ଧାନରେ ପୋକ, ଚିନ୍ତାରେ ଚାଷୀ…
ବାଲେଶ୍ଵର : ବାଲେଶ୍ଵର ଜିଲ୍ଲା ହେଉଛି ଏକ କୃଷିପ୍ରବଣ ଜିଲ୍ଲା । ଧାନ, ପାନ, ମୀନର ବ୍ୟବସାୟକୁ ନେଇ ଜୀବନ ଜୀବିକା ପ୍ରତିପୋଷଣ କରନ୍ତି ଏଠାକାର ଜନସାଧାରଣ । ନୀଳଗିରିରେ ଧାନ ଫସଲରେ ଏବେ ବ୍ୟାପକ ରୋଗ ପୋକ ଦେଖିବାକୁ ମିଳିଛି । ଯାହାକୁ ନେଇ ଚିନ୍ତାରେ ଚାଷୀକୂଳ । ଧାନ ଫସଲରେ ଚକଡା ପତ୍ର ମୋଚା ଗୁଣ୍ଡି ପୋକ, ସମ୍ବାଳୁଆ ପୋକ ଲାଗିଥିବାରୁ ଫସଲ ନଷ୍ଟ ହୋଇଯାଇଛି । ଏ ନେଇ ଖବର ପାଇ ନୀଳଗିରି କୃଷି ଜିଲ୍ଲା ଅଧିକାରୀ ଏକ ପାଞ୍ଚଜଣିଆ ଟିମ୍ ନେଇ ନୀଳଗିରି ଅଂଚଳର ବିଭିନ୍ନ ପଞ୍ଚାୟତରେ ଥିବା ଚାଷ ଜମି ପରିଦର୍ଶନ କରିଛନ୍ତି । ଏହା ସହିତ ସମ୍ପୃକ୍ତ ଚାଷୀମାନଙ୍କୁ ରୋଗ ପୋକ ନିୟନ୍ତ୍ରଣ କରିବା ପାଇଁ ପରାମର୍ଶ ଦେଇଛନ୍ତି ।
ବର୍ତ୍ତମାନ ପରିସ୍ଥିତିରେ ଜମିରେ ପଟାସ ସାର ଏକର ପିଛା ୧୩ କେଜିରୁ ୧୫ କେଜି ପକାଇବା ସହିତ ରୋଗ ଅନୁସାରେ ଏକର ପିଛା ୧୩ ଡ୍ରମ୍ କୀଟନାଶକ ଔଷଧ ପକାବା ଲାଗି ପରାମର୍ଶ ଦିଆଯାଇଛି । ରୋଗ ଅନୁସାରେ ୧୦ କେଜି ସରୁ ବାଲିରେ କିରୋସିନି ଅଧା ଲିଟର ମିସାଇ ଧାନ ଫସଲରେ ବୁଣି କିଛି ସମୟ ପରେ ଦୁଇଜଣ ଦୌଡ଼ି ପଳାଇ ଘୋଷାରି ଦେବାକୁ ମଧ୍ୟ ପରାମର୍ଶ ଦିଆଯାଇଛି ।
ଏହାଦ୍ଵାରା ପୋକ ନଷ୍ଟ ହୋଇଯିବ ଏବଂ ଚକଡା ପୋକ ଜମିରେ ପ୍ରଥମେ ଚାରି ପାଞ୍ଚ ଫୁଟ ଅନ୍ତରେ ପାହି ଭାଙ୍ଗି ଦେଲେ ରୋଗ ପୋକ ନିୟନ୍ତ୍ରଣ ହୋଇପାରିବ ବୋଲି ବିଶେଷଜ୍ଞ ଟିମ୍ ପକ୍ଷରୁ କୁହାଯାଇଛି । ତେବେ ଜମିରେ ୟୁରିଆ ସାର ପ୍ରୟୋଗ ନ କରିବାକୁ ଚାଷୀଙ୍କୁ ପରାମର୍ଶ ଦେଇଛନ୍ତି ବିଶେଷଜ୍ଞ । ଅପରପକ୍ଷେ ଚାଷରେ କ୍ଷୟକ୍ଷତି ଭରଣା ପାଇଁ ସରକାରଙ୍କ ସାହାଯ୍ୟ ସହଯୋଗ ଦାବି କରିଛନ୍ତି ଚାଷୀକୂଳ ।
ରିପୋର୍ଟ : ନୀଳଗିରିରୁ ସଚିଦାନଁଦ ପାତ୍ର
