ଗୋଟିଏ ପଞ୍ଚାୟତରେ ଗୋଷ୍ଠୀ ବିବାଦ । କିଏ ଉଠାଇବ ଫାଇଦା ସମୟ କହିବ ?

କଟକ : ସିଧାସଳଖ ଭାବେ ଶାସକ ଦଳର ବିଧାୟକ ଚନ୍ଦ୍ର ସାରଥୀ ବେହେରାଙ୍କୁ ଟାର୍ଗେଟ କଲେ ସାନ୍ତପୁର ସରପଞ୍ଚ । ଗୋଟେପଟେ ପଞ୍ଚାୟତର ଉନ୍ନତି ପାଇଁ ଖୋଦ୍ ସରପଞ୍ଚ ଧାରଣା ଦେଇଛନ୍ତି । ଅନ୍ୟପଟେ ସରପଞ୍ଚ ଉନ୍ନୟନରେ ବାଧକ ସାଜୁଥିବା ଅଭିଯୋଗରେ ଅନ୍ୟ ଏକ ଗୋଷ୍ଠୀ, ବିଡିଓଙ୍କୁ ଦାବି ପତ୍ର ଦେଇଛନ୍ତି । କିଏ କହୁଛି ସତ ତାହା ତ ସମୟ କହିବ । ମାତ୍ର ଗୋଟିଏ ପଞ୍ଚାୟତରେ ଏଭଳି ଗୋଷ୍ଠୀ ବିବାଦ ଏବେ ସମଗ୍ର ଅଞ୍ଚଳରେ ଚର୍ଚ୍ଚାର ବିଷୟ ପାଲଟିଛି । ଅପରପକ୍ଷେ ଦୁଇ ବିରାଡିଙ୍କ ଗଣ୍ଡଗୋଳରେ ଆଉ କାହାର ସ୍ବାର୍ଥ ହାସଲ ହେଉଛି ତାହା ଦେଖିବାକୁ ବାକି ରହିଲା ବୋଲି ଏବେ ବୁଦ୍ଧିଜୀବୀ ମହଲରେ ଚର୍ଚ୍ଚା ।

କଟକ ସଦର ନିର୍ବାଚନ ମଣ୍ଡଳୀ ଅନ୍ତର୍ଗତ ସାନ୍ତପୁର ପଞ୍ଚାୟତରେ ବିଭିନ୍ନ ସମସ୍ୟାର ପ୍ରତିକାର ନିମନ୍ତେ ପ୍ରଶାସନର ଉଦାସୀନ ନୀତି ବିରୋଧରେ ବ୍ଲକ କାର୍ଯ୍ୟାଳୟ ସମ୍ମୁଖରେ ଗଣଧାରଣା ଦେଇଥିଲେ ପଞ୍ଚାୟତର ସରପଞ୍ଚ ଓ ପଞ୍ଚାୟତବାସୀ । ଏପରିକି ଜେଇ, ଜିଆରଏସ, ଭିଏଲଡବ୍ଲ୍ୟୁ ପଞ୍ଚାୟତକୁ ଆସୁନଥିବାରୁ ସେଠାର ଉନ୍ନୟନ କାର୍ଯ୍ୟ ବାଧାପ୍ରାପ୍ତ ହେଉଥିବା ଅଭିଯୋଗ ଆଣି ସେମାନଙ୍କ ବଦଳି ଦାବିରେ ଧାରଣା ଦେଇଥିଲେ ।

ଅପରପକ୍ଷେ ଉକ୍ତ ପଞ୍ଚାୟତର ଆଉ କିଛି ଗୋଷ୍ଠୀ ସରପଞ୍ଚଙ୍କ ବିରୋଧରେ ଦାବି ଉଠାଇ ବ୍ଲକ କାର୍ଯ୍ୟାଳୟ ସମ୍ମୁଖରେ ସରପଞ୍ଚଙ୍କୁ ବିରୋଧ କରିବା ସହ ଏ ନେଇ ବିଡିଓଙ୍କୁ ଦାବିପତ୍ର ଦେଇଛନ୍ତି । ଏପରିକି ଉକ୍ତ ଗୋଷ୍ଠୀ ସରପଞ୍ଚଙ୍କୁ ଦଲାଲ ବୋଲି କହିବା ସହିତ ପଞ୍ଚାୟତର ଉନ୍ନୟନମୂଳକ କାର୍ଯ୍ୟରେ ସରପଞ୍ଚ ବାଧକ ସାଜୁଥିବା ଅଭିଯୋଗ ଆଣିଛନ୍ତି । ଏ ସଂପର୍କରେ ପୃଥକ୍ ପୃଥକ୍ ଭାବେ ବିଡ଼ିଓଙ୍କୁ ଲିଖିତ ଭାବେ ଜଣାଇଛନ୍ତି ଉଭୟ ଗୋଷ୍ଠୀ ।

ସାଲେପୁରରୁ ଅଭୟ ଜେନା