ପ୍ରକାଶ ପାଇଲା ସିବିଏସଇ ଦଶମ ଓ ଦ୍ୱାଦଶ ଶ୍ରେଣୀ ପରୀକ୍ଷା ଫଳ
ପ୍ରକାଶ ପାଇଲା ସିବିଏସଇ ଦଶମ ଓ ଦ୍ୱାଦଶ ଶ୍ରେଣୀ ପରୀକ୍ଷା ଫଳ । ସିବିଏସଇ ଦଶମ ପାସ ହାର ୯୩.୧୨% ରହିଛି । ଭୁବନେଶ୍ୱର ରିଜିଅନ ପାସ୍ ହାର ୯୩.୬୪% ରହିଛି । ତ୍ରିବେନ୍ଦ୍ରମ୍ ରିଜିଅନ ୯୯.୬୮% ସହ ଶୀର୍ଷରେ ରହିଛି । ଚଳିତ ବର୍ଷ ମୋଟ ୨୧ଲକ୍ଷ ୮୪ ହଜାର୧୧୭ ଜଣ ଶିକ୍ଷାର୍ଥୀ ପରୀକ୍ଷା ପାଇଁ ପଞ୍ଜୀକରଣ କରିଥିଲେ । ସେମାନଙ୍କ ମଧ୍ୟରୁ ୨୧ ଲକ୍ଷ ୬୫ ହଜାର ୮୦୫ ଜଣ ପରୀକ୍ଷା ଦେଇଥିଲେ । ପରୀକ୍ଷା ଦେଇଥିବା ପିଲାଙ୍କ ମଧ୍ୟରୁ ୨୦ ଲକ୍ଷ ୧୬ ହଜାର ୭୭୯ ଜଣ ପାସ୍ କରିଛନ୍ତି ।
ସେପଟେ, ପ୍ରକାଶ ପାଇଛି ସିବିଏସଇ ଦ୍ୱାଦଶ ପରୀକ୍ଷା ଫଳ । ମୋଟ ୮୭.୩୩% ଛାତ୍ରଛାତ୍ରୀ ପାସ୍ କରିଛନ୍ତି । ଚଳିତ ବର୍ଷ ମୋଟ ୧୬ ଲକ୍ଷ ୯୦ ହଜାର ଛାତ୍ରଛାତ୍ରୀ ପରୀକ୍ଷା ଦେଇଥିଲେ । ସେଥିରେ ୯ ଲକ୍ଷ ୫୧ ଛାତ୍ରଛାତ୍ରୀ ଛାତ୍ର ଏବଂ ୭ ଲକ୍ଷ ୪୦ ହଜାର ଛାତ୍ରୀ ଥିଲେ ।
ସବୁଥର ଭଳି ଏଥର ମଧ୍ୟ ଦଶମରେ ଛାତ୍ରଙ୍କ ତୁଳନାରେ ଛାତ୍ରୀଙ୍କ ପାସ୍ ହାର ଅଧିକ ରହିଛି । ଛାତ୍ରୀଙ୍କ ପାସ୍ ହାର ୯୪.୨୫% ରହିଥିବା ବେଳେ ଛାତ୍ରଙ୍କ ପାସ ହାର ୯୨.୨୭% ଓ ଟ୍ରାନ୍ସଜେଣ୍ଡର ଶିକ୍ଷାର୍ଥୀଙ୍କ ପାସ୍ ହାର ୯୦% ରହିଛି । ତେବେ ୨୦୨୨ ତୁଳନାରେ ଏଥର ସିବିଏସ୍ଇ ୧୦ ପାସ୍ ହାର କମ ରହିଛି । ୨୦୨୨ରେ ପାସ୍ ହାର ୯୪.୪୦% ରହିଥିଲା । ୨୦୨୧ରେ ଏହା ୯୯.୦୪%, ୨୦୨୦ରେ ୯୧.୪୬% ଓ ୨୦୧୯ରେ ୯୧.୧୦% ରହିଥିଲେ ।
ସେହିପରି ଗତବର୍ଷ ସିବିଏସ୍ଇ ଦ୍ୱାଦଶର ୯୪% ଛାତ୍ରୀ ପାସ୍ କରିଥିବା ବେଳେ ଚଳିତ ବର୍ଷ ଏହା ୯୦.୮%ରେ ସୀମିତ ରହିଛି । ଚଳିତ ବର୍ଷ ସିବିଏସ୍ଇ ଦ୍ୱାଦଶ ପରୀକ୍ଷାରେ ଥିରୁଅନନ୍ତପୁର ଜୋନ୍ ୯୯.୯୯% ସ୍କୋର କରି ସବୁଠୁ ଆଗରେ ରହିଛି । ଜବାହର ନବୋଦୟ ବିଦ୍ୟାଳୟ ୯୭%ରୁ ଅଧିକ ରେଜଲ୍ଟ ଆଣି ସବୁଠୁ ଭଲ ପ୍ରଦର୍ଶନ କରିଥିବା ସ୍କୁଲ ତାଲିକାରେ ଆଗରେ ରହିଛି ।
ଗତ ଫେବ୍ରୁଆରୀ ୧୫ରୁ ଏପ୍ରିଲ ୫ ତାରିଖ ମଧ୍ୟରେ ପରୀକ୍ଷା କରଯାଇଥିଲା । ୩୬ ଦିନରେ ୧୧୫ ଟି ବିଷୟରେ ପରୀକ୍ଷା କରାଯାଇଥିଲା । ଏନେଇ ସିବିଏସଇ ପକ୍ଷରୁ ସୂଚନା ଦିଆଯାଇଛି ।
