କାହା ସ୍ବାର୍ଥରେ ଓଡିଶା ଡ୍ରାଇଭର ମହାସଂଘ ?

ଖୁବ୍ କମ୍ ସମୟରେ ରାଜ୍ୟର ବୃହତ ସଂଗଠନ ଭାବେ ଉଭା ହୋଇଛି ଓଡିଶା ଡ୍ରାଇଭର ମହାସଂଘ । ବିଗତ ଏକ ବର୍ଷ ଧରି ଏହି ସଂଘ ନିଜର ହକ୍ ପାଇଁ ଲଢେଇ କରି ଆସୁଛି । ତେବେ ଏଠି ପ୍ରଶ୍ନ, ଡ୍ରାଇଭରମାନଙ୍କର କଣ ଆଗରୁ କୌଣସୁ ସମସ୍ୟା ନ ଥିଲା ? କାରଣ କରୋନା ପରେ ସକ୍ରିୟ ହୋଇ ଉଠିଥିବା ଏହି ସଂଘ ପ୍ରଥମେ ଅନେକ ସଚେତନମୂଳକ କାର୍ଯ୍ୟ କରିଥିଲା । ଯେଉଁଥିପାଇଁ ଡ୍ରାଇଭର ମହାସଂଘ ଲୋକଙ୍କର ପ୍ରିୟଭାଜନ ମଧ୍ୟ ହୋଇଥିଲା । ପରେ ସଂଘ ନିଜ ହକ୍ ପାଇଁ ସରକାରଙ୍କ ନିକଟରେ ଦାବି ଉପସ୍ଥାପନା କରି ବିଫଳ ହେବାପରେ ଆନ୍ଦୋଳନାତ୍ମକ ପନ୍ଥା ଆପଣାଇଛି । ଏହି ସଂଗଠନ ସ୍ବଳ୍ପ ସମୟରେ ଗଢିଉଠିଥିବାବେଳେ ସେମାନଙ୍କ କାର୍ଯ୍ୟଧାରା ପାଇଁ ଅନୁଦାନ କିଏ ଏବଂ କେଉଁଠୁ ଯୋଗାଡ କରୁଛନ୍ତି ତାହା ଆଜି ଅନେକାଂଶରେ ପ୍ରଶ୍ନବାଚୀ ସୃଷ୍ଟି ହୋଇଛି । ଏ କଥା କହିବାର ତାତ୍ପର୍ଯ୍ୟ, ଡ୍ରାଇଭରଙ୍କ ଯେଉଁ ଦାବି ରହିଛି, ସେଗୁଡିକ ଉପରେ ଟିକେ ଧ୍ୟାନ ଦିଅନ୍ତୁ ।

ସେମାନଙ୍କ ଦାବି ହେଲା, ଜନସାଧାରଣଙ୍କ ଆକ୍ରୋସର ଶିକାର ହେଉଥିବା ଡ୍ରାଇଭର ସମାଜର ସୁରକ୍ଷା ପାଇଁ ଏକ ସ୍ବତନ୍ତ୍ର ଆଇନ ତିଆରି କରାଯାଉ । ୫୫ ବର୍ଷ ପରେ ମାସକୁ ୫ ହଜାର ଟଙ୍କା ପେନସନ ଦିଆଯାଉ । ଡ୍ରାଇଭରଙ୍କୁ ଆବାସ ଯୋଜନାରେ ଗୃହ ନିର୍ମାଣ ପାଇଁ ୫ ଲକ୍ଷ ଟଙ୍କା ପ୍ରଦାନ, ପ୍ରତ୍ୟେକ ୧୦୦ କିମି ଅନ୍ତରରେ ଗାଡ଼ି ପାର୍କିଂ ବ୍ୟବସ୍ଥା ସହ ଡ୍ରାଇଭରଙ୍କ ନିମନ୍ତେ ବିଶ୍ରାମଗାର ଏବଂ ଶୌଚାଳୟର ବ୍ୟବସ୍ଥା । ଦୁର୍ଘଟଣାରେ ପ୍ରାଣ ହରାଉଥିବା ଡ୍ରାଇଭରଙ୍କ ପାଇଁ ୨୦ ଲକ୍ଷ ଟଙ୍କାର ବୀମା ରାଶି ଏବଂ ଦୁର୍ଘଟଣାରେ ଅକର୍ମଣ୍ୟ ହେଲେ ୧୦ ଲକ୍ଷ ଟଙ୍କାର ବୀମାରାଶି ସହିତ ଦୁର୍ଘଟଣା ଜନିତ ଚିକିତ୍ସା ପାଇଁ ଡ୍ରାଇଭରଙ୍କୁ ୫ ଲକ୍ଷ ଟଙ୍କା ପର୍ଯ୍ୟନ୍ତ ଚିକିତ୍ସା ବୀମା ପ୍ରଦାନ ।

