ଆଇଡି କାର୍ଡ ନାମରେ ସରକାରୀ ସ୍କୁଲରେ ପଇସା ଆଦାୟ କରୁଛନ୍ତି ପ୍ରଧାନଶିକ୍ଷକ…

ଓଡାପଡା : ସରକାର ପିଲାଙ୍କ ଶିକ୍ଷା ପାଇଁ ସ୍ମାର୍ଟ କ୍ଲାସ ରୁମ୍ ସାଙ୍ଗକୁ, ମାଗଣା ବହି, ଖାତା, ପୋଷାକ ସହ ମଧ୍ୟାହ୍ନ ଭୋଜନ ପ୍ରଦାନ କରୁଛନ୍ତି । ଏଥିପାଇଁ ସରକାରୀ ପାଣ୍ଠିରୁ କୋଟି କୋଟି ଟଙ୍କାର ବ୍ୟୟ ଅଟକଳ ପ୍ରସ୍ତୁତ ହେଉଛି । ତେବେ ସାମାନ୍ୟ ଆଇଡି କାର୍ଡ ପାଇଁ ସରକାରୀ ଖର୍ଚ୍ଚ କହି ପିଲାଙ୍କଠାରୁ ୩୫ ଟଙ୍କା ଆଦାୟ କରିବା ଘଟଣା ଏବେ ଚର୍ଚ୍ଚାର ବିଷୟ ପାଲଟିଛି । ଏପରିକି ଏହି ଗୁମର ଖୋଲିଥିବା ଦୁର୍ଗା ସାରଙ୍କ ନାମରେ ବିଦ୍ୟାଳୟ କର୍ତ୍ତୁପକ୍ଷ ଉପରିସ୍ଥ ଅଧିକାରୀଙ୍କ ନିକଟରେ ଅଭିଯୋଗ କରିବା ସହ ତାଙ୍କୁ ଧମକ ଦେଉଥିବା କଥା କହିଛନ୍ତି ଅଭିଭାବକ । ବର୍ତ୍ତମାନ ଦୁର୍ଗା ସାରଙ୍କୁ ଅନ୍ୟତ୍ର ବଦଳି କରାଯାଇଛି । ତେବେ ଜଣେ ଛାତ୍ରବତ୍ସଳ ଶିକ୍ଷକ ଏମିତି କଣ ଭୁଲ କଲେ ଯେ, ତାଙ୍କୁ ବଦଳି କରାଯାଇଛି ବୋଲି ପ୍ରଶ୍ନ ଉଠାଇଛନ୍ତି ଛାତ୍ରଛାତ୍ରୀ, ଅଭିଭାବକ ତଥା ସ୍ଥାନୀୟ ଜନତା । ଏ ଦୃଶ୍ୟ ହେଉଛି ଢେଙ୍କାନାଳ ଜିଲ୍ଲା ଓଡାପଡା ବ୍ଲକ ସଦାଶିବପୁର ଗ୍ରାମପଂଚାୟତ ଅନ୍ତର୍ଗତ ସର୍ଦ୍ଦାର ପଟେଲ ସରକାରୀ ଉଚ୍ଚ ପ୍ରାଥମିକ ବିଦ୍ୟାଳୟର ଦୃଶ୍ୟ ।

ସଭିଏଁ ପଢନ୍ତୁ ସଭିଏଁ ବଢନ୍ତୁ । ରାଜ୍ୟ ସରକାର ଶିକ୍ଷା ବ୍ୟବସ୍ଥାକୁ ଗମ୍ଭୀରତାର ସହ ଗ୍ରହଣ କରି ସମସ୍ତଙ୍କୁ ଶିକ୍ଷା ପ୍ରଦାନ ଦିଗରେ କାର୍ଯ୍ୟ କରୁଛନ୍ତି । ଏଥିପାଇଁ ବିଭିନ୍ନ ଯୋଜନାମାନ ମଧ୍ୟ ପ୍ରଣୟନ କରୁଛନ୍ତି । ଏପରିକି ପିଲାମାନେ କିଭଳି ସରକାରୀ ସ୍କୁଲ ମୁହାଁ ହେବେ ସେ ନେଇ ଉନ୍ନତ ବ୍ୟବସ୍ଥା ଗ୍ରହଣ କରୁଛନ୍ତି । ତେବେ ଅଭିଭାବକ ତଥା ବିଦ୍ୟାଳୟ କମିଟିର ଅଜଣାତରେ ପିଲାଙ୍କଠାରୁ ଟଙ୍କା ଆଦାୟ ହେଉଛି । ସାମାନ୍ୟ ଆଇଡି କାର୍ଡ ତିଆରି ପାଇଁ ପିଲାଙ୍କଠାରୁ ନେଉଛନ୍ତି ୩୫ ଟଙ୍କା । ଯାହାର କୌଣସି ନିୟମ ନାହିଁ । ତେବେ ଏହି ଟଙ୍କା ଆଦାୟ ପାଇଁ ପ୍ରଧାନ ଶିକ୍ଷକଙ୍କୁ କିଏ ଅନୁମତି ଦେଲେ ତାହା ଏବେ ବଡ ପ୍ରଶ୍ନବାଚୀ ସୃଷ୍ଟି କରିଛି । ଆଉ ଏ ବାବାଦରେ ଯେତେବେଳେ ଦୁର୍ଗା ସାର୍ ଗୁମର ଖୋଲିଲେ, ଏଥିପାଇଁ ତାଙ୍କୁ ଦଣ୍ଡିତ ହେବାକୁ ପଡିଛି ବୋଲି କହିଛନ୍ତି ଅଭିଭାବକ ।

ଦୁର୍ଗା ସାରଙ୍କ ପ୍ରତି ଥିବା ସ୍ନେହ ଏବଂ ଭଲ ପାଇବା ବୟାନ କରୁଛି ତାଙ୍କର ବ୍ୟକ୍ତିଗତ ସ୍ୱରୂପ । ତେଣୁ ପ୍ରଶାସନ ଏହି ଘଟଣାକୁ ଗମ୍ଭୀରତାର ସହ ଗ୍ରହଣ କରି ଦୋଷୀଙ୍କ ବିରୋଧରେ ଦୃଢ କାର୍ଯ୍ୟାନୁଷ୍ଠାନ ଦାବି ହୋଇଛି । ନଚେତ୍ ଆଗାମୀ ଦିନରେ ସରକାରୀ ବିଧି ବ୍ୟବସ୍ଥା ଏକ ପ୍ରହସନ ପାଲଟିବା ସହ ଜନତାଙ୍କ ଆସ୍ଥା ହରାଇବ ବୋଲି ବୁଦ୍ଧିଜୀବୀ ମହଲରେ ଚର୍ଚ୍ଚା ହେଉଛି ।

ଋିପୋର୍ଟ : ଓଡାପଡାରୁ ଗୋପବନ୍ଧୁ ବାରିକଙ୍କ ରିପୋର୍ଟ