ଶିକ୍ଷା ବିଭାଗର ଉଦାସୀନ ମନୋଭାବ ଏବଂ ରାଜ୍ୟ ସରକାରଙ୍କ ଦୂରଦୃଷ୍ଟିର ଅଭାବ, ସଂସ୍କୃତ ଶିକ୍ଷା ପ୍ରତି ବଡ ଅବହେଲା…

ବେଗୁନିଆପଡା : ନାହିଁ ନାହିଁରେ ଚାଲିଛି ବେଗୁନିଆପଡା ବ୍ଲକ ସଂସ୍କୃତ ଶିକ୍ଷା । ମେଦିନୀପୁର ଏବଂ ତାଳସରରେ ବିପର୍ଯ୍ୟସ୍ତ ଅବସ୍ଥାରେ ସଂସ୍କୃତ ଶିକ୍ଷା । ଏପଟେ ଖଣ୍ଡିଆନଈରେ ଝୁଲୁଛି ତାଲା । ଶିକ୍ଷାର ଉନ୍ନତି ପାଇଁ ରାଜ୍ୟ ସରକାର ୫ଟି ମାଧ୍ୟମରେ କୋଟି କୋଟି ଟଙ୍କା ଖର୍ଚ୍ଚ କରୁଥିବା ବେଳେ ସଂସ୍କୃତ ଶିକ୍ଷା ପ୍ରତି ବୈମାତୃକ ମନୋଭାବ ଦେଖିବାକୁ ମିଳିଛି । ସଂସ୍କୃତ ଶିକ୍ଷା ପାଇଁ ଅନୁଦାନ ଅଭାବ ସାଙ୍ଗକୁ ଏହାକୁ ଅଣଦେଖା ଯୋଗୁଁ ବେଗୁନିଆପଡା ବ୍ଲକର ଛାତ୍ରଛାତ୍ରୀ ଏହି ଶିକ୍ଷାରୁ ନିବୃତ ହେଉଥିବା ଦେଖିବାକୁ ମିଳୁଛି । ବେଗୁନିଆପଡା ବ୍ଲକରେ ସଂସ୍କୃତ ଶିକ୍ଷା ପାଇଁ ମେଦିନୀପୁର, ତାଳସର ଏବଂ ଖଣ୍ଡିଆନଈରେ ବିଦ୍ୟପୀଠ ରହିଛି । ମାତ୍ର ଏଠାରେ ଭିତ୍ତିଭୂମିର ଅଭାବ ସାଙ୍ଗକୁ ଶିକ୍ଷକ ଅଭାବ କାରଣରୁ ଗତ କିଛିବର୍ଷ ହେଲା ଖଣ୍ଡିଆନଈ ସଂସ୍କୃତ ବିଦ୍ୟାପୀଠରେ ତାଲା ଝୁଲୁଥିବା ବେଳେ ବିପର୍ଯସ୍ଥ ଅବସ୍ଥାରେ ପଡି ରହିଛି ମେଦିନୀପୁର ଏବଂ ତାଳସର ସଂସ୍କୃତ ବିଦ୍ୟାଳୟ ।

୧୯୭୧ ମସିହାରେ ପୂର୍ବତନ ମୁଖ୍ୟମନ୍ତ୍ରୀ ବିଶ୍ଵନାଥ ଦାସ ନିଜ ସମ୍ପର୍କୀୟ ଘରକୁ ମେଦିନୀପୁର ବୁଲିବାକୁ ଆସିଥିବା ବେଳେ ଗ୍ରାମବାସୀଙ୍କ ଅନୁରୋଧ କ୍ରମେ ବିଶ୍ୱନାଥ ସଂସ୍କୃତ ବିଦ୍ୟାପୀଠ ସ୍ଥାପିତ ହୋଇଥିଲା । ସେବେଠାରୁ ଗ୍ରାମର କୋଠଘରେ ଚାଲିଥିଲା ଏହି ବିଦ୍ୟାଳୟ । ପରେ ମେଦିନୀପୁର ପ୍ରାଥମିକ ବିଦ୍ୟାଳୟରେ କିଛି ବର୍ଷ ଚାଲିବା ପରେ ସରପଞ୍ଚଙ୍କ ସହଯୋଗକ୍ରମେ ଏଥିପାଇଁ ଏକ ସ୍ଥାୟୀ ଘର ନିର୍ମାଣ କରାଯାଇଥିଲା । ବର୍ତମାନ ବିଦ୍ୟାଳୟରେ ଷଷ୍ଠ ଏବଂ ସପ୍ତମର ୩୨ ଜଣ ଛାତ୍ରଛାତ୍ରୀ ପଢ଼ୁଥିବା ବେଳେ କୌଣସି ଖେଳ ପଡିଆ, ଶୌଚାଳୟ, କିମ୍ବା ରୋଷେଇ ଘର ଏବଂ ପିଇବା ପାଣିର ବ୍ୟବସ୍ଥା ନାହିଁ । ଚିକିଟି ବ୍ଲକର ଖଜୁରିଆର ସଂସ୍କୃତ ଶିକ୍ଷକ ନୃସିଂହ ନାଥ ପାଢ଼ୀ ଦୀର୍ଘ ୩୨ ବର୍ଷ ଡେପୁଟେସନରେ ଦାୟିତ୍ୱ ସମ୍ଭାଳି ଥିବାବେଳେ ଗତ ଜୁନରେ ସେ ଅବସର ଗ୍ରହଣ କରିଛନ୍ତି । ଆଉ ଏକ ୨୦୧୭ରୁ ପାତ୍ରପୁର ବ୍ଲକର ସମାସିଂ ସଂସ୍କୃତ ବିଦ୍ୟାପୀଠରୁ ଡେପୁଟେସନରେ ଆସିଥିବା ଶ୍ୟାମସୁନ୍ଦର ସାହୁ ଏକାକୀ ବର୍ତ୍ତମାନ ଏହି ସଂସ୍କୃତ ବିଦ୍ୟାପୀଠର ଦାୟିତ୍ୱରେ ଅଛନ୍ତି ।  

