ଭତ୍ତା ପଇସା ବଢାଓ ନ ହେଲେ ଭୋଟ ଦେବୁନି…

ନୂଆପଡ଼ା : ବଜାର ଦର ବଢୁଛି, ହେଲେ ଆମକୁ ମିଳୁଛି ମାତ୍ର ପାଞ୍ଚ ଶହ ଟଙ୍କା । ଏଇ ପାଞ୍ଚଶହ ଟଙ୍କାରେ କିଏ ମାସ ପର୍ଯ୍ୟନ୍ତ ଚଳିବ । ଚିନି ଚା କିଣିବା ବେଳକୁ ତ ସବୁ ସରିଯାଉଛି । ଆଉ ରହୁଛି କଣ ଯେ ଆମେ ଚଳିବୁ । ଭତ୍ତା ପଇସା ବଢାଓ ନ ହେଲେ ଭୋଟ ଦେବୁନି । ଏଭଳି ଦାବି କରିଛନ୍ତି ନୂଆପଡ଼ା ଜିଲ୍ଲା ବୋଡ଼େନ ବ୍ଲକ ଲର୍କା ଗ୍ରାମରବାସିନ୍ଦା । ଏ ନେଇ ଆଜି ନାଗରିକ ଅଧିକାର ଚାରିଟେବୁଲ ଟ୍ରଷ୍ଟ ଖଡିଆଲର ନୂଆପଡ଼ା ଜିଲ୍ଲା ସଭାପତି ଭ୍ରମର ବାଗ ଓ ତାଙ୍କ ସହଯୋଗୀଙ୍କ ନେତୃତ୍ଵରେ ସାମାଜିକ ମଙ୍ଗଳ ଯୋଜନାରେ ମିଳୁଥିବା ଭତ୍ତା ବୃଦ୍ଧି ଓ ଅନ୍ୟାନ୍ୟ ଦାବି ନେଇ ଏକ ବିଶାଳ ରାଲି କରିଛନ୍ତି ଶତାଧିକ ବୃଦ୍ଧବୃଦ୍ଧା । ଏହି ଅବସରରେ ସେମାନେ ଲର୍କା ଗ୍ରାମପଞ୍ଚାୟତ ସରପଞ୍ଚ ଜୟଶ୍ରୀ ପଟେଲଙ୍କ ଜରିଆରେ ମୁଖ୍ୟମନ୍ତ୍ରୀଙ୍କୁ ପାଞ୍ଚ ଦଫା ସମ୍ବଳିତ ଦାବିପତ୍ର ପ୍ରଦାନ କରିଛନ୍ତି ।

ଓଡ଼ିଶାରେ ବୃଦ୍ଧବୃଦ୍ଧା, ବିଧବା, ଦିବ୍ୟାଙ୍ଗ ଆଦି ଅସହାୟ ବ୍ୟକ୍ତିଙ୍କୁ ସରକାର ମାସିକ ପାଞ୍ଚ ଶହ ଟଙ୍କା ପ୍ରଦାନ କରୁଛନ୍ତି । ଯାହାକି ସମୁଦ୍ରକୁ ଶଙ୍ଖେ । ଏହି ଟଙ୍କା ହୁ ହୁ ହୋଇ ବଢୁଥିବା ଦରଦାମ୍ ସାଙ୍ଗକୁ ବାର୍ଦ୍ଧକ୍ୟଜନିତ ରୋଗ, ସେମାନଙ୍କ ମୌଳିକ ଆବଶ୍ୟକତାକୁ ପୂରଣ କରିବାରେ ଅକ୍ଷମ । ଭାରତର ଅନ୍ୟାନ୍ୟ ରାଜ୍ୟରେ ମାସିକ ଭତ୍ତା ୨୫ ଶହରୁ ଚାରି ହଜାର ଟଙ୍କା ପର୍ଯ୍ୟନ୍ତ ମିଳୁଥିବା ବେଳେ ଓଡ଼ିଶାରେ ମାତ୍ର ପାଞ୍ଚ ଶହ ଟଙ୍କା ମିଳୁଛି । ଏଣୁ ଅତି କମରେ ୪ ହଜାର ୮ ଶହ ୯୦ ଟଙ୍କା ଦେବାପାଇଁ ଦାବି କରିଛନ୍ତି ଆନ୍ଦୋଳନକାରୀ । ସେହିପରି ବ୍ୟାଙ୍କରେ ଭତ୍ତା ଦିଆ ଯାଉଥିବାରୁ ସେମାନେ ଯିବାଆସିବାରେ ସମସ୍ୟା ଭୋଗିବା ସହ ନିୟମିତ ଭତ୍ତା ପାଉ ନାହାଁନ୍ତି । ଏଣୁ ପୂର୍ବପରି ହାତେ ହାତେ ଭତ୍ତା ଦିଆଯାଉ ବୋଲି ଦାବି କରାଯାଇଛି ।

ନୂଆପଡା ଜିଲ୍ଲା ଏକ ଦାଦନ ପ୍ରବଣ ଜିଲ୍ଲା ହୋଇଥିବାରୁ ଅନେକ ଗରିବ ପରିବାର ନିଜର ବୟସ୍କ ଶାଶୁ ଶ୍ୱଶୁରଙ୍କୁ ଛାଡି ବାହାର ରାଜ୍ୟକୁ କାମ କରିବାକୁ ଯାଇଥାନ୍ତି । ଫଳରେ ଘରେ ଥିବା ବୃଦ୍ଧବୃଦ୍ଧା ବହୁତ କଷ୍ଟରେ କାଳ କାଟିଥାନ୍ତି । ସେମାନଙ୍କ ପାଇଁ ପ୍ରତି ପଞ୍ଚାୟତରେ ଋତୁକାଳୀନ ଜରାଶ୍ରମ ପ୍ରତିଷ୍ଠା କରିବାକୁ ଦାବି କରାଯାଇଛି । ରାଜ୍ୟ ସରକାର ବରିଷ୍ଠ ନାଗରିକଙ୍କ ପାଇଁ ତୀର୍ଥଯାତ୍ରାର ବ୍ୟବସ୍ଥା କରିଛନ୍ତି କିନ୍ତୁ ସୂଚନା ତଥା ସଚେତନତା ଅଭାବରୁ ଅନେକ ବ୍ୟକ୍ତି ତୀର୍ଥ ଯାଇ ପାରୁ ନାହାନ୍ତି । ଏଣୁ ପ୍ରତିବର୍ଷ ପ୍ରତି ବ୍ଲକରୁ ପାଞ୍ଚଟି ବସର ବ୍ୟବସ୍ଥା କରିବା ସହ ଅନ୍ୟାନ୍ୟ ଯୋଜନା କାର୍ଯ୍ୟକାରୀ କରିବାକୁ ଦାବିପତ୍ରରେ ଉଲ୍ଲେଖ କରାଯାଇଛି ।

ରିପୋର୍ଟ : ନୂଆପଡ଼ାରୁ କୀର୍ତ୍ତି ଚନ୍ଦ୍ର ନାଗ