୫୧ ଫୁଟ୍ ଉଚ୍ଚତା ବିଶିଷ୍ଟ ବିଘ୍ନବିନାୟକଙ୍କ ନିକଟରେ ଭୋଗ ଲାଗିବ ୫୧ କେଜିର ଲଡୁ…

ଭୁବନେଶ୍ବର : ଆଉ ଦିନ କେଇଟା ପରେ ପୂଜା ପାଇବେ ଗଜାନନ । ଚଳିତଥର ନୟାପଲ୍ଲୀ ନୂଆସାହିରେ ଗଣେଶ ମହୋତ୍ସବକୁ ଧୁମଧାମର ସହିତ ପାଳନ କରିବାକୁ ପ୍ରସ୍ତୁତି ଶେଷ ପର୍ଯ୍ୟାୟରେ ପହଞ୍ଚିଛି । ଏଥର ଭକ୍ତଙ୍କ ଗହଣରେ ପୂଜା ପାଇବେ ୫୧ ଫୁଟ୍ ଉଚ୍ଚତା ବିଶିଷ୍ଟ ବିଘ୍ନବିନାୟକ । ଭୁବନେଶ୍ବର ମହାନଗର ନିଗମ ନୟାପଲ୍ଲୀ ନୂଆସାହିର ଶ୍ରୀ ଶ୍ରୀ ଆଖଣ୍ଡଳମଣି ସେବା ସଂସଦ ଆନୁକୂଲ୍ୟରେ ଶ୍ରୀ ଗଣେଶ ମହାପ୍ରଭୁଙ୍କ ପୂଜା ମହାଡମ୍ବରରେ ପାଳିତ ହେବ । ଓଡିଶା ଏବଂ କଲିକତାର ମୋଟ ୩୦ ଜଣ କାରିଗର ଦୀର୍ଘ ୨୧ ଦିନ ଧରି ଶ୍ରୀ ଗଣେଶଙ୍କ ପ୍ରତିମା ପ୍ରସ୍ତୁତିରେ ଲାଗିଛନ୍ତି । ତେବେ ଏହି ପ୍ରତିମା ପ୍ରସ୍ତୁତିରେ କୌଣସି ପ୍ରକାରର ରାସାୟନିକ ପଦାର୍ଥ ବ୍ୟବହାର ହୋଇନଥିବା କହିଛନ୍ତି ପୂଜା କମିଟି ସଦସ୍ୟ । ଅପରପକ୍ଷେ ପୂଜାର ଶ୍ରୀ ଗଣେଶଙ୍କୁ ୫୧ କେଜିର ଲଡୁ ଭୋଗ ଲାଗିହେବା ସହ ପ୍ରତ୍ୟେକଦିନ ସନ୍ଧ୍ୟାରେ ସାଂସ୍କୃତିକ କାର୍ଯ୍ୟକ୍ରମ ପରିବେଷଣ କରାଯିବ ବୋଲି କମିଟି ପକ୍ଷରୁ କୁହାଯାଇଛି । ଏହାସହିତ ୬୫ ଫୁଟ ଲମ୍ବା ଏବଂ ୪୦ ଫୁଟ ଚଉଡା ବିଶିଷ୍ଟ ଏକ କାଳ୍ପନିକ ରାଜପ୍ରାସାଦ ତୋରଣ ପ୍ରସ୍ତୁତ କରାଯିବ । ଏଥିପାଇଁ ବିଭିନ୍ନ ଜିଲ୍ଲାରୁ ମୋଟ ୬୦ ଜଣ ଶିଳ୍ପୀ ନିୟୋଜିତ ହୋଇଛନ୍ତି । ଗୋଟିଏ ସୁଉଚ୍ଚ ଲାଇଟ୍ ଗେଟ୍ ସାଙ୍ଗକୁ ୨୦ଟି ଗଛ ଲାଇଟ୍ ଗେଟ୍ ମୁଖ୍ୟ ଆକର୍ଷଣୀୟ ହେବ ବୋଲି କମିଟି ପକ୍ଷରୁ ପ୍ରକାଶ କରାଯାଇଛି ।

୨୩ ଲକ୍ଷ ଟଙ୍କାର ବ୍ୟୟ ଅଟକଳରେ ପ୍ରସ୍ତୁତ ହେବାକୁ ଥିବା ଏହି କାର୍ଯ୍ୟକ୍ରମ ୧୧ ଦିନ ଧରି ଅନୁଷ୍ଠିତ ହେବ । ଏଥିପାଇଁ କମିଟି ପକ୍ଷରୁ ସମସ୍ତ ବ୍ୟବସ୍ଥା ଗ୍ରହଣ କରାଯାଇଛି । ଶ୍ରଦ୍ଧାଳୁଙ୍କ ଆଗମନକୁ ଦୃଷ୍ଟିରେ ରଖି ପୋଲିସ ପ୍ରଶାସନ, ଟ୍ରାଫିକ ପୋଲିସ, ଅଗ୍ନିଶମ ବିଭାଗ, ମେଡିକାଲ ବ୍ୟବସ୍ଥା, ସିକ୍ୟୁରିଟି ବ୍ୟବସ୍ଥା, ପିଇବା ପାଣି, ସୂଚନା କେନ୍ଦ୍ର, ସିସିଟିଭି କ୍ୟାମେରା ବ୍ୟବସ୍ଥା ସହ ୩୦୦ ଜଣ ସ୍ବେଚ୍ଛାସେବୀଙ୍କୁ ନେଇ ପୂଜାର ସୁରକ୍ଷା ବ୍ୟବସ୍ଥାକୁ ଗୁରୁତ୍ବ ଦିଆଯାଇଛି ।

ରିପୋର୍ଟ : ଭୁବନେଶ୍ବରରୁ ଅଭିଜିତ୍ ସିଂ