ଲେଡିଜ ହଷ୍ଟେଲରେ ଦୁର୍ବୁତ୍ତଙ୍କ ଗୁଣ୍ଡାରାଜ୍ । ମହିଳାଙ୍କ ସୁରକ୍ଷା ପାଇଁ ଦାୟୀ କିଏ ?

ଭୁବନେଶ୍ବର (ବ୍ୟୁରୋ ରିପୋର୍ଟ): ରାଜଧାନୀର ଛାତିରେ ଥିବା ଲେଡିଜ ହଷ୍ଟେଲକୁ ଧସେଇ ପଶିଲେ ଦୁର୍ବୁତ୍ତ । ନୟାପଲ୍ଲୀ ଥାନାଠାରୁ ମାତ୍ର ୫୦୦ ମିଟର ଦୂରତା ଥିବା ଉଗ୍ରତାରା ଲେଡିଜ ହଷ୍ଟେଲରେ ଦୀର୍ଘ ସମୟ ଧରି ଆତଙ୍କ ଖେଳାଇଥିଲେ ଆତଙ୍କୀ । ହଷ୍ଟେଲ ମାଲିକାଣି ଲୀଲାବତୀଙ୍କୁ ନିର୍ଧୁମ ଛେଚିବା ସହ ହଷ୍ଟେଲର ବହୁ ଆସବାବପତ୍ର ନଷ୍ଟ କରିଥିଲେ ଦୁର୍ବୁତ୍ତ । ଏପରିକି ହଷ୍ଟେଲ ଅନ୍ତେବାସୀଙ୍କୁ ମଧ୍ୟ ଅସଦାଚାରଣ କରିବା ସହ ଆକ୍ରମଣ ହୋଇଥିବା ନେଇ ନୟାପଲ୍ଲୀ ଥାନାରେ ଅଭିଯୋଗ ହୋଇଛି ।

ରାଜଧାନୀରେ ଦୁର୍ବୁତ୍ତଙ୍କ ଗୁଣ୍ଡାରାଜ୍ ଘଟଣା ନୂଆ ନୁହେଁ । ଭୁବନେଶ୍ବରରେ ବିଶେଷ କରି ନୟାପଲ୍ଲୀରେ ମହିଳାଙ୍କ ପାଇଁ ଅନେକ ଲେଡିଜ ହଷ୍ଟେଲ ଗଢି ଉଠିଥିବାବେଳେ ପୋଲିସର କୋହଳ ପେଟ୍ରୋଲିଂ କାରଣରୁ ଉକ୍ତ ଅଞ୍ଚଳରେ ଏଭଳି ଗୁଣ୍ଡାରାଜ୍ ସ୍ଥାନୀୟବାସୀଙ୍କୁ ସହିବାକୁ ପଡୁଛି ବୋଲି ସ୍ଥାନୀୟବାସୀ ଅଭିଯୋଗ କରିଛନ୍ତି । ଏପରିକି ଦୁର୍ବୁତ୍ତମାନେ ପ୍ରତ୍ୟେକ ଦିନ ସେଠାରେ ନିଶାସେବନ କରିବା ସହିତ ସେହି ବାଟ ଦେଇ ଯାଉଥିବା ମହିଳାଙ୍କୁ ଅଶ୍ଳୀଳ ଇଙ୍ଗିତ କରନ୍ତି । ଏ ନେଇ ପୂର୍ବରୁ ଥାନାରେ ଅଭିଯୋଗ ହୋଇଥିଲେ ମଧ୍ୟ କଡା କାର୍ଯ୍ୟାନୁଷ୍ଠାନ ଅଭାବରୁ ଦୁର୍ବୁତ୍ତମାନେ ଖସିଯାଉଥିବା ନେଇ ଅଭିଯୋଗ ହୋଇଛି । ପୋଲିସର କୋହଳ ମନୋଭାବ ଦୁର୍ବୁତ୍ତଙ୍କ ମନୋବଳ ବୃଦ୍ଧି କରୁଥିବା ଅଭିଯୋଗ କରିଛନ୍ତି ଅନ୍ତେବାସୀ । ମହିଳାଙ୍କ ସୁରକ୍ଷା ପାଇଁ ରାଜ୍ୟ ସରକାର ଏବଂ ପୋଲିସ ପ୍ରଶାସନ ପୂର୍ବରୁ ବହୁ ପଦକ୍ଷେପ ଗ୍ରହଣ କରିଛନ୍ତି । ମାତ୍ର ଏହି ଘଟଣା ଏବେ ମହିଳାଙ୍କ ସୁରକ୍ଷା ପାଇଁ ପ୍ରଣୀତ ଯୋଜନାକୁ ଇଙ୍ଗିତ କରିଛି ।

ସୂଚନା ଅନୁସାରେ, ଗତ ଶୁକ୍ରବାର ରାତି ପ୍ରାୟ ୯ଟା ସମୟରେ ଯୁବତୀ ଜଣକ ହଷ୍ଟେଲ ବାହାରେ କଥା ହେଉଥିଲେ । ଏହି ସମୟରେ କିଛି ଦୁର୍ବୁତ୍ତ ସେଠାକୁ ଆସି ତାଙ୍କୁ କମେଣ୍ଟ ମାରିବା ସହ ବହୁ ଅଶ୍ଳୀଳ ଇଙ୍ଗିତ କରିଥିଲେ । ଏହାକୁ ଉକ୍ତ ଯୁବତୀ ପ୍ରତିବାଦ କରିବାରୁ ଦୁର୍ବୁତ୍ତମାନେ ତାଙ୍କୁ ମାଡ ମାରିବା ସହ ହଷ୍ଟେଲ ଭିତରକୁ ଧସେଇ ପଶିଥିଲେ । ଘଟଣାରେ ଦୁର୍ବୁତ୍ତମାନେ ହଷ୍ଟେଲର ଅନେକ ଯୁବତୀଙ୍କୁ ମାଡ ମାରିବା ସହ ସେଠାରେ ଥିବା ସ୍କୁଟି, ଫର୍ଣ୍ଣିଚର, ଟିଭି, ଆକ୍ୱାଗାର୍ଡକୁ ଭାଙ୍ଗି ଚୁରମାର କରିଦେଇଛନ୍ତି । ଏ ନେଇ ଯୁବତୀମାନେ ନୟାପଲ୍ଲୀ ଥାନାରେ ଲିଖିତ ଅଭିଯୋଗ କରିବା ପରେ ପୋଲିସ ଗତାକାଲି ରାତିରେ ଘଟଣାସ୍ଥଳକୁ ଯାଇ ଛାନଭିନ କରିଛି । ଏବଂ ଅଭିଯୁକ୍ତଙ୍କୁ ଧରିବା ପାଇଁ ବିଭିନ୍ନ ସ୍ଥାନରେ ଚଢାଉ ଜାରି ରଖିଛି ।

ରାଜଧାନୀରେ ଯଦି ମହିଳା ସୁରକ୍ଷିତ ନାହାନ୍ତି ତେବେ ଏଥିପାଇଁ ଦାୟୀ କିଏ ବୋଲି ପ୍ରଶ୍ନ ଉଠିଛି । ସରକାର ମହିଳାଙ୍କୁ ସୁରକ୍ଷା ଦେବା ପାଇଁ ଅନେକ ଡିଣ୍ଡିମ ପିଟୁଥିବାବେଳେ ଖୋଦ୍ ରାଜଧାନୀରେ ଏହାକୁ କେତେ ଗୁରୁତ୍ବ ଦେଉଛନ୍ତି ତାହା ଦେଖିବାକୁ ବାକି ରହିଲା ।