ବାଜିଲା ହିନ୍ଦୋଳ ଏନ୍ଏସି ନିର୍ବାଚନ ବିଗୁଲ୍ । ଆଜିଠାରୁ ଲାଗୁ ହେଲା ଆଦର୍ଶ ଆଚରଣ ବିଧି ।
ଢେଙ୍କାନାଳ (ସୁଜିତ କୁମାର ବେହେରା) : ବାଜିଲା ହିନ୍ଦୋଳ ଏନ୍ଏସି ନିର୍ବାଚନ ବିଗୁଲ୍ । ଆଜିଠାରୁ ଲାଗୁ ହେଲା ଆଦର୍ଶ ଆଚରଣ ବିଧି । ଏପ୍ରିଲ ୩ରେ ଭୋଟ୍ ଗ୍ରହଣ ଓ ୫ରେ ହେବ ଫଳାଫଳ ଘୋଷଣା । ରାଜ୍ୟ ନିର୍ବାଚନ କମିଶନ, ପତ୍ର ସଂଖ୍ୟା ୬୮୭ ରେ ଢେଙ୍କାନାଳ ଜିଲ୍ଲା ହିନ୍ଦୋଳ ଏନ୍ଏସିରେ ସାଧାରଣ ନିର୍ବାଚନ ନେଇ ବିଜ୍ଞପ୍ତି ପ୍ରକାଶ କରିଛନ୍ତି । ବିଜ୍ଞପ୍ତି ପ୍ରକାଶ ପାଇବା ପରେ ହିନ୍ଦୋଳ ଏନ୍ଏସିରେ ନିର୍ବାଚନୀ ଉଷ୍ମତା ପ୍ରକାଶ ପାଇଛି । ପ୍ରତ୍ୟେକ ରାଜନୈତିକ ଦଳ ଏନ୍ଏସିର ୧୬ଟି ୱାର୍ଡରେ ନିଜର ଦଳୀୟ ପ୍ରାର୍ଥୀ ଚୟନ ନିମନ୍ତେ ଅଙ୍କକଷା ଆରମ୍ଭ କରିଦେଲେଣି ।
ଏହା ସହ ଆଜି ଅପରାହ୍ନ ୫ ଟାରୁ ଆସନ୍ତା ଏପ୍ରିଲ ୫ ତାରିଖ ଫଳାଫଳ ଘୋଷଣା ଯାଏଁ ଆଦର୍ଶ ଆଚରଣ ବିଧି କାର୍ଯ୍ୟକାରୀ ହେବ ବୋଲି ବିଜ୍ଞପ୍ତିରେ ସ୍ପଷ୍ଟ ଭାବେ ଉଲ୍ଲେଖ କରାଯାଇଛି । ଏହି ନିୟମ ଅନୁଯାୟୀ ନିର୍ବାଚନରେ ଅଂଶଗ୍ରହଣ କରିବାକୁ ଚାହୁଁଥିବା ରାଜନୈତିକ ଦଳ ପକ୍ଷରୁ ପ୍ରାଧିକୃତ ବ୍ୟକ୍ତିଙ୍କ ନାମ ସମ୍ପୃକ୍ତ ନିର୍ବାଚନ ଅଧିକାରୀଙ୍କ ନିକଟରେ ମନୋନୟନ ପତ୍ର ଯାଞ୍ଚ ଦିବସର ଦୁଇଦିନ ପୂର୍ବରୁ ଦାଖଲ କରିବା ପାଇଁ ଉଲ୍ଲେଖ କରାଯାଇଛି । ଆଦର୍ଶ ଆଚରଣ ବିଧି ଉଲ୍ଲଂଘନ ନହେବା ପାଇଁ ନଗର ଉନ୍ନୟନ ବିଭାଗ ସମ୍ପୃକ୍ତ ରାଜନୈତିକ ଦଳର ବିଭିନ୍ନ ପଦ ପଦବୀରେ ଥିବା କାର୍ଯ୍ୟକର୍ତ୍ତାମାନେ ନିୟମ ପୂର୍ବକ ପାଳନ କରିବାକୁ ବିଜ୍ଞପ୍ତିରେ ଦର୍ଶାଇଛନ୍ତି ।
ଏହି ଆଚରଣ ବିଧି ଆଜିଠାରୁ ଏନ୍ଏସିର ସମସ୍ତ ୱାର୍ଡରେ ସୀମିତ ରହିବାକୁ କମିଶନଙ୍କ ପକ୍ଷରୁ ଚିଠିରେ ଦର୍ଶାଯାଇଛି । ନିର୍ବାଚନ କମିଶନଙ୍କ ବିଜ୍ଞପ୍ତି ପ୍ରକାଶ ପାଇବା ପରେ ଆଜି ହିନ୍ଦୋଳ ଏନ୍ଏସିର ସମସ୍ତ ୱାର୍ଡରେ ନିର୍ବାଚନୀ ବିଗୁଲ୍ ବାଜିଛି । ବଜାର ଘାଟରେ ନିର୍ବାଚନ ନେଇ ଚର୍ଚ୍ଚା ଜୋର୍ ଧରିଛି । ନିର୍ବାଚନ ପ୍ରକ୍ରିୟା ନେଇ ସ୍ଥାନୀୟ ଏନ୍ଏସି କାର୍ଯ୍ୟାଳୟରୁ ଇଚ୍ଛୁକ ପ୍ରାର୍ଥୀ ପ୍ରାର୍ଥୀନୀମାନେ ମାର୍ଚ୍ଚ ୯ରୁ ୧୫ ତାରିଖ ପର୍ଯ୍ୟନ୍ତ ନାମାଙ୍କନ ପତ୍ର ଦାଖଲ କରିପାରିବେ । ଆଗାମୀ ୧୭ରେ ନାମାଙ୍କନ ପତ୍ର ଯାଞ୍ଚ ପରେ ୧୮ ରେ ଯାଞ୍ଚରେ ଉପଯୁକ୍ତ ପ୍ରାର୍ଥୀ ପ୍ରାର୍ଥୀନୀଙ୍କ ନାମ ବିଜ୍ଞାପନ ଫଳକରେ ଉଲ୍ଲେଖ କରାଯିବ । ୨୦ ରେ ନାମାଙ୍କନ ପ୍ରତ୍ୟାହାର କରିପାରିବେ ପ୍ରାର୍ଥୀ । ଆଗାମୀ ଏପ୍ରିଲ ୩ ରେ ଭୋଟ୍ ଗ୍ରହଣ କରାଯାଇ ୫ ରