ପୋଲିସ ବି ହୋଇପାରେ ଜନତାଙ୍କ ଦରଦୀ ବନ୍ଧୁ !

କୋଟପାଡ଼ : ଥାନା ଅଧିକାରୀ ହେବ ତ ଏମିତି । ଥାନା ବାବୁଙ୍କ ଅନ୍ୟତ୍ର ବଦଳି ହେବା ଖବର ଶୁଣି ତାଙ୍କ ପାଖକୁ ଧାଇଁ ଆସିଛନ୍ତି ଅଞ୍ଚଳବାସୀ । ଥାନାବାବୁଙ୍କ ଉତ୍ତୋରତ୍ତର ଉନ୍ନତି କାମନା କରିବା ସହିତ ତାଙ୍କୁ ଧନ୍ୟବାଦ ଜଣାଇଛନ୍ତି ଅଞ୍ଚଳବାସୀ । ଏ ହେଉଛନ୍ତି ଥାନା ଅଧିକାରୀ ସେସଦେବ ବେହେରା । କୋରାପୁଟ ଜିଲ୍ଲା କୋଟପାଡ଼ ଥାନାରେ ଦୀର୍ଘ ତିନି ବର୍ଷ ହେବ ସେ ସେବା ଯୋଗେଇ ଆସୁଥିଲେ । ମାତ୍ର ତିନି ବର୍ଷର ସେବାରେ ସେ ଉକ୍ତ ଅଞ୍ଚଳର ଜନସାଧାରଣଙ୍କ ପାଇଁ ପାଲଟିଯାଇଥିଲେ ଦରଦୀ ବନ୍ଧୁ । କୋଟପାଡ଼ ଥାନା ଅଧିକାରୀ ହୋଇ ଆସିବା ପରଠୁ କୋଟପାଡ଼ ଅଞ୍ଚଳବାସୀ, ଥାନା କର୍ମଚାରୀ, ଜନ ପ୍ରତିନିଧି ଏବଂ ଗଣମାଧ୍ୟମଙ୍କ ବେଶ ପ୍ରଶଂସାର ପାତ୍ର ହୋଇପାରିଥିଲେ ସେସଦେବ ବେହେରା ।

ଶ୍ରୀ ବେହେରାଙ୍କ କାର୍ଯ୍ୟକାଳରେ କୋଟପାଡ଼ ଅଞ୍ଚଳରେ ଉତ୍ତମ ଆଇନ ଶୃଙ୍ଖଳା ବ୍ୟବସ୍ଥା ପରିଲକ୍ଷିତ ହୋଇଛି l ତାଙ୍କ ଉତ୍ତମ ବ୍ୟବହାର ଓ ନିଃସ୍ବାର୍ଥପର ସେବା ତାଙ୍କୁ ଜନମାନସରେ ବେଶ୍ ପ୍ରଶଂସିତ କରିଛି । ଏପିରିକି ପୋଲିସକୁ ନେଇ ଲୋକଙ୍କ ମନରେ ଯେଉଁ ନାକାରତ୍ମକ ଭାବନା ଥାଏ, ତାକୁ ସେ ଦୂର କରିବା ସହିତ ଓଡିଶା ପୋଲିସ ଏବଂ ରାଜ୍ୟ ସରକାରଙ୍କ ମୋ ସରକାର ବ୍ୟବସ୍ଥା ଉପରେ ବିଶ୍ୱାସ ବାନ୍ଧିବାରେ ସହାୟକ ହୋଇଥିଲା । ତାଙ୍କ କାର୍ଯ୍ୟକାଳରେ ଚୋରୀ, ଡକାୟତି, ହତ୍ୟା ଭଳି ବିଭିନ୍ନ ଅପରାଧରେ ଜଡିତ ଦୁର୍ଦ୍ଦାନ୍ତ ଗ୍ୟାଙ୍ଗ ଓ ଅପରାଧି ପୋଲିସ କବଜାରୁ ବର୍ତ୍ତିନାହାନ୍ତି । ତେବେ ତାଙ୍କ ବଦଳି ଖବର ସାମ୍ନାକୁ ଆସିବା ପରେ କୋଟପାଡ଼ ଥାନା ଆଞ୍ଚଳବାସୀ, ବୁଦ୍ଧିଜୀବୀ ଏବଂ କର୍ମଚାରୀଙ୍କ ମନରେ ଭାବବିହ୍ବଳତା ଦେଖିବାକୁ ମିଳିଛି ।

ଏ ନେଇ ସେସଦେବ ବେହେରାଙ୍କୁ ବିଦାୟକାଳୀନ ସମ୍ବର୍ଦ୍ଧନା ଜଣାଇଛନ୍ତି କୋଟପାଡ଼ ଅଞ୍ଚଳବାସୀ, ଜନପ୍ରତିନିଧି, ଗଣମାଧ୍ୟମ ପ୍ରତିନିଧି ଓ ସରକାରୀ କର୍ମଚାରୀ ପ୍ରମୁଖ । ଏହାସହ କୋରାପୁଟ ଜିଲ୍ଲା ଡ୍ରାଇଭର ମହାସଙ୍ଘ ମଧ୍ୟ ଏହି ଦକ୍ଷ ଅଧିକାରୀଙ୍କୁ ଭାବପୂର୍ଣ୍ଣ ସମ୍ବର୍ଦ୍ଧନା ଦେଇଛନ୍ତି ।

ସତରେ ପୋଲିସ ଯେ, ଲୋକଙ୍କ ଦରଦୀ ବନ୍ଧୁ ହୋଇପାରେ ତାକୁ ସଠିକ୍ ଢଙ୍ଗରେ ପ୍ରମାଣିତ କରିବାରେ ସଫଳ ହୋଇଛନ୍ତି ସେସଦେବ ବେହେରା । ଆଶା ତାଙ୍କର ଏଭଳି ମାନବ ମୂଲ୍ୟବୋଧକୁ ଅନୁଭବ କରିପାରୁଥିବା କର୍ମଠ ଏବଂ ସାଧୁ ଅଧିକାରୀ ଅଞ୍ଚଳ ପାଇଁ ଉଦାହରଣ ପାଲଟିବେ ।

ରିପୋର୍ଟ : କୋଟପାଡ଼ରୁ ସୁନୀଲ ଦାଶ