ସୁର ଭାଇ କହିଲେ ମାଡିଚାଲ, ଲୋକ ବି ମାଡିଗଲେ…

ଜଟଣୀ : ସୁରନନା ନଡିଆ ବାଡେଇଥିଲେ । ଆଉ ଶେଷରେ ତାଙ୍କର ମାଡିଚାଲ ଆହ୍ୱାନରେ ଲୋକ ବି ମାଡିଗଲେ । ଲଗାଣ ବର୍ଷାରେ ଜଟଣୀ ଅଣ୍ଡରଗ୍ରାଉଣ୍ଡ ଜଳମଗ୍ନ ହୋଇଯାଇଥିଲା । ବର୍ଷ ବର୍ଷ ଧରି ଲୋକେ ଯେଉଁ ସମସ୍ୟା ଭୋଗୁଥିଲେ, ତାର ଅନ୍ତ ହେଲା ଭାବି ନିର୍ମାଣଧୀନ ନୂଆ ବ୍ରିଜର ବାଡ ଭାଙ୍ଗି ମାଡିଗଲେ । ଏ ଦୃଶ୍ୟ ଦେଖନ୍ତୁ । ବ୍ରିଜ୍ ନିର୍ମାଣ କାମ ସମ୍ପୂର୍ଣ୍ଣ ସରିନାହିଁ । ହେଲେ କିଛିଦିନ ପୂର୍ବରୁ ବ୍ରିଜ ନିକଟରେ ନିଜ ସମର୍ଥକଙ୍କ ସହ ମିଶି ନଡିଆ ବାଡେଇ ବ୍ରିଜ୍ ଉଦଘାଟନ କରିଥିଲେ ଜଟଣୀ ବିଧାୟକ ସୁର ରାଉତରାୟ । ଯାହାକୁ ନେଇ ରାଜନୈତିକ ମହଲରେ ତାଙ୍କୁ ସମାଲୋଚନା ମଧ୍ୟ କରାଯାଇଥିଲା । ଏପରିକି ଯଦି ଆଗାମୀ ଦିନରେ ବ୍ରିଜ ଉପରେ କିଛି ଦୁର୍ଘଟଣା ଦୁଏ ତେବେ ଏଥିପ୍ରତି ଜଟଣୀ ପୌରପ୍ରଶାସନ ଦାୟୀ ରହିବନି ବୋଲି ରୋକଠୋକ୍ କହିଥିଲେ ଜଟଣୀ ପୌରାଧ୍ୟକ୍ଷ ଅନନ୍ତ ବେହେରା । ଏଭଳିସ୍ଥଳେ ବ୍ରିଜ୍ ଉପରେ ଯାତାୟତକୁ ନେଇ ଏବେ ବୁଦ୍ଧିଜୀବୀ ମହଲରେ ଚର୍ଚ୍ଚା ଜୋର ଧରିଛି ।

୨୦୧୬ ରୁ ଆରମ୍ଭ ହୋଇଥିଲା ଜଟଣୀ ଫ୍ଲାଏ ଓଭର ବ୍ରିଜର ନିର୍ମାଣ କାର୍ଯ୍ୟ । ନିର୍ମାଣ ବିଭାଗ ପକ୍ଷରୁ ଜୁଲାଇ ୧୫, ୨୦୨୩ ତାରିଖ ସୁଦ୍ଧା କାର୍ଯ୍ୟ ସମାପ୍ତି କରାଯିବ ବୋଲି ବୋର୍ଡ ମରାଯାଇଛି । ଏହାରି ଭିତରେ ଶ୍ରେୟ ନେବାକୁ ଜଟଣୀ ବିଧାୟକ ନଡିଆ ବାଡେଇ ବ୍ରିଜ୍ ମଧ୍ୟ ଉଦଘାଟନ କରିସାରିଛନ୍ତି । ହେଲେ ଦୁଃଖର ବିଷୟ ଆଜି ପର୍ଯ୍ୟନ୍ତ ଜଟଣୀ ଫ୍ଲାଇ ଓଭର୍ ବ୍ରିଜ କାର୍ଯ୍ୟ ସମ୍ପୂର୍ଣ୍ଣ ହୋଇପାରିଲାନାହିଁ । ଦୀର୍ଘ ବର୍ଷର ଦାବି ପରେ ପୁରୀକୁ ସଂଯୋଗ କରୁଥିବା ୯୬୫ ମିଟର ଲମ୍ବା ଏବଂ ୧୧ ମିଟର ଓସାର ବିଶିଷ୍ଟ ଏହି ବ୍ରିଜ ନିର୍ମାଣ ପାଇଁ ଖର୍ଚ୍ଚ ହୋଇଛି ୧୦୪ କୋଟି ଟଙ୍କା । ହେଲେ ଯଥାସମ୍ଭବ ବର୍ଷାଦିନ ପୂର୍ବରୁ ସାରିଲାନି ବ୍ରିଜ ନିର୍ମାଣ କାମ ।

ଅପରପକ୍ଷେ ବର୍ଷାକୁ ଦୃଷ୍ଟିରେ ରଖି ଜଟଣୀ ବିଧାୟକଙ୍କ ଉଦଘାଟନ ପଦକ୍ଷେପ ସ୍ବାଗତଯୋଗ୍ୟ । ମାତ୍ର ଅସମ୍ପୂର୍ଣ୍ଣ ବ୍ରିଜ୍ ଉପରେ ଯଦି କିଛି ଅଘଟଣ ଘଟେ ତେବେ ଏଥିପାଇଁ ଦାୟୀ କିଏ ରହିବ ବୋଲି ଜନସାଧାରଣଙ୍କ ମନରେ ପ୍ରଶ୍ନ ଜୋର ଧରିଛି । ଏପଟେ ପ୍ରଶାସନ ପକ୍ଷରୁ ସଚେତନତାର ଅଭାବ କାରଣରୁ ଆଗକୁ ସମସ୍ୟା ହୋଇପାରେ ବୋଲି ବୁଦ୍ଧିଜୀବୀ ମହଲରେ ଚର୍ଚ୍ଚା ଜୋର ଧରିଛି ।

ରିପୋର୍ଟ : ଜଟଣୀରୁ ପ୍ରଶାନ୍ତ କୁମାର ସାହୁ