଡିଶାରେ ଇଲେକ୍ଟ୍ରୋନିକ୍ସ ମିଡିଆର ବିକାଶ ଏବଂ ପ୍ରଭାବକୁ ବିଭିନ୍ନ ଘଟଣାବଳୀ ସହିତ ମନେପକାଇ ଭାବ ବିହ୍ୱଳ ହୋଇପଡିଥିଲେ ମାନନୀୟା ମେୟର । କେବଳ ସମାଲୋଚନା ନୁହେଁ, ଗଠନମୂଳକ ସମ୍ବାଦ ପରିବେଷଣ କରି ସମାଜର ଉନ୍ନତିସାଧାନ ଦିଗରେ ସାମ୍ବାଦିକମାନେ ବ୍ରତୀ ହେବାକୁ ସେ ଆହ୍ୱାନ ଦେଇଛନ୍ତି ।
ଆୟୋଜିତ ସଭାରେ ଉଭୟ ଛାପା ଓ ବୈଦ୍ୟୁତିକ ଗଣମାଧ୍ୟମର ବହୁ ବରିଷ୍ଠ ଓ କନିଷ୍ଠ ପ୍ରତିନିଧି, ଫଟୋ ସାମ୍ବାଦିକ ଯୋଗ ଦେଇଥିଲେ । ଅନ୍ୟମାନଙ୍କ ମଧ୍ୟରେ କର୍ପୋରେଟର ପଦ୍ମଜା ପ୍ରିୟଦର୍ଶନୀ ଜେନା, ଗୀତାଞ୍ଜଳି ସାହୁ, ଭାରତୀ ସିଂ, ଲକ୍ଷ୍ମୀପି୍ରୟା ପରିଡା, ମୋନାଲିସା ବେହେରା, ଇତିଶ୍ରୀ ଦାସ ପ୍ରମୁଖ ଉପସ୍ଥିତ ଥିଲେ । ଶେଷରେ ଜାତୀୟ ଗଣମାଧ୍ୟମ ଦିବସ ଅବସରରେ ମେୟର ସାମ୍ବାଦିକଙ୍କୁ ପୁଷ୍ପ ପ୍ରଦାନ ପୂର୍ବକ ସମ୍ବର୍ଦ୍ଧିତ କରିଥିଲେ ।