ଯିଏ ଲୋକଙ୍କୁ ଖୁସି ଦେଉଥିଲେ ତାଙ୍କୁ ଖୁସି କରାଇଲେ ସାମ୍ବାଦିକ ବନ୍ଧୁ

କୋଟପାଡ : ଏ ବ୍ୟକ୍ତି ଜଣକ ହେଉଛନ୍ତି କୁନୁ ମାଳି । ଲୋକେ ୟାଙ୍କୁ ସ୍ନେହରେ କୁନୁ ବୋଲି ଡାକନ୍ତି l କୁନୁ ଜଣେ ଭିନକ୍ଷମ ହୋଇଥିଲେ ମଧ୍ୟ ନିଜେ ସ୍ୱାବଲମ୍ବୀ । ଦୀର୍ଘ ୨୫ ବର୍ଷ ହେଲା ନିରନ୍ତର ସେ ପେପର ହକର ଭାବେ କାର୍ଯ୍ୟରତ l ନିତ୍ୟ ଭୋର ୪ ଟାରୁ ଉଠି ନିଜ ଭଙ୍ଗା ସାଇକେଲରେ ଫୁଲ ସଂଗ୍ରହ କରନ୍ତି ଏବଂ ପୂଜା ଉପଯୋଗୀ ମାଳ ପ୍ରସ୍ତୁତ କରି ତାହାକୁ ବିକ୍ରି କରିଥାନ୍ତି । ଆଉ ତା ସହିତ କୋଟପାଡ଼ ଅଞ୍ଚଳରେ ପେପର ହକର ଭାବେ ସେହି ଦଦରା ସାଇକେଲରେ ଦ୍ୱାରା ଦ୍ୱାରା ବୁଲି ପେପର ବାଣ୍ଟନ୍ତି । ସେଥିରୁ ଯାହା ଦି ପଇସା ରୋଜଗାର କରନ୍ତି ସେଥିରେ ପରିବାର ଚଳେ । ବହୁ ପରିଶ୍ରମୀ ସହ ମେଳାପୀ ବନ୍ଧୁଟିଏ ଭଳି ଲୋକଙ୍କ ସାଥିରେ ହସଖୁସିରେ ସମୟ ବିତାଇବାକୁ ଭଲ ପାଆନ୍ତି କୁନୁ । ଏପରିକି ପେପର ବାଣ୍ଟିବା ସମୟରେ ସେ ବିଭିନ୍ନ ପଶୁପକ୍ଷୀ ଓ ପୋଲିସ ସାଇରନ ଭଳି ଶବ୍ଦ ବାହାର କରି ଲୋକଙ୍କ ମନୋରଞ୍ଜନ କରିଥାନ୍ତି ।

ମଣିଷ ଜୀବନ ଦୁଇଦିନର । ଆଉ ଏହି ଜୀବନକୁ ସେ ଲୋକଙ୍କୁ ଖୁସି ଦେବାରେ ସବୁବେଳେ ତତ୍ପର ଥାଆନ୍ତି । ତାଙ୍କର ସମାଜ ପ୍ରତି ଏହି ସେବାକୁ ଦେଖି ଭାରତ ମିଡ଼ିଆ ସଙ୍ଘ ସଦସ୍ୟଙ୍କ ନିଷ୍ପତିକ୍ରମେ ସଙ୍ଘ ପକ୍ଷରୁ ତାଙ୍କୁ ଗୋଟିଏ ଭଲ ସାଇକେଲ ଯୋଗେଇ ଦିଆଯାଇଛି । ଫଳରେ ସେ ସୁରୁଖୁରୁରେ ପେପର ବଣ୍ଟନ କରିବା ସହ ନିଜ ଜୀବିକା ନିର୍ବାହ କରିପାରିବେ ବୋଲି ସଙ୍ଘ ପକ୍ଷରୁ ପ୍ରକାଶ ପାଇଛି । ଏହି ଅବସରରେ ସ୍ଥାନୀୟ ବିଧାୟିକା ପଦ୍ମିନୀ ଦିଆନ ଓ ଭାରତ ମିଡ଼ିଆ ସଙ୍ଘର ସହଯୋଗରେ ଭାରତ ମିଡ଼ିଆ ସଙ୍ଘ କାର୍ଯ୍ୟାଳୟରେ କୁନୁଙ୍କୁ ସମ୍ମାନିତ କରିବା ସହ ଗୋଟିଏ ସାଇକେଲ ପ୍ରଦାନ କରାଯାଇଛି l ଏହାକୁ ନେଇ କୁନୁ ମାଳି ବହୁତ ଉତ୍ସାହିତ ହେବା ସହ ଭାରତ ମିଡ଼ିଆ ସଙ୍ଘ ଏବଂ ବିଧାୟିକାଙ୍କୁ କୃତଜ୍ଞତା ଜ୍ଞାପନ କରିଛନ୍ତି ।

ରିପୋର୍ଟ : କୋଟପାଡରୁ ସୁନୀଲ ଦାଶ