କୋଟପାଡରେ କୁଆପଥର ତାଣ୍ଡବ । ଚିନ୍ତାର ଚାଷୀକୂଳ…

କୋଟପାଡ : ଦାଉ ସାଜିଛି କାଳବୈଶାଖୀ ବର୍ଷା । ଫଳରେ ଚାଷୀକୂଳ ହତାଶ ହୋଇଥିବା ଦେଖିବାକୁ ମିଳିଛି । କାଳବୈଶାଖୀ କାରଣରୁ ଭୀଷଣ କୁଆପଥର ବୃଷ୍ଟି ହେବା ସହ କୋଟପାଡ଼ ତହସିଲ ଅଞ୍ଚଳର ପ୍ରାୟ ୬ ଟି ଗ୍ରାମ ଯଥା ସୌରା କୁହୁଡି, ବାଟ କୁହୁଡି, ବଣ୍ଡାଗୁଡା, ଅମ୍ଳଭାଟା, ଶାରଦଗୁଡା, ଘୁମରରେ ଧlନ ଫସଲ ସମ୍ପୂର୍ଣ୍ଣ ଛାରଖାର ହୋଇଯାଇଛି  l ଚାଷୀଙ୍କ ଧାନ ମାଟିରେ ମିଶିବା ସହ ଗରିବ ଚାଷୀଙ୍କ ମେରୁଦଣ୍ଡ ଭାଙ୍ଗି ପଡିଛି l କୁଆପଥର ମାଡ ହେବା ଫଳରେ ଶହ ଶହ ଏକର ଜମି ଏବେ କ୍ଷତିଗ୍ରସ୍ତ ହୋଇଛି l ବର୍ଷାକୁ ଦୃଷ୍ଟିରେ ରଖି ଧାର କରଜ କରି ଚାଷୀ ଯାହା ଚାଷ କରିଥିଲା ସେସବୁ ଏବେ ମାଟିରେ ମିଶିଯାଇଛି । ଯାହାକୁ ନେଇ ଚାଷୀକୂଳ ନିରୁପାୟ ।

ଏ ନେଇ ଆଜି କ୍ଷତିଗ୍ରସ୍ତ ଅଞ୍ଚଳର ଚାଷୀ କୋଟପାଡ଼ ତହସିଲଦାରଙ୍କୁ ଭେଟି ରାଜ୍ୟ ସରକାରଙ୍କୁ ଗୁହାରି କରି ନିଜର ଦୁଃଖ ଜଣାଇଛନ୍ତି l ଅପରପକ୍ଷେ କୋଟପାଡ଼ ତହସିଲଦାର ଏ ନେଇ ସୂଚନା ପାଇ ସମସ୍ତ ରାଜସ୍ବ ନିରୀକ୍ଷକଙ୍କୁ କୃଷି ବିଭାଗର ସହଯୋଗରେ ସମସ୍ତ କ୍ଷତିଗ୍ରସ୍ତ ଚାଷୀଙ୍କ କ୍ଷୟକ୍ଷତିର ଆକଳନ କରି ରିପୋର୍ଟ ପ୍ରସ୍ତୁତ କରିବା ପାଇଁ ନିର୍ଦ୍ଦେଶ ଦେଇଛନ୍ତି । ରିପୋର୍ଟ ଆସିବା ପରେ କ୍ଷତିଗ୍ରସ୍ତ ଚାଷୀ କିଭଳି ଉପଯୁକ୍ତ କ୍ଷତିପୂରଣ ପାଇପାରିବେ ସେଥିପାଇଁ କୋରାପୁଟ ଜିଲ୍ଲା ଜରୁରୀକାଳୀନ ବିଭାଗକୁ ଏହି ରିପୋର୍ଟ ପଠାଯିବ l ତେବେ ଦେଖିବାକୁ ବାକି ରହିଲା ପ୍ରଶାସନିକ ସ୍ତରରେ କ୍ଷୟକ୍ଷତିର କେବେ ଆକଳନ ହେଉଛି ଏବଂ କ୍ଷତିଗ୍ରସ୍ତ ଗରିବ ଚାଷୀଙ୍କ ଗୁହାରୀ ଶୁଣୁଛନ୍ତି ସରକାର ।

ରିପୋର୍ଟ : କୋରାପୁଟରୁ ସୁନୀଲ ଦାଶ