ବର୍ତମାନ ସୁଦ୍ଧା ଛାତ୍ରଛାତ୍ରୀଙ୍କ ପାଇଁ ଡ୍ରେସ ପଇସା ଆସିନଥିବାରୁ ଡ୍ରେସ ପାଇନାହାନ୍ତି ଛାତ୍ରଛାତ୍ରୀ । ଏକ ପରିତ୍ୟକ୍ତ ଘରେ ମଧ୍ୟାହ୍ନ ଭୋଜନ ରୋଷେଇ ହୋଇଥିବା ବେଳେ ପିଇବା ପାଣି ପାଇଁ ବାହାରୁ ନଳକୂଅ ଉପରେ ନିର୍ଭର କରୁଛନ୍ତି ସେମାନେ । ତେବେ ସଂସ୍କୃତ ବିଦ୍ୟପୀଠ ହୋଇଥିବା ବେଳେ କେବଳ ଜଣେ ମାତ୍ର କଳା ବିଭାଗର ଶିକ୍ଷକ ଅଛନ୍ତି । ସେହିପରି ତାଳସର ସଂସ୍କୃତ ବିଦ୍ୟାପୀଠ ହାଇସ୍କୁଲର ଏକ ପୁରୁଣା ଘରେ ଚାଲିଛି । ଏଠି ନବମ ଏବଂ ଦଶମର ୨୩ ଜଣ ଛାତ୍ରଛାତ୍ରୀ ପଡୁଥିବା ବେଳେ ୨ ଜଣ କଳା ବିଭାଗର ଶିକ୍ଷକ ଏଠାରେ ରହିଛନ୍ତି । ତେବେ ଉକ୍ତ ବିଦ୍ୟାପୀଠରେ ସଂସ୍କୃତ ଶିକ୍ଷକ ନ ଥିବା କହିଛନ୍ତି ଛାତ୍ରଛାତ୍ରୀ । ଗୁରୁତ୍ବପୂର୍ଣ୍ଣ କଥା ହେଲା ଏଠିବି ବିଦ୍ୟପୀଠର ନିଜସ୍ୱ ଗୃହ ନଥିବା ବେଳେ କୌଣସି ସୁବିଧା ନାହିଁ । ଅପରପକ୍ଷେ ଶିକ୍ଷକ ଅଭାବ ସାଙ୍ଗକୁ ଭିତ୍ତିଭୂମିର ଅଭାବ ଯୋଗୁଁ ଖଣ୍ଡିଆନଈ ସଂସ୍କୃତ ବିଦ୍ୟାପୀଠରେ କିଛିବର୍ଷ ହେଲା କୌଣସି ଛାତ୍ରଛାତ୍ରୀ ନାମ ଲେଖାଇ ନଥିବାରୁ ବିଦ୍ୟାଳୟରେ ବର୍ତମାନ ତାଲା ଝୁଲୁଥିବା ଦେଖିବାକୁ ମିଳିଛି । ବିଦ୍ୟାଳୟର କାଗଜପତ୍ର ଦାୟିତ୍ୱ ମେଦିନୀପୁର ବିଦ୍ୟାପୀଠ ଶିକ୍ଷକଙ୍କ ଅଧୀନରେ ରହିଛି । ଏଣୁ ତୁରନ୍ତ ରାଜ୍ୟସରକାର ଏବଂ ଜିଲ୍ଲା ଶିକ୍ଷା ବିଭାଗ ଦୃଷ୍ଟି ଦେଇ ସଂସ୍କୃତ ବିଦ୍ୟାଳୟକୁ ଚାଲୁ କରିବା ଦିଗରେ କାର୍ଯ୍ୟ କରିବାକୁ ଦାବି କରିଛନ୍ତି ଅଭିଭାବକ ।

ସୂଚନା ଅନୁସାରେ, ଗଞ୍ଜାମ ଜିଲାରେ ୨୮ଟି ସଂସ୍କୃତ ବିଦ୍ୟାପୀଠ ଥିବାବେଳେ ୮୪ଜଣ ଶିକ୍ଷକ ଥିଲେ । ମାତ୍ର ବର୍ତମାନ ୧୬ଟି ବିଦ୍ୟାପୀଠ ବନ୍ଦ ହୋଇ ଆଉ ୧୨ଟି ବିଦ୍ୟପୀଠରେ ମାତ୍ର ୧୫ଜଣ ଶିକ୍ଷକ କାର୍ଯ୍ୟରତ ଅଛନ୍ତି ।

ରିପୋର୍ଟ : ବେଗୁନିଆପଡାରୁ ବାପୁନି କୁମାର ମାଲୁ