ସ୍ଵତନ୍ତ୍ର ଢଙ୍ଗରେ ରଜ ମଉଜ ପାଳିବ ନୂଆଗାଁ ଗ୍ରାମୀଣ ବିକାଶ ମଞ୍ଚ

ଭୁବନେଶ୍ବର : ଆଉ ଦିନ କେଇଟା ପରେ ରାଜ୍ୟରେ ଜମିବ ଦୋଳିର ଅସାର । ଧୁମଧାମରେ ପାଳନ କରାଯିବ ଓଡ଼ିଶାର ଗଣପର୍ବ ରଜ ମଉଜ । ରାଜ୍ୟର କଳା, ସଂସ୍କୃତି ଓ ପ୍ରକୃତି ସହ ଗଭୀର ସମ୍ପର୍କରେ ଜଡିତ ଏହି ଗଣପର୍ବ । ଚଳିତବର୍ଷ ନୂଆଗାଁ ଗ୍ରାମୀଣ ବିକାଶ ମଞ୍ଚ ପକ୍ଷରୁ ରାଜ୍ୟସ୍ତରୀୟ ରଜ ମହୋତ୍ସବ ଏକ ସ୍ଵତନ୍ତ୍ର ଢଙ୍ଗରେ ପାଳନ କରାଯିବା ପାଇଁ ଲକ୍ଷ୍ୟ ରଖାଯାଇଛି । ଆସନ୍ତା ୧୩ ତାରିଖରୁ ଚାରିଦିନ ବ୍ୟାପି ଏହି ପର୍ବ ନୂଆଗାଁ ରଜ ମହୋତ୍ସବ ପଡିଆରେ ପାଳନ କରାଯିବ । ଏଥିରେ ରାଜ୍ୟ ଓ ରାଜ୍ୟ ବାହାରର କଣ୍ଠଶିଳ୍ପୀ, ନୃତ୍ୟଶିଳ୍ପୀ, ହାସ୍ୟ ଅଭିନେତା ଓ ଅନ୍ୟାନ୍ୟ ପ୍ରତିଭାଧାରୀ ବ୍ୟକ୍ତି ବିଶେଷ ଯୋଗ ଦେଇ ସେମାନଙ୍କର କଳାନୈପୁଣ୍ୟ ପ୍ରଦର୍ଶନ କରିବେ । ସେହିପରି ଖୋର୍ଦ୍ଧାଗଡର ପାଇକ ପୁଅ ସେମାନଙ୍କର ଗରିମାମୟ ବୀରତ୍ବର ଗାଥାକୁ ମଧ୍ୟ ସୁସଜ୍ଜିତ ଢଙ୍ଗରେ ପ୍ରଦର୍ଶନ କରିବେ । ଏଥର ରାଜ୍ୟସ୍ତରୀୟ ବଡିବିଲ୍ଡିଂ ଆକର୍ଷଣର ଅନ୍ୟତମ କେନ୍ଦ୍ରବିନ୍ଦୁ ପାଲଟିବ । ଏହା ସହ କୁନିକୁନି ଶିଶୁମାନଙ୍କଦ୍ବାରା ବିଭିନ୍ନ ରଙ୍ଗାରଙ୍ଗ କାର୍ଯ୍ୟକ୍ରମ ପରିବେଷଣ ସାଙ୍ଗକୁ ନାରୀ ଶକ୍ତିର ନିଆରା ଝଲକ ମଧ୍ୟ ରଜ ମହୋତ୍ସବରେ ପ୍ରତିଫଳିତ ହେବ । ଲୋକଙ୍କ ମନୋରଞ୍ଜ ସାଙ୍ଗଙ୍କୁ ମିଶନ ଶକ୍ତି ଗ୍ରୁପର ମହିଳାଙ୍କଦ୍ବାରା ୨ ଶହରୁ ଊର୍ଦ୍ଧ୍ବ ସ୍ଵତନ୍ତ୍ର ଷ୍ଟଲରେ ଓଡ଼ିଆ ଘରର ପିଠା, ମିଠା, ପାନ ଓ ଅନ୍ୟାନ୍ୟ ରଜ ବ୍ୟଞ୍ଜନ ଉପଲବ୍ଧ ରହିବ । ଓଡ଼ିଶାର କଳା, ସଂସ୍କୃତି ଓ ପରମ୍ପରାକୁ  ଅକ୍ଷୁର୍ଣ୍ଣ ରଖି ରଜ ମଉଜକୁ ଅଧିକରୁ ଅଧିକ ଭାବେ ପରିବ୍ୟାପ୍ତ କରାଯିବା ପାଇଁ ନୂଆଗାଁ ଗ୍ରାମୀଣ ବିକାଶ ମଞ୍ଚ ପକ୍ଷରୁ ସୂଚନା ମିଳିଛି ।

ରିପୋର୍ଟ : ଭୁବନେଶ୍ବରରୁ ଅଭିଜିତ ସିଂ