ଚହଳ ପକାଇଛି ପଦୁଗୁଡା ଗାଁ ସମସ୍ୟା …
କୋରାପୁଟ : ସ୍ବାଧୀନତା ଦିବସରେ କୁନି କଳାକାର ସୋନାଲି ଦାସ ଆଣିଥିବା ଗାଁ ସମସ୍ୟାକୁ ଏବେ ଗୁରୁତର ସହ ନେଇଛନ୍ତି ଜିଲ୍ଲା ପ୍ରଶାସନ । କୁନି ସୋନାଲିର କେଇ ପଦ କଥାକୁ ଶୁଣି ସମସ୍ତେ ଖୁସି ହୋଇଥିଲେ । ହେଲେ ତା କଥାର ଗମ୍ଭୀରତାକୁ ନେଇ ସାରା ରାଜ୍ୟରେ ଚହଳ ପଡିଥିଲା । ଏହାପରେ ରାଜନୀତିକ ବୟାନବାଜି ପରେ ସ୍ଥିତି ପରଖିଛନ୍ତି ଜନ ପ୍ରତିନିଧି ଏବଂ ଜିଲ୍ଲା ପ୍ରଶାସନ । ସାମାଜିକ ଗଣମାଧ୍ୟମରେ ସୋନାଲି ଦାସଙ୍କ ଭିଡିଓ ଭାଇରାଲ ହେବା ପରେ ରାଜ୍ୟର ସ୍ଥିତିକୁ ନେଇ ପ୍ରଶ୍ନ ଉଠାଇଥିଲେ ସାଧାରଣ ଜନତା । ଏ ନେଇ ଜିଲ୍ଲାପାଳ ସଙ୍ଗେ ସଙ୍ଗେ କୁନି କଳାକାରର ଅଭିଯୋଗକୁ ଗୁରୁତର ଭାବେ ଗ୍ରହଣ କରି ଦଶମନ୍ତପୁର ବ୍ଲକ ବିଡ଼ିଓ ଡମ୍ବରୁଧର ମଲ୍ଲିକଙ୍କୁ ନିର୍ଦ୍ଦେଶ ଦେବାରୁ ସେ ପଦୁଗୁଡ଼ା ଯାଇ ସ୍ଥିତି ପରଖିଛନ୍ତି । ଏପରିକି ସ୍ଥାନୀୟ ଯୁବ ବିଜେଡି ବିଧାୟକ ପ୍ରଭୁ ଜାନି ମଧ୍ୟ ଲୋକଙ୍କ ନିକଟକୁ ଯାଇ ପ୍ରତିଶ୍ରୁତି ଦେଇଥିଲେ ସୁଦ୍ଧା ବିଧାୟକଙ୍କ କଥାକୁ ପଦୁଗୁଡ଼ା ଗ୍ରାମବାସୀ ବିଶ୍ଵାସ କରୁନଥିବା ଜଣାପଡିଛି ।
ପୂର୍ବରୁ ସରକାର ଏ ନେଇ ଅନେକ ପ୍ରତିଶ୍ରୁତି ଦେଇଥିଲେ ସୁଦ୍ଧା ତାହା ଆଜି ପର୍ଯ୍ୟନ୍ତ ପୂରଣ ହୋଇପାରିଲା ନାହିଁ । ଆଜି ଯାଏଁ ବି ଲୋକେ ମୌଳିକ ସୁବିଧାରୁ ବଞ୍ଚିତ । ଏପରିକି କୋରାପୁଟ ଜିଲ୍ଲା କଂଗ୍ରେସ କମିଟି ତରଫରୁ ପଦୁଗୁଡ଼ା ଯାଇ ସ୍ଥିତି ପରଖିଛନ୍ତି କର୍ମୀ । ଏହି ସମୟରେ କଂଗ୍ରେସ କର୍ମୀ ସ୍ଥାନୀୟ ବିଧାୟକ, ବ୍ଲକ ପ୍ରଶାସନ ଏବଂ ଜିଲ୍ଲା ପ୍ରଶାସନକୁ ଦାୟୀ କରିବା ସହ ତାଙ୍କୁ ଭର୍ତ୍ସନା କରିଛନ୍ତି । ତେବେ କଂଗ୍ରେସ ପଦୁଗୁଡ଼ାର ସ୍ଥିତି ପରଖିବା ପରେ ଜିଲ୍ଲାପାଳ ଓ ପ୍ରଶାସନିକ ଅଧିକାରୀଙ୍କ ସହ ଆଲୋଚନା କରି ପଦୁଗୁଡ଼ା ଗ୍ରାମବାସୀଙ୍କ ମୌଳିକ ସମସ୍ୟାର ସମାଧାନ ଦିଗରେ କାର୍ଯ୍ୟ କରିବାତକୁ ଦାବି କରିଛନ୍ତି । ଯଦି ସମୟସୀମା ଭିତରେ ସେମାନଙ୍କ ଦାବି ପୂରଣ ନ ହୁଏ ତେବେ ବିଡ଼ିଓ କର୍ଯ୍ୟାଳୟ ଓ ଜିଲ୍ଲାପାଳଙ୍କ କାର୍ଯ୍ୟାଳୟ ସମ୍ମୁଖରେ ଧାରଣା ଦେବେ ବୋଲି କହିଛନ୍ତି ଜିଲ୍ଲା କଂଗ୍ରେସ ସଭାପତି ଦୁର୍ଗା ଶଙ୍କର ସାହୁ, ପୂର୍ବତନ ବିଧାୟକ ନିମାଇଁ ସରକାର, ସାଂସଦ ପ୍ରତିନିଧି ରାଜେନ୍ଦ୍ର ହୁଇକା, ପୂର୍ବତନ ପଞ୍ଚାୟତ ସମିତି ଅଧ୍ୟକ୍ଷ ନାରାୟଣ ବିଷୋୟୀ । ଏହି ଅବସରରେ ପଦୁଗୁଡ଼ା ଗ୍ରାମର ଛାତ୍ରଛାତ୍ରୀଙ୍କୁ କଂଗ୍ରେସ ଦଳ ତରଫରୁ ଖାତା ଓ କଲମ ବଣ୍ଟନ କରାଯାଇଥିଲା ।
ସୂଚନା ଅନୁସାରେ, କୋରାପୁଟ ଜିଲ୍ଲା ଉପାନ୍ତ ବ୍ଲକ ଦଶମନ୍ତପୁର ବ୍ଲକର ଲୁଲ୍ଲା ପଞ୍ଚାୟତର ପଦୁଗୁଡ଼ା ଗ୍ରାମର କୁନି କଳାକାର ସୋନାଲି ଦାସ ଗତ ସ୍ବାଧୀନତା ଦିବସ ଅବସରରେ ଅଭିନୟ ମାଧ୍ୟମରେ ପଦୁଗୁଡା ଗ୍ରାମର ସମସ୍ୟା ବାବଦରେ କହିଥିଲେ । କୋରାପୁଟ ଜିଲ୍ଲା ସଦର ମହକୁମାରେ ଆୟୋଜିତ ଏହି ସଭାରେ ରାଜ୍ୟ ସରକାରଙ୍କ କୃଷି ମନ୍ତ୍ରୀଙ୍କ ସହ ଜିଲ୍ଲା ପ୍ରଶାସନିକ ଅଧିକାରୀ ପ୍ରମୁଖ ଯୋଗ ଦେଇଥିଲେ । ଏଥିରେ କୁନି କଳାକାର ସୋନାଲିଙ୍କ ଅଭିନୟ ଜିଲ୍ଲାର ବାସ୍ତବ ଚିତ୍ରକୁ ପ୍ରକାଶ କରିବା ସହ ସମଗ୍ର ଓଡ଼ିଶାରେ ଚହଳ ପକାଇଥିଲା ।
ରିପୋର୍ଟ : କୋରାପୁଟର ଦଶମନ୍ତପୁରରୁ ସଞ୍ଜୟ କୁମାର ପାଣି
