ଜଳବାୟୁ ପରିବର୍ତ୍ତନର ଭାରତର ପ୍ରଥମ ଥଇଥାନ କଲୋନୀରେ ପରିଣତ ହୋଇଛି କେନ୍ଦ୍ରାପଡାର ବଗପାଟିଆ ଆଦର୍ଶ କଲୋନୀ…

କେନ୍ଦ୍ରାପଡ଼ା : ସାତଭାୟା ଥଇଥାନ କଲୋନୀ ବଗପାଟିଆକୁ ଆଦର୍ଶ କଲୋନୀ ରୁପେ ଗଢ଼ି ତୋଳିବା ପାଇଁ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଖୋଲି ଦେଇଛନ୍ତି ବିକାଶର ପେଡ଼ି । ଥଇଥାନ ହୋଇଥିବା ୫୭୧ ପରିବାର ଯେମିତି ମୌଳିକ ଅଧିକାରରୁ ବଞ୍ଚିତ ନହେବେ ସେ ନେଇ ସରକାର ବିଭିନ୍ନ ଉନ୍ନତି ମୂଳକ କାର୍ଯ୍ୟକ୍ରମ ହାତକୁ ନେଉଛନ୍ତି । ଥଇଥାନ ହୋଇଥିବା ସମସ୍ତ ପରିବାରକୁ ମୁଖ୍ୟମନ୍ତ୍ରୀ ସ୍ଵତନ୍ତ୍ର ପ୍ରୋତ୍ସାହନ ସହାୟତା ରାଶି ଯୋଗାଇ ଦିଆଯାଇଛି । ଅଧାପନ୍ତରିଆ ଘରକୁ ପୂର୍ଣ୍ଣାଙ୍ଗ କରିବାକୁ ସହାୟତା ମିଳିଥିବାରୁ ସାତଭାୟାବସୀ ମୁଖ୍ୟମନ୍ତ୍ରୀଙ୍କୁ କୃତଜ୍ଞତା ଜଣାଇଛନ୍ତି ।

କେନ୍ଦ୍ରାପଡ଼ା ଜିଲ୍ଲା ରାଜନଗର ବ୍ଲକର ସମୁଦ୍ରର ଆଁ ମୁହଁରେ ଜୀବନ ଜୀବିକାକୁ ନେଇ ପ୍ରତି ମୁହୂର୍ତ୍ତରେ ସଂଘର୍ଷ କରୁଥିଲେ ସାତଭାୟାବସୀ । ଶିକ୍ଷା, ସ୍ଵାସ୍ଥ୍ୟ, ଗମନାଗମନ, ବିଜୁଳି ଓ ବିଶୁଦ୍ଧ ପାନୀୟ ଜଳ ସେମାନଙ୍କ ପାଇଁ ଅପହଞ୍ଚ ହୋଇଯାଇଥିଲା । ୧୯୭୧ ପ୍ରଳୟଙ୍କରୀ ମହାବାତ୍ୟାରେ ସାତଭାୟାର ହଜାର ହଜାର ଲୋକେ ମୃତ୍ୟୁବରଣ କରିଥିଲେ । ଏହି ସମୟରେ ଓଡ଼ିଶାର ଭୂମିପୁତ୍ର ବିଜୁ ପଟ୍ଟନାୟକ ଅପହଞ୍ଚ ଇଲାକା ସାତଭାୟାରେ ପହଞ୍ଚି ଦେଖିଥିଲେ ବାତ୍ୟା ବିଭୀଷିକାର କରୁଣ ଚିତ୍ର । ସେହିଦିନ ସାତଭାୟାବସୀଙ୍କୁ ବିଜୁବାବୁ ପ୍ରତିଶ୍ରୁତି ଦେଇଥିଲେ ସମୁଦ୍ର କରାଳ ଗ୍ରାସରେ ଆଉ ଜଣେ ଲୋକର ଜୀବନ ଯିବ ନାହିଁ ଓ ଅନ୍ୟତ୍ର ଥଇଥାନ କରିବାକୁ ପ୍ରତିଶ୍ରୁତି ଦେଇଥିଲେ । ଯାହାକୁ ସଫଳ କରି ଦେଖାଇଛନ୍ତି ବିଜୁବାବୁଙ୍କ ସୁପୁତ୍ର ନବୀନ ପଟ୍ଟନାୟକ । ୨୦୧୮ ମସିହାରେ ୫୭୧ ପରିବାରକୁ ଗୁପ୍ତି ବଗପାଟିଆଠାରେ ଥଇଥାନ କରିଛନ୍ତି । ପ୍ରତି ପରିବାରକୁ ୧୦ ଡିସିମିଲ ଜାଗା ସହ ବିଜୁ ପକ୍କା ଘର, ବିଜୁଳି, ପାନୀୟ ଜଳ ସହ କଲୋନୀରେ ସ୍କୁଲ, ଅଙ୍ଗନବାଡ଼ି, ବାତ୍ୟା ଆଶ୍ରୟସ୍ଥଳ, ପଞ୍ଚାୟତ କାର୍ଯ୍ୟାଳୟ ଓ ରାସ୍ତା ଘାଟର ଉନ୍ନତି କରଣ କରାଯାଇଛି ।

