ମର୍ମନ୍ତୁଦ ବାଇକ ଦୁର୍ଘଟଣା, ଚାଲିଗଲା ଯୁବକଙ୍କ ଜୀବନ…

ନୂଆପଡ଼ା : ମର୍ମନ୍ତୁଦ ବାଇକ ଦୁର୍ଘଟଣାରେ ଚାଲିଗଲା ଯୁବକଙ୍କ ଜୀବନ । ନୂଆପଡ଼ା ଜିଲ୍ଲା ବୋଡ଼େନ ଥାନା କ୍ଷୀରମାଲ୍ ଗାଁ କପା ଗୋଦାମ୍ ଛକ ନିକଟରେ ମର୍ମନ୍ତୁଦ ସଡକ ଦୁର୍ଘଟଣା ହୋଇଛି । ଘଟଣାରେ ସେହି ଗାଁର ଜଣେ ଯୁବକ ଅଭୟ ଶବରଙ୍କ ମୃତ୍ୟୁ ହୋଇଥିବା ଜଣାପଡିଛି । ମୃତକ ଜଣକ ଗତକାଲି ରାତି ପ୍ରାୟ 11ଟା ସମୟରେ ନିକଟସ୍ଥ ଲର୍କା ଗାଁକୁ କିଛି ଜିନିଷ ଆଣିବାକୁ ଯାଇଥିଲେ । ତେବେ ସେଠାରୁ ଫେରିବା  ସମୟରେ ଭାରସାମ୍ୟ ହରାଇ ଗାଡ଼ୱାଲରେ ପିଟି ହୋଇ ପାଖରେ ଥିବା ବିଲରେ ପଡ଼ି ଯାଇଥିଲେ । ରାତି ସମୟ ହୋଇଥିବାରୁ ତାଙ୍କୁ କେହି ଦେଖିପାରିନଥିଲେ । ଯେଉଁଥିପାଇଁ ସାରା ରାତି ସେ ସେଠାରେ ପଡି ରହିବା କାରଣରୁ ତାଙ୍କର ମୃତ୍ୟୁ ହୋଇଥାଇପାରେ ବୋଲି ପାରିପାର୍ଶ୍ବିକସ୍ଥିତିକୁ ଅନୁଧ୍ୟାନ କରି ପୋଲିସ ପକ୍ଷରୁ ସୂଚନା ମିଳିଛି ।

ଆଜି ଭୋର ସମୟରେ କ୍ଷୀରମାଲ୍ ଗାଁର କିଛି ଲୋକ ସେହି ରାସ୍ତା ଦେଇ ଯାଉଥିବା ସମୟରେ ମୃତ ଯୁବକଙ୍କୁ ଦେଖି ଗ୍ରାମରଖି ପୂର୍ଣ୍ଣ ବାଗଙ୍କ ଜରିଆରେ ପୋଲିସ ଥାନାକୁ ସୂଚନା ଦେଇଥିଲେ । ଖବର ପାଇ ବୋଡ଼େନ ପୋଲିସ କେଶ୍ ନମ୍ଵର 257/23ରେ ଏକ ଅପମୃତ୍ୟୁ ମାମଲା ରୁଜୁ କରି ମୃତ ଶରୀରକୁ ଜବତ କରି ବ୍ୟବଚ୍ଛେଦ ପାଇଁ ବୋଡ଼େନ ଗୋଷ୍ଠୀ ସ୍ବାସ୍ଥ୍ୟ କେନ୍ଦ୍ରକୁ ପଠାଇଥିବା ଜଣାପଡିଛି ।

ରିପୋର୍ଟ : ନୂଆପଡ଼ାରୁ କୀର୍ତ୍ତି ଚନ୍ଦ୍ର ନାଗ