ଲୋକଙ୍କୁ ଭୂଆଁ ବୁଲାଇବାକୁ ମିିଛି ମିଛିକା ତଦନ୍ତ କରୁଛନ୍ତି ତହସିଲଦାର…
ସାଲେପୁର : ଆଦର୍ଶ ସ୍କୁଲ ପରିସରରେ କଟା ଯାଇଛି ୫୦ରୁ ଉର୍ଦ୍ଧ୍ବ ମୂଲ୍ୟବାନ ଗଛ । ହେଲେ ଗଛ କାହିଁକି କଟାଗଲା ତାର ଉତ୍ତର କାହା ପାଖରେ ନାହିଁ । ଏପରିକି ମୂଲ୍ୟବାନ ଗଛ କାଟିବା ପାଇଁ ଅନୁମତି ମଧ୍ୟ ମିଳିନଥିବା ଜଣାପଡିଛି । ବୃକ୍ଷ ହିଁ ଜୀବନ ବୋଲି କହି ଆମେ ପିଲାମାନଙ୍କୁ ବୃକ୍ଷରୋପଣର ପାଠ ପଢାଉଥିବାବେଳେ ବିଦ୍ୟାଳୟ ପରିସରରେ ଅନାଶୟରେ ଗଛ କଟାକୁ ନେଇ ଉଠିଛି ପ୍ରଶ୍ନ । ଏଭଳି ଘଟଣା ଦେଖିବାକୁ ମିଳିଛି କଟକ ଜିଲ୍ଲା ମାହାଙ୍ଗା ବ୍ଲକ ଓଷଙ୍ଗ ଗ୍ରାମ ପଞ୍ଚାୟତ ଅନ୍ତର୍ଗତ କୌଡୁକୋଲ ଗ୍ରାମରେ ଥିବା ଆଦର୍ଶ ବିଦ୍ୟାଳୟ ପରିସରରେ । ଆଦର୍ଶ ବିଦ୍ୟାଳୟ କାମ ଚାଲଥିବାବେଳେ ୫୦ରୁ ଉର୍ଦ୍ଧ୍ବ ମୂଲ୍ୟବାନ ଗଛ କଟାଯାଇଛି । ତେବେ ବିନା ଅନୁମତିରେ ଏତେ ଗଛ କାହିଁକି କଟାଗଲା ତାହାର ଉତ୍ତର କାହା ପାଖରେ ନାହିଁ । ଏପରିକି ଏ ନେଇ ସ୍ଥାନୀୟ ସରପଞ୍ଚ, ସ୍କୁଲର ପ୍ରଧାନ ଶିକ୍ଷକ ଓ ମାହାଙ୍ଗା ତହସିଲଦାରଙ୍କ ପାଖରୁ ମିଳିପାରୁ ନାହିଁ ସନ୍ତୋଷ ଜନକ ଉତ୍ତର ।
ଗୋଟେପଟେ ପ୍ରଧାନ ଶିକ୍ଷକ କହୁଛନ୍ତି ଯେ, ସାଧାରଣ ଲୋକ ଗଛ ଗୁଡିକୁ କାଟି ନେଇଯାଇଛନ୍ତି । ଅପରପକ୍ଷେ ଓଷଙ୍ଗ ସରପଞ୍ଚଙ୍କ ପ୍ରତିନିଧି ଆଦର୍ଶ ସ୍କୁଲ ପରିଦର୍ଶନ କରି ଗଛକଟା ସମ୍ପର୍କରେ ସେ ଅବଗତ ନଥିବା କହୁଛନ୍ତି । ଏପଟେ ଆଦର୍ଶ ସ୍କୁଲ ପରିସରରୁ ଗଛକଟା ସମ୍ପର୍କରେ ତହସିଲଦାରଙ୍କୁ ପଚାରିବାରୁ ସେ କହିଛନ୍ତି ଯେ, ସାମ୍ବାଦିକମାନେ ଏଥିରେ ମୁଣ୍ଡ ନପୁରାଇଲେ ଭଲ ହେବ । ଆଉ ସବୁ ସରିବା ପରେ ଅର୍ଥାତ୍ ଗଛ କଟାଯାଇ ବିକ୍ରି ସରିବା ପରେ ଧର୍ମକୁ ଆଖିଠାର ଭଳି ଆରଆଇ ଅଧିକାରୀ ଘଟଣା ସ୍ଥଳରେ ପହଞ୍ଚି ମିଛି ମିଛିକା ତଦନ୍ତ କରୁଥିବା ଘଟଣା ଏବେ ଚର୍ଚ୍ଚାର ବିଷୟ ପାଲଟିଛି ।
ବିଦ୍ୟାଳୟ ପରିସରରେ ଗଛ କଟାଯାଇଛି ଏ କଥା ସତ । ତେବେ ଦେଖିବାକୁ ବାକି ରହିଲା ଏହି ଘଟଣାର ତଦନ୍ତ ପରେ ପ୍ରଶାସନ ପକ୍ଷରୁ ଦୋଷୀଙ୍କୁ ଦଣ୍ଡ ଦିଆଯାଉଛି ନା ତାଙ୍କୁ ଘଣ୍ଟ ଘୋଡାଯାଉଛି ।
ରିପୋର୍ଟ : ସାଲେପୁରରୁ ଅଭୟ ଜେନା