ପ୍ରଥମ କଥା ଡ୍ରାଇଭର ସମାଜ ଆସିଲା କେଉଁଠୁ ? ଡ୍ରାଇଭର କଣ ସାଧାରଣ ନାଗରିକରେ ଗଣ୍ୟ ହେଉନାହାନ୍ତି କି ? ଦ୍ବିତୀୟରେ ପ୍ରତ୍ୟେକ ୧୦୦ କିମି ଅନ୍ତରରେ ଗାଡ଼ି ପାର୍କିଂ ବ୍ୟବସ୍ଥା ସହ ଡ୍ରାଇଭରଙ୍କ ନିମନ୍ତେ ବିଶ୍ରାମଗାର ଏବଂ ଶୌଚାଳୟର ବ୍ୟବସ୍ଥା । ଏହା କେବଳ ଡ୍ରାଇଭରଙ୍କ ପାଇଁ ଅତ୍ୟନ୍ତ ଆବଶ୍ୟକ କି ? କାରଣ ଏହା ଯଦି ଅତ୍ୟନ୍ତ ଆବଶ୍ୟକ ହୋଇଥାଆନ୍ତା ତେବେ ଅନ୍ୟ ସଂଘ ଯଥାକ୍ରମେ ବସ୍ ସଂଘ, ଟ୍ରକ ସଂଘ, ଅନଲାଇନ୍ ଅଟୋ ଚାଳକ ସଂଘ, ମୋଟର ଚାଳକ ସଂଘ ପ୍ରମୁଖ ଏହାକୁ ସହଯୋଗ କରିଥାଆନ୍ତେ । ଏପରିକି ନିକଟରେ ଅନଲାଇନ ଅଟୋ ଚାଳକ ସଂଘ ମଧ୍ୟ ଡ୍ରାଇଭର ମହାସଂଘର ଅନେକ ଦାବିକୁ ଭିତ୍ତିହୀନ ବୋଲି ଗଣମାଧ୍ୟମ ଆଗରେ ପ୍ରକାଶ କରିଥିଲେ ।

ଅପରପକ୍ଷେ ମାର୍ଚ୍ଚ ୧୫ରୁ ଡ୍ରାଇଭର ମହାସଂଘ ଯେଉଁଭଳି ଆନ୍ଦୋଳନ କରୁଛି ସେଥିରେ ସ୍ପଷ୍ଟ ଯେ, ଡ୍ରାଇଭରମାନେ ହିଁ ଡ୍ରାଇଭରଙ୍କ ସହ ଶତ୍ରୁତା ଆଚରଣ କରୁଛନ୍ତି । ଏ ଦୃଶ୍ୟପଟ୍ଟ ଆମର କାଳ୍ପନିକତା ନୁହେଁ ବରଂ ବାସ୍ତବିକତା । ଯଦି ଏପରି ନ ହୋଇଥାଆନ୍ତା ତେବେ ଜଣେ ଡ୍ରାଇଭର ଅନ୍ୟ ଜଣେ ଡ୍ରାଇଭରଙ୍କୁ ଏଭଳି ଫୁଲମାଳ ପିନ୍ଧାଇ କିମ୍ବା ହାତରେ “ମୁଁ ଡ୍ରାଇଭର ସମାଜ ପାଇଁ କଳଙ୍କ” ବୋଲି ଲେଖାଇ ଫଟୋ ଉଠାଇ ତାଙ୍କର ଆତ୍ମସମ୍ମାନ ଭଙ୍ଗ କରି ନ ଥାଆନ୍ତେ । କାରଣ କିଏ ଆନ୍ଦୋଳନରେ ସାମିଲ ହେବ କିମ୍ବା ନ ହେବ ତାହା ତାଙ୍କର ବ୍ୟକ୍ତିଗତ ଅଧିକାର । ଏଥିପାଇଁ ବାଧ୍ୟବାଧକତା କାହିଁକି ?

ଆମର ଉଦ୍ଦେଶ୍ୟ ଡ୍ରାଇଭରମାନଙ୍କୁ ନିରୁତ୍ସାହିତ କରିବା ନୁହେଁ । ଯଦି ସମସ୍ୟା ରହିଛି ତେବେ ସଂଗଠନ ପକ୍ଷରୁ ଆଇନଗତ ଲଢେଇ ଆବଶ୍ୟକ । ସଂଗଠନ ମାଧ୍ୟମରେ ଅରାଜକତା କିମ୍ବା ବଳ ପ୍ରଦର୍ଶନ ନୁହେଁ । ନାର୍ଯ୍ୟ ହକ୍ ପାଇଁ ସମସ୍ତେ ଏକତ୍ରିତ ହେବା ଆବଶ୍ୟକ । ସମସ୍ତେ ସଚେତନ ହେବା ଆବଶ୍ୟକ । କୌଣସି ପ୍ରରୋଚନାରେ ପଡି ଆଗେଇ ଯିବା ବୁଦ୍ଧିମତା ନୁହେଁ ।