କୃଷ୍ଣ ପ୍ରେମରେ ବିମୋହିତ ହୋଇ ନାଚିଲେ ସୁରଙ୍କ ପୁଅ…

ଜଟଣୀ : ଜଟଣୀର ବିଭିନ୍ନ ସ୍ଥାନରେ ମହାଡମ୍ବରରେ ପ୍ରଭୁ ଶ୍ରୀକୃଷ୍ଣଙ୍କ ଜନ୍ମ ଦିବସ ପାଳିତ ହୋଇଯାଇଛି l ଜଟଣୀର ପୁରାତନ ମନ୍ଦିର ଗୋପୀନାଥଙ୍କ ପ୍ରାଙ୍ଗଣରେ ଜନ୍ମାଷ୍ଟମୀ ଉତ୍ସବ ଧୁମଧାମର ସହ ପାଳିତ ହୋଇଛି । ଏହି ଅବସରରେ ସକାଳୁ ବହୁଳ ଭକ୍ତଙ୍କ ସମାଗମ ଦେଖିବାକୁ ମିଳିଥିଲା । ସନ୍ଧ୍ୟା ଆଳତୀ ପରେ ଓଡିଶାର ପ୍ରସିଦ୍ଧ ଭଜନ ଗାୟକଙ୍କଦ୍ୱାରା ଭଜନ ପରିବେଷଣ କରାଯାଇଥିଲା । ସେହିଭଳି କୋଲକାତାରୁ ଆସିଥବା ପ୍ରସିଦ୍ଧ ହିନ୍ଦୀ ଭଜନ ଗାୟକଙ୍କ ଦ୍ୱାରା ରାତି ୧୨ ଘଟିକା ପର୍ଯ୍ୟନ୍ତ ଭଜନ ସମାରୋହ ଆୟୋଜିତ ହୋଇଥିଲା l 

ଜଟଣୀ ଆନ୍ଧ୍ରା ବ୍ୟାଙ୍କରେ ଥିବା ଶ୍ରୀ ଶ୍ରୀ ସିଦ୍ଧମହାବୀରଙ୍କ ପ୍ରାଙ୍ଗଣରେ ମଧ୍ୟ ୧୨ ତମ ଜନ୍ମାଷ୍ଟମୀ ଉତ୍ସବ ପାଳିତ ହୋଇଯାଇଛି । ଏଥିରେ ଭକ୍ତଙ୍କ ପାଇଁ ସାସ୍କୃତିକ କାର୍ଯ୍ୟକ୍ରମର ଆୟୋଜନ କରାଯାଇଥିଲା l ଅପରପକ୍ଷେ ଜଟଣୀ ନାଗରିକ କମିଟି ତରଫରୁ ଶ୍ରୀବତ୍ସ ପାଠାଗାର ପରିସରରେ ଜନ୍ମାଷ୍ଟମୀ ଉତ୍ସବ ପାଳନ କରାଯାଇଛି I ପୁରୁଣା ପ୍ରଥା ତଥା ଦହି ହାଣ୍ଡି ଭାଙ୍ଗିବା, ଦାଣ୍ଡିଆ ନାଚ ଆଦି ପରମ୍ପରାକୁ ବଜାୟ ରଖି ଜଟଣୀ ନାଗରିକ କମିଟିର ସଭାପତି କ୍ୟାପଟେନ ମନ୍ମଥ ରାଉତରାୟଙ୍କ ନେତୃତ୍ଵରେ ଏହି କାର୍ଯ୍ୟକ୍ରମ ଆୟୋଜିତ ହୋଇଥିଲା ।

ଏହି ଅବସରରେ କୁନି କୁନି ପିଲାମାନେ ଦହିହାଣ୍ଡି ଭାଙ୍ଗିବାର ଦୃଶ୍ୟକୁ ଉପଭୋଗ କରିବା ସହ କ୍ୟାପଟେନ ମନ୍ମଥଙ୍କ ସହ ମିଶି ଦାଣ୍ଡିଆ ନାଚି କାର୍ଯ୍ୟକ୍ରମକୁ ଉପଭୋଗ କରିଥିଲେ । କାର୍ଯ୍ୟକ୍ରମରେ ଜଟଣୀ ଓ ଏହାର ଆଖପାଖ ଅଂଚଳର ବହୁ କୃଷ୍ଣ ପ୍ରେମୀଙ୍କ ଭିଡ଼ ଦେଖିବାକୁ ମିଳିଥିଲା l

ରିପୋର୍ଟ : ଜଟଣୀରୁ ପ୍ରଶାନ୍ତ କୁମାର ସାହୁ