ହସ୍ପିଟାଲ ଭିତରେ ଲହଡି ଭାଙ୍ଗୁଛି ବର୍ଷା ଜଳ । ରୋଗୀ ହନ୍ତସନ୍ତ…
ବାଲେଶ୍ବର : ବର୍ଷାରେ ବେହାଲ ଜିକେ ଭଟ୍ଟର ହସ୍ପିଟାଲ । ହସ୍ପିଟାଲ ଭିତରେ ଲହଡି ମାରୁଛି ବର୍ଷା ପାଣି । ରୋଗୀ ସେବା ବାଧା ପ୍ରାପ୍ତ । ଲଘୁଚାପ କାରଣରୁ ଜଳେଶ୍ଵର ଅଞ୍ଚଳରେ ଗତକାଲି ରାତିରୁ ପ୍ରବଳ ବର୍ଷା ଲାଗି ରହିଛି । ଫଳରେ ବାଲେଶ୍ବର ଜିଲ୍ଲା ଜଳେଶ୍ବର ବ୍ଲକ ଅନ୍ତର୍ଗତ ଜିକେ ଭଟ୍ଟର ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରରେ ବର୍ଷା ପାଣି ପ୍ରବେଶ କରିଛି । ଡାକ୍ତରଖାନାର ସମସ୍ତ ବିଭାଗରେ ବର୍ଷା ପାଣି ପଶିଯାଇଥିବାବେଳେ ତଳ ମହଲା ସମ୍ପୂର୍ଣ୍ଣ ଜଳମଗ୍ନ ହୋଇଯାଇଛି । ତେଣୁ ଡାକ୍ତରଖାନାରେ ଚିକିତ୍ସିତ ହେଉଥିବା ସମସ୍ତ ରୋଗୀଙ୍କୁ ଉପରେ ମହଲାକୁ ସ୍ଥାନାନ୍ତର କରାଯାଇଛି ।
ଡାକ୍ତରଖାନା ସମ୍ମୁଖରେ ଥିବା ଡ୍ରେନ ପରିଷ୍କାର ନ ଥିବାରୁ ବର୍ଷା ଜଳ ନିଷ୍କାସନ ହୋଇ ନପାରି ଡାକ୍ତରଖାନା ପରିସରରେ ବର୍ଷା ଜଳ ପ୍ରବେଶ କରିଥିବା କୁହାଯାଉଛି । ଏପଟେ ପାଣି ନିଷ୍କାସନ ପାଇଁ ମ୍ୟୁନିସିପାଲଟି ପକ୍ଷରୁ କାର୍ଯ୍ୟ ଜାରି ରହିଛି । ଅପରପକ୍ଷେ ଜିକେ ଭଟ୍ଟର ହସ୍ପିଟାଲର ଏଭଳି ଦୁର୍ଦ୍ଦଶା ପାଇଁ ଲୋକ ଜଳେଶ୍ବର ବିଧାୟକଙ୍କୁ ଦାୟୀ କରିଛନ୍ତି ।
ରିପୋର୍ଟ : ବାଲିଆପାଳରୁ ଚନ୍ଦନ ଅଣ୍ଡିଆ
