କାଜଲ ପାଇଁ ପୁଣି ଦେବଦୂତ ସାଜିଲେ ସମାଜସେବୀକା ମୀରା ବାଇ ଦେଓ

ବେଗୁନିଆପଡା : ବୟସ ମାତ୍ର ୧୬ ବର୍ଷ, ହେଲେ ବଞ୍ଚିବା ପାଇଁ ରାହା ଖୋଜୁଛନ୍ତି କାଜଲ । ବେଗୁନିଆପଡା ବ୍ଲକ ଅନ୍ତର୍ଗତ କୁମ୍ଭାରଗାଁ ଗ୍ରାମ ପଞ୍ଚାୟତର କୁମାରିପାରୀ ଗ୍ରାମର ଭିକା ପଲେଇଙ୍କ ସାନ ଝିଅ କାଜଲ ପଲେଇ । ଦୀର୍ଘ ଛଅ ମାସ ଧରି ସେ କର୍କଟ ରୋଗରେ ପୀଡିତ ହୋଇ ନାନା ଯନ୍ତ୍ରଣାର ଶିକାର ହୋଇଆସୁଛନ୍ତି । ଚାଷୀ ପରିବାରରେ ଜନ୍ମିତ କାଜଲ ଏବଂ ତାଙ୍କ ପରିବାର ମେଡିକାଲ ଦୌଡ଼ି ଦୌଡ଼ି ନୟାନ୍ତ ହୋଇଗଲେଣି । ପାଖରେ ଯାହା କିଛି ସଞ୍ଚିଥିଲେ ସବୁ ସରିଗଲାଣି । ଏଭଳି ସ୍ଥଳେ ଝିଅର ଉନ୍ନତ ଚିକିତ୍ସା ପାଇଁ ସରକାରଙ୍କୁ ନେହୁରା ହେଉଛନ୍ତି ପରିବାର ଲୋକ । କାଜଲ ଏବେ କଟକସ୍ଥିତ ଆଚାର୍ଯ୍ୟ ହରିହର କର୍କଟ ହସ୍ପିଟାଲରେ ଚିକିତ୍ସିତ ହେଉଛନ୍ତି ।

ଖବର ପ୍ରସାରଣ ପରେ ସମାଜସେବୀକା ମୀରା ବାଇ ଦେଓ, କାଜଲଙ୍କ ଵାସ ଭାବନରେ ପହଞ୍ଚି ତାଙ୍କୁ ସାହାଯ୍ୟର ହାତ ବଢାଇବା ପାଇଁ ପ୍ରତିଶୃତି ଦେବା ସହ ଏ ନେଇ ସେ ଜିଲ୍ଲାପାଳ ଓ ବେଗୁନିଆପଡା ବିଡିଓଙ୍କୁ ଅବଗତ କରାଇବେ ବୋଲି କହିଛନ୍ତି । ପୂର୍ବରୁ କୋଦଳା ଏନ୍ଏସି ଅଧ୍ୟକ୍ଷ ଏବଂ ରାଜ୍ୟ ବିଜେଡି ସାଧାରଣ ସମ୍ପାଦକ ଓ ବେଗୁନିଆପଡା ବ୍ଲକ ପୂର୍ବତନ ସଭାପତି କାଜଲଙ୍କ ଘରକୁ ଯାଇ ତାଙ୍କୁ ଆର୍ଥିକ ସହାୟତା କରିବା ସହ ସରକାରୀସ୍ତରରେ ଯଥା ସମ୍ଭବ ସାହାଯ୍ୟ ସହଯୋଗ କରିବାକୁ ପ୍ରତିଶ୍ରୁତି ଦେଇଛନ୍ତି ।

ଯଦି କେହି ସହୃଦୟ ବ୍ୟକ୍ତି କାଜଲଙ୍କୁ ସହଯୋଗର ହାତ ବଢାଇବାକୁ ଚାହୁଁଛନ୍ତି ତେବେ ତାଙ୍କ ଯୋଗାଯୋଗ ନମ୍ବର ହେଉଛି- 7894167759

ରିପୋର୍ଟ : ବେଗୁନିଆପଡାରୁ ବାପୁନି କୁମାର ମାଲୁ