କୃଷକ ସଶକ୍ତିକରଣ ଦିଗରେ କାର୍ଯ୍ୟ କରିବାକୁ ଶିଳ୍ପ ସହାୟତା ଲୋଡିଲେ କୃଷିମନ୍ତ୍ରୀ
ଭୁବନେଶ୍ୱର : କୃଷି ଉତ୍ପାଦନରେ ଓଡ଼ିଶା ସବୁଠାରୁ ପ୍ରଗତିଶୀଳ ରାଜ୍ୟ । ଏଣୁ କୃଷକ ସଶକ୍ତିକରଣ ଦିଗରେ ଆଗେଇବାକୁ ଆହ୍ୱାନ ଦେଇଛନ୍ତି କୃଷିମନ୍ତ୍ରୀ ରଣେନ୍ଦ୍ର ପ୍ରତାପ ସ୍ୱାଇଁ । ସିଆଇଆଇ ଓଡ଼ିଶା ରାଜ୍ୟ ପରିଷଦ ପକ୍ଷରୁ ଭୁବନେଶ୍ୱରରେ ‘ଫାର୍ମ୨ଫୋର୍କ’ର ୯ମ ସଂସ୍କରଣ ଆୟୋଜିତ ହୋଇଯାଇଛି । ଏହି ଅବସରରେ ଶିଳ୍ପ ସଂସ୍ଥାଗୁଡ଼ିକୁ କୃଷକମାନଙ୍କୁ ସହାୟତା ଏବଂ ମାଗଦର୍ଶନ ପ୍ରଦାନ କରିବାକୁ ଆହ୍ୱାନ କରିଛନ୍ତି କୃଷିମନ୍ତ୍ରୀ । ଏହି ସହାୟତା କୃଷକଙ୍କ ଆୟ ବୃଦ୍ଧି ତଥା ରାଜ୍ୟର ସାମଗ୍ରିକ ସମୃଦ୍ଧିରେ ସହାୟକ ହେବ ବୋଲି ମନ୍ତ୍ରୀ ଗୁରୁତ୍ୱାରୋପ କରିଛନ୍ତି ।
କଫି ଏବଂ ମାଣ୍ଡିଆ ଭଳି ଉଭୟ ପାରମ୍ପରିକ ତଥା ଅଣପାରମ୍ପରିକ ଉତ୍ପାଦଗୁଡ଼ିକରେ ଉଲ୍ଲେଖନୀୟ ଅଗ୍ରଗତି ଉପରେ ଆଲୋକପାତ କରିଛନ୍ତି ମନ୍ତ୍ରୀ । ଏପରିକି କର୍ଣ୍ଣାଟକର ଉଦାହରଣକୁ ଅନୁସରଣ କରି ଓଡ଼ିଶା କଫି ଏବଂ ମାଣ୍ଡିଆ ଚାଷରେ ଏକ ସମୃଦ୍ଧ ରାଜ୍ୟ ହେବା ଲାଗି କୃଷି ମନ୍ତ୍ରୀ ନିଜ ଇଚ୍ଛା ପ୍ରକାଶ କରିଛନ୍ତି । ଏହା ସହିତ ମାଛ ଏବଂ କ୍ଷୀର ଉତ୍ପାଦନରେ ଓଡ଼ିଶାର ଅସାଧାରଣ ଉତ୍ପାଦନ ଏବଂ ଆତ୍ମନୀର୍ଭରଶୀଳତାକୁ ପ୍ରଶଂସା କରିଛନ୍ତି ମନ୍ତ୍ରୀ । ଉପଲବ୍ଧ ଜମିର ମାତ୍ର ୫୦ ପ୍ରତିଶତ ଅଂଶରେ ଚାଷ କରିବା ସତ୍ତ୍ବେ ରାଜ୍ୟ ଧାନ ଉତ୍ପାଦନରେ ୨୨୦ ପ୍ରତିଶତର ଉଲ୍ଲେଖନୀୟ ବୃଦ୍ଧି ହାସଲ କରିଛି ।
ଏହି ଅବସରରେ ଭୁବନେଶ୍ୱର ମେୟର ସୁଲୋଚନା ଦାସ ଉପସ୍ଥିତ ରହି ମାଣ୍ଡିଆ ଏବଂ ଉପକୂଳବର୍ତ୍ତୀ ଅଂଚଳଗୁଡ଼ିକରେ ସାମୁଦ୍ରିକ ଖାଦ୍ୟ କ୍ଷେତ୍ରର ବୃହତ ସମ୍ଭାବନା ଉପରେ ଗୁରୁତ୍ୱାରୋପ କରିଛନ୍ତି । ସେ ସୋର୍ସିଂ ଏବଂ ପ୍ରକ୍ରିୟାକରଣଠାରୁ ଆରମ୍ଭ କରି ମାର୍କେଟିଂ ଏବଂ ରପ୍ତାନୀ ପର୍ଯ୍ୟନ୍ତ ନିରନ୍ତର ସାମୁଦ୍ରିକ ଖାଦ୍ୟ ପ୍ରୋତ୍ସାହନ ପାଇଁ ରାଜ୍ୟର ପ୍ରତିବଦ୍ଧତାକୁ ସୁନିଶ୍ଚିତ କରିଛନ୍ତି । ଏହାସହ ସାମୁଦ୍ରିକ ଖାଦ୍ୟ କ୍ଷେତ୍ର ପାଇଁ ଅତ୍ୟାଧୁନିକ ସୁବିଧା ତଥା ପରୀକ୍ଷଣ ଲ୍ୟାବ ସ୍ଥାପନ କରିବାରେ ସେ ଶିଳ୍ପମାନଙ୍କର ସହଯୋଗ ଲୋଡ଼ିଛନ୍ତି ।
ଏହି କାର୍ଯ୍ୟକ୍ରମରେ ମାଣ୍ଡିଆ, ସାମୁଦ୍ରିକ ଖାଦ୍ୟ ପ୍ରକ୍ରିୟାକରଣ ଓ ରପ୍ତାନୀ ଏବଂ ବ୍ୟବସାୟ ପରିବେଶ ଓ ନିବେଶ ସୁଯୋଗ ଉପରେ ତିନୋଟି ସର୍ବଦଳୀୟ ଅଧିବେଶନ ମଧ୍ୟ ପ୍ରଦର୍ଶିତ ହୋଇଥିଲା । ଅନେକ ଶିଳ୍ପ ଉଦ୍ୟୋଗୀମାନେ ଏହି ଅଧିବେଶନରେ ଯୋଗ ଦେଇଥିଲେ ।
ରିପୋର୍ଟ : ଭୁବନେଶ୍ବରରୁ ଅଭିଜିତ ସିଂ
