ବସ୍ କେଳେଙ୍କାରୀରେ ସମ୍ପୃକ୍ତବ୍ୟକ୍ତିଙ୍କ ବିରୋଧରେ ଦୃଢ କାର୍ଯ୍ୟାନୁଷ୍ଠାନ ଦାବି କଲା ବିଜେପି…

ବାଲେଶ୍ଵର : ବାଲେଶ୍ଵର ଜିଲ୍ଲାର ନୀଳଗିରି ଏନ୍ଏସିର କେଳେଙ୍କାରୀ ଘଟଣା ଏବେ ଲୋକ ଲୋଚନକୁ ଆସିବାରେ ଲାଗିଛି । ନୀଳଗିରି ଏନ୍ଏସିର ପ୍ରଥମ ଅଧ୍ୟକ୍ଷ କ୍ଷିତିଶ ଚନ୍ଦ୍ର ରାୟଙ୍କ ସମୟରେ କିଣାଯାଇଥିଲା ଏକ ମିନି ବସ୍ । କେତେକ ସମସ୍ୟା ପାଇଁ ବସ୍ ଚଳାଚଳ ହୋଇ ନ ପାରି କାର୍ଯ୍ୟାଳୟ ପରିସରରେ ପଡିରହିଥିଲା l ଏହା ହଠାତ୍ ଉଭାନ୍ ହୋଇ କବାଡ଼ିଆ ଘରେ ଦେଖିବାକୁ ମିଳିଥିଲା । ଅପରପକ୍ଷେ କର୍ମଚାରୀଙ୍କୁ ମାଡ ଓ ଗାଳିଗୁଲଜ ଘଟଣାକୁ ନେଇ ଥାନାରେ ମାମଲା ରୁଜ୍ଜୁ ହୋଇଥିଲା l ଏସବୁର ବିଧିବଦ୍ଧ ତଦନ୍ତ ଦାବି ନେଇ ନୀଳଗିରି ନଗର ସଭାପତି ପ୍ରଫୁଲ୍ଲ କୁମାର ଦଲେଇଙ୍କ ଅଧ୍ୟକ୍ଷତାରେ ଏକ ସାମ୍ବାଦିକ ସମ୍ମିଳନୀ ଅନୁଷ୍ଠିତ ହୋଇଯାଇଛି l ବସ୍ କିପରି ଏନ୍ଏସି କାର୍ଯ୍ୟାଳୟ ପରିସରରୁ ବାହାରକୁ ଗଲା ଏବଂ କାହା ଅନୁମତିରେ କବାଡିଆ ପାଖରେ ବିକ୍ରି ହେଲା ତାହାର ତଦନ୍ତ ଦାବି ହୋଇଛି । ତେବେ ଘଟଣାକୁ ଚାପି ଦେବା ପାଇଁ ବସ୍ ଚୋରି ହୋଇଛି ବୋଲି ଯେଉଁ ଆଲୋଚନା ହୋଇଥିଲା ତାକୁ ନେଇ ନିର୍ବାହୀ ଅଧିକାରୀ ଥାନାରେ ଅଭିଯୋଗ କରିଛନ୍ତି । ଏପଟେ ଜଗୁଆଳିକୁ କାରଣ ଦର୍ଶାଅ ନୋଟିସ୍ ଜାରି ହୋଇଥିଲେ ମଧ୍ୟ ଆଜି ପର୍ଯ୍ୟନ୍ତ ପ୍ରଶାସନ ପକ୍ଷରୁ କି ପଦକ୍ଷେପ ଗ୍ରହଣ କରାଯାଇଛି ତାହାର ତଥ୍ୟ ମାଗିଛନ୍ତି ନଗର ସବାପତି ।

ତୁରନ୍ତ ବସ୍ କେଳେଙ୍କାରୀ କାରବାରରେ ବିଧିବଦ୍ଧ ତଦନ୍ତ କରିବା ସହିତ ସମ୍ପୃକ୍ତ ବ୍ୟକ୍ତିମାନଙ୍କ ବିରୁଦ୍ଧରେ ଦୃଢ କାର୍ଯ୍ୟାନୁଷ୍ଠାନ ଗ୍ରହଣ କରିବା ପାଇଁ ଦାବି ହୋଇଛି । ଯଦି ଏପରି ନ ହୁଏ ତେବେ ଆଗାମୀ ଦିନରେ ବିଜେପି ପକ୍ଷରୁ ବିକଳ୍ପ ବ୍ୟବସ୍ଥା ଗ୍ରହଣ କରାଯିବ ବୋଲି ଚେତାବନୀ ଦେଇଛି ବିଜେପି । ଏହି ସାମ୍ବାଦିକ ସମ୍ମିଳନୀରେ ମନୋରଞ୍ଜନ ବେହେରା, ପୂର୍ବତନ ଏନ୍ଏସି ଅଧ୍ୟକ୍ଷା ଶାନ୍ତିଲତା ଖଟୁଆ, ଏନ୍ଏସି ଅଧ୍ୟକ୍ଷ ରାଧାଗୋବିନ୍ଦ ଖଟୁଆ, ଗଙ୍ଗାଧର ମିଶ୍ର, କରୁଣାକର ପଣ୍ଡା, ରାମଚନ୍ଦ୍ର ଦାଶ ପ୍ରମୁଖ ଉପସ୍ଥିତ ରହି ଆଲୋଚନାରେ ଅଂଶ ଗ୍ରହଣ କରିଥିଲେ l

ରିପୋର୍ଟ : ନୀଳଗିରିରୁ ସଚିଦାନଁଦ ପାତ୍ର