ଯାତ୍ରା ପାଇଁ ଅଧାବାଟରେ ଅଟକିଗଲା ଦମକଳ ଗାଡ଼ି
ବାଲିଆପାଳ : ଯାତ୍ରା ପାଇଁ ଅଧାବାଟରେ ଅଟକିଗଲା ଦମକଳ ଗାଡ଼ି । ପ୍ରାୟ ଏକ ଘଣ୍ଟାରୁ ଅଧିକ ସମୟ ଧରି ଗାଡି ଅଟକିବା ପରେ ଦମକଳ ଗାଡିକୁ ମିଳିଥିଲା ରାସ୍ତା । ଫଳରେ ବିଳମ୍ବରେ ଘଟଣା ସ୍ଥଳରେ ପହଞ୍ଚିଥିଲା ଦମକଳ ଗାଡି । ଏ ଘଟଣା ହେଉଛି ବାଲେଶ୍ୱର ଜିଲ୍ଲା ବାଲିଆପାଳ ବ୍ଲକରରେ ଥିବା ସିମୁଳିଆ ରାବଣ ପୋଡି ପଡିଆର । ଦଶହରା ପାଇଁ ଚାରିଆଡେ ଚାଲିଛି ଅପେରା ମଉଜ । ଆଉ ଅପେରା ଦେଖିବା ପାଇଁ ଲୋକଙ୍କ ଗହଳି ମଧ୍ୟ ବଢିବାରେ ଲାଗିଛି । ତେବେ ଗହଳିକୁ ନିୟନ୍ତ୍ରଣ କରିବା ପାଇଁ ପ୍ରଶାସନର ଖାମଖିଆଲ ମନୋଭାବ ପାଇଁ ଏକ ଜରୁରୀ କାଳୀନ ଗାଡି ବିଳମ୍ବରେ ଘଟଣା ସ୍ଥଳରେ ପହଞ୍ଚିବା ଘଟଣାକୁ ସ୍ଥାନୀୟ ବୁଦ୍ଧିଜୀବୀ ମହଲରେ ତୀବ୍ର ନିନ୍ଦା କରାଯାଇଛି । ସୂଚନା ଅନୁସାରେ, ବାଲିଆପାଳ ବ୍ଲକରେ ଏକ ଷଣ୍ଢକୁ ଉଦ୍ଧାର କରିବା ପାଇଁ ଉଦ୍ଧାରକାରୀ ଦଳ ସଦଳବଳେ ବାହାରିଥିଲେ । ମାତ୍ର ଲୋକଙ୍କ ଗହଳି ଭିତରେ ଫଶିଯାଇଥିଲେ । ଅପରପକ୍ଷେ ଏହି ଘଟଣା ପରେ ଲୋକେ ପ୍ରଶ୍ନ କରିଛନ୍ତି ଯେ, ଯଦି କୌଣସି ଆମ୍ବୁଲାନ୍ସ ଜରୁରୀ ପରିସ୍ଥିତିରେ ଏଭଳି ଫଶି ଯାଇଥାଆନ୍ତା ତେବେ ତାହାର ସମାଧାନ କଣ ହୋଇଥାଆନ୍ତା । ପାର୍ବଣ ସମୟରେ ପୋଲିସ ପ୍ରଶାସନର କୋହଳ ଚେକିଂ ପାଇଁ ଟ୍ରାଫିକ ସମସ୍ୟା ଉପଜିଛି ବୋଲି ଅଭିଯୋଗ କରିଛନ୍ତି ସ୍ଥାନୀୟବାସୀ ।
ରିପୋର୍ଟ : ବାଲିଆପାଳରୁ ଚନ୍ଦନ ଅଣ୍ଡିଆ