ସାତଭାୟାବସୀଙ୍କୁ ଥଇଥାନ ପରେ ପୁନର୍ବାର ସରକାର ମୁଖ୍ୟମନ୍ତ୍ରୀ ସ୍ଵତନ୍ତ୍ର ପ୍ରୋତ୍ସାହନ ସହାୟତା ରାଶି ମାଧ୍ୟମରେ ପ୍ରଥମେ ପର୍ଯ୍ୟାୟରେ ଘର ପୂର୍ଣ୍ଣାଙ୍ଗ କରିଥିବା ୩୭୨ ପରିବାରକୁ ୫୪,୩୪୦ ଟଙ୍କା ପ୍ରଦାନ କରାଯାଇଥିଲା । ଦ୍ଵିତୀୟ ପର୍ଯ୍ୟାୟରେ ଘର ପୂର୍ଣ୍ଣାଙ୍ଗ କରିଥିବା ୩୦ ପରିବାରକୁ ୫୪,୩୪୦ ଟଙ୍କା ଲେଖାଏଁ ଏବଂ ଘର ଅଧା ନିର୍ମାଣ କରିଥିବା ୧୬୯ ପରିବାରକୁ ୨୫ ହଜାର ଟଙ୍କା ଲେଖାଁଏ ସହାୟତା ଯୋଗାଇ ଦିଆଯାଇଛି । ଘର ପୂର୍ଣ୍ଣାଙ୍ଗ ପରେ ସଂପୂର୍ଣ୍ଣ ସହାୟତା ରାଶି ପ୍ରଦାନ କରାଯିବା ନେଇ ରାଜନଗର ବିଡ଼ିଓ ସୂଚନା ଦେଇଛନ୍ତି । ଏହି କାର୍ଯ୍ୟକ୍ରମରେ ରାଜନଗର ବିଧାୟକ ଧୃବ ସାହୁ ଯୋଗଦେଇ ହିତାଧିକାରୀଙ୍କୁ ସହାୟତା ରାଶି ବଣ୍ଟନ କରିଥିଲେ । ସୂଚନା ଅନୁସାରେ, ନିକଟରେ 5T ସଚିବ ସାତଭାୟା ଗ୍ରସ୍ତ କରି ଖୁବଶୀଘ୍ର ସାତଭାୟାବାସୀଙ୍କୁ ଖୁସି ଖବର ମିଳିବ ବୋଲି କହିଥିଲେ । ଏହାର ମାତ୍ର ୨୪ ଘଣ୍ଟା ନପୁରୁଣୁ ମୁଖ୍ୟମନ୍ତ୍ରୀ ମା ପଞ୍ଚୁବରାହୀ ମନ୍ଦିର ଉନ୍ନତି କରଣ ପାଇଁ ୫କୋଟି ଟଙ୍କା ଓ ରାସ୍ତା, ସ୍କୁଲ, ଖେଳପଡିଆ ଆଦି କଲୋନୀର ବିକାଶ ପାଇଁ ୨୨ କୋଟି ୫୨ ଲକ୍ଷ ଟଙ୍କା ଘୋଷଣା କରିଥିଲେ । ଯାହା ସାତଭାୟାବସୀଙ୍କୁ ଅଭିଭୂତ କରିଛି ।

ସମୁଦ୍ରର କରାଳ ଗ୍ରାସରୁ ବର୍ତ୍ତି ଯାଇଥିବା ସାତଭାୟାବସୀଙ୍କୁ ଥଇଥାନ କରି ଜଳବାୟୁ ପରିବର୍ତ୍ତନର ଭାରତର ପ୍ରଥମ ଥଇଥାନ କଲୋନୀ ପ୍ରତିଷ୍ଠା କରାଯାଇଛି ଯାହାକୁ ନେଇ ମୁଖ୍ୟମନ୍ତ୍ରୀଙ୍କୁ ଭୁରି ଭୁରି ପ୍ରଶଂସା କରିଛନ୍ତି ସାତଭାୟାବସୀ ।

ରିପୋର୍ଟ : ରାଜନଗରରୁ କୃତିବାସ ପ୍ରଧାନ