ମା’ଙ୍କ ପାଇଁ ଦିନଟିଏ ନୁହେଁ ବରଂ ମା’ଙ୍କ ପାଇଁ ହୃଦୟଟିଏ …

ମା’….. ତୋ ପାଇଁ କ’ଣ ଲେଖିବି । ଆଜି ହେଉଛି ମାତୃତ୍ୱ ଦିବସ । ମା ପାଇଁ ଦିନଟିଏ, ଟ୍ୟାଗ୍ ଲାଇନ ଦେଇ ଅନେକ ଲୋକ ଅନେକ କିଛି ଲେଖି ସାରିଲେଣି । ଏତେ ସବୁ ଲେଖା ଭିତରେ ମୁଁ ଆଉ ଅଧିକା କଣଟା ବା ଲେଖିବି । ଆଉ ଏମିିତିରେ ବି ମା’ ଶବ୍ଦର ଗଭୀରତାକୁ ବୁଝିବା ପାଇଁ ମୁଁ ଏତେ ବଡବି ହୋଇନି ।
ମା’ ହେଉଛି ସମର୍ପଣ, ତ୍ୟାଗର ମୂର୍ତ୍ତି । ଦୁନିଆର ସବୁଠାରୁ ବଡ ଯୋଦ୍ଧା ହେଉଛି ମା’ । କେତେବେଳେ ସେ କରୁଣାମୟ ତ ଆଉ କେତେବେଳେ ସ୍ନେହମୟୀ । ପ୍ରତି କ୍ଷଣ ପ୍ରତି ମୂହୂର୍ତ୍ତ ମା’ଟିଏ ତା ସନ୍ତାନ ପାଇଁ ତତ୍ପର ରହିଥାଏ । ନିଜ ଇଚ୍ଛା ନିଜ ଦୁଃଖ ଏପରିକି ନିଜ ମନର ଭାବନାକୁ ଯିଏ ତୁଚ୍ଛ ମଣି କେବଳ ସନ୍ତାନ ପାଇଁ ତତ୍ପର ରୁହେ ସେ ହେଲା ମା’ । ହେଲେ ଏତେ ସବୁ ଭିତରେ ଆମେ ଭୁଲିଯାଉ ଯେ, ମା’ ବି ଗୋଟେ ମଣିଷ । ମା’ର ଗୋଟେ ମନ ଅଛି । ଆଉ ଯେତେବେଳେ ସେହି ମା’ ନିଜ ପାଇଁ କିଛି କରିବସେ, ଆମେ ହେଉଛେ ସେହି ମଣିଷ ଯିଏ ନିଜର ପ୍ରତ୍ୟେକ ବାକ୍ୟରୁ ଓହରି ସେହି ମା’କୁ ନିନ୍ଦା କରୁ । ମା’ କଣ କେବଳ ଆମ ମନର କଳ୍ପନା ? …
ନା… । ମା’ କେବେ ହେଲେ କାହାର କଳ୍ପନା ହୋଇନପାରେ । ମା’ ତ ଏ ସମସ୍ତଙ୍କଠାରୁ ଉଦ୍ଧ୍ୱର୍ରେ ।
ମା’ ପାଖରେ ଅଳି ନ କଲେ ପିଲାର ମନ ବୁଝେନା । ଆଉ ସେହି ମା’ ଯେତେବେଳେ ବୃଦ୍ଧ ବୟସରେ ପିଲା ପାଖରେ ଅଳି କରେ, ଆମେ କ’ଣ କରୁ… ।
କୁନି କୁନି ପାଦରେ ପିଲା ଯେତେବେଳେ ଚାଲୁ ଚାଲୁ ପଡିଯାଇ ଖଣ୍ଡିଆ ଖାବରା ହେଇଯାଏ, ଓହଃ ମା’ ଆଖିରୁ ଲୁହ ଝରିଆସେ । ଆଉ ସେହି ବୃଦ୍ଧ ବୟସରେ ମା’ ଯେତେବେଳେ ବିଛଣାରେ ପଡି ଛଟପଟ ହୁଏ ଆମେ କ’ଣ କରୁ… ।
ଛୁଆଟିଏ ଯେତେବେଳେ ପ୍ରଥମ ଥର ମା ହାତ ଧରି ଶିକ୍ଷା ଗ୍ରହଣ କରିବାକୁ ବିଦ୍ୟାଳୟ ଯାଏ, ପିଲା ମନରୁ ଭୟ ଦୂର କରିବା ପାଇଁ ମା’ ସାଥିରେ ଥାଏ । ସେତେବେଳେ ମା’ କେତେ ଯେ ଠାକୁରଙ୍କୁ ଡାକେ ତାହାର କଳ୍ପନା କେହି କରିପାରିବେନି । ଆଉ ସେହି ମା’ ଯେତେବେଳେ ରୋଗାଗ୍ରସ୍ତ ହୋଇ ହସ୍ପିଟାଲ ବେଡକୁ ଯିବାବେଳେ ଡରୁଥାଏ, ସେତେବେଳେ ଆମ କ’ଣ କରୁ… ।
କିଶୋର ଅବସ୍ଥାରେ ଆମେ କେତେ ମା’ ସହ କଳି-ଅଳି କରୁ ତାର ହିସାବ ଆମ ପାଖରେ ନ ଥାଏ । ଏମିତିକି ମା’ ସହ ଝଗଡା ନ କଲେ ଯେମିତି ଆମ ଭାତ ହଜମ ହୁଏ ନାହିଁ । ଆଉ ବୃଦ୍ଧ ବୟସରେ ମା’ ଯଦି କିଛି କହିପକାଏ, ଆମେ ସେତେବେଳେ ବିରକ୍ତ ହୋଇ କ’ଣ କରୁ… ।
ସମୟ ପରିବର୍ତ୍ତନଶୀଳ । ଆମେ କାହାର ଭାବନାକୁ କ୍ଷତ ପହଞ୍ଚାଇବାକୁ ଚାହୁଁ ନାହୁଁ । କିନ୍ତୁ ପାଶ୍ଚାତ ସଭ୍ୟତାକୁ ଆପଣାଇ ଆମେ ଏହି ଗୋଟିଏ ଦିନ ମା’ଙ୍କୁ ମନେ ପକାଇବା ବି ଠିକ୍ ଭାବୁ ନାହିଁ । କାରଣ ମା’ ଭାବନା ନୁହେଁ ଆମ ଜୀବନର ଅସ୍ତିତ୍ୱ । ଆମ ପରିଚୟ ହେଉଛନ୍ତି ଆମ ମା’ ।
ମା’ଙ୍କ ପାଇଁ ଦିନଟିଏ ନୁହେଁ ବରଂ ମା’ଙ୍କ ପାଇଁ ହୃଦୟଟିଏ ହେବା ଆବଶ୍ୟକ । କାରଣ ଆଜି ଆମେ ମା’ ପାଖରେ ଛୁଆ । କାଲି ଆମ ଛୁଆ ପାଖରେ ଆମେ ହେବା ମା’ । ତେଣୁ ଆମେ ଯାହା କରିବା ତାହାର ପ୍ରଭାବ ଭବିଷ୍ୟତ ପିଢି ପାଇଁ ନିଶ୍ଚୟ ଫଳପ୍ରଦ ହେବ ।
ଫ୍ରି ଟୁ ସ୍ପିକ୍ ପରିବାର ପକ୍ଷରୁ ସମସ୍ତ ମା’ଙ୍କୁ ସମ୍ମାନ ଜଣାଇବା ଉଦେ୍ଦଶ୍ୟରେ ହୃଦୟରୁ ମାତୃତ୍ୱକୁ ଧନ୍ୟବାଦ ।