ପଟାଝରି ନାଳରେ କୋଡିଏ ଫୁଟର ଘାଇ, କ୍ଷୁଦ୍ର ଜଳସେଚନ ବିଭାଗୀୟ ଅଧିକାରୀଙ୍କୁ ଦାବିପତ୍ର
ବେଗୁନିଆପଡା : କଥାରେ ଅଛି ଚାଷ ତରତର ବଣିଜ ମଠ । ବର୍ଷା ଆଗମନରେ ଚାଷୀ ବାପୁଡ଼ା କେତେ ଜତନରେ ଧାନ ରୁଆ ସାରି ବସିଥିଲା । ହେଲେ ଲଗାଣ ବର୍ଷା ଏବେ ଦାଉ ସାଧିଛି । ଲଗାଣ ବର୍ଷାରେ ଉପର ମୁଣ୍ଡରେ ପାଣି ପଡିବା ଯୋଗୁଁ ପଟାଝରି ନାଳରେ ଘାଇ ସୃଷ୍ଟି ହୋଇ ନାଳ ଭାଙ୍ଗିଯିବା ଫଳରେ ଅନେକ ଫସଲ ନଷ୍ଟ ହୋଇଛି । ଏ ନେଇ ଗଞ୍ଜାମ ଜିଲ୍ଲା ବେଗୁନିଆପଡା ବ୍ଲକ ଅନ୍ତର୍ଗତ ଖଣ୍ଡିଆନଈ ଗ୍ରାମପଞ୍ଚାୟତର ସମୂହ କୃଷକ କମିଟି କ୍ଷୁଦ୍ରଜଳ ସେଚନ ଅଧିକାରୀଙ୍କୁ ଏକ ଦାବିପତ୍ର ଦାଖଲ କରିଛନ୍ତି । ଏଥି ସହିତ ସ୍ଥାନୀୟ ବିଡ଼ିଓଙ୍କୁ ମଧ୍ୟ ଏକ ଦାବିପତ୍ର ପ୍ରଦାନ କରିଛନ୍ତି ।
ସୂଚନା ଅନୁସାରେ, ଖଣ୍ଡିଆନଈ ନିକଟସ୍ଥ ପଟାଝରୀ ନାଳରେ କୋଡିଏ ଫୁଟରେ ଘାଇ ସୃଷ୍ଟି ହୋଇଛି । ବର୍ତ୍ତମାନ କୃଷକଙ୍କର କୃଷି କାର୍ଯ୍ୟ ଚାଲିଥିବା ବେଳେ ଏହି କୋଡିଏ ଫୁଟ ଘାଇ କାରଣରୁ ଏବେ ପ୍ରାୟ ତିରିଶି ଜଣ କୃଷକଙ୍କ ରୁଆ ଜମିରେ ପାଣି ପ୍ରବେଶ କରିବାରୁ ଫସଲ ନଷ୍ଟ ହୋଇଛି । ତେଣୁ ଯୁଦ୍ଧକାଳୀନ ଭିତ୍ତିରେ ଏହାକୁ ଯଦି ମରାମତି କରା ନ ଯାଏ ତେବେ ଶହେ କୃଷକଙ୍କ ରୁଆ ଜମି ପାଣିରେ ବୁଡି ନଷ୍ଟ ହୋଇଯିବ । ଏଣୁ ଏହାର ସ୍ଥୟୀ ସମାଧାନ ପାଇଁ ଦାବି କରିଛନ୍ତି କ୍ଷତିଗ୍ରସ୍ତ କୃଷକ ।
ରିପୋର୍ଟ : ବେଗୁନିଆପଡାରୁ ବାପୁନୁ କୁମାର ମାଲୁ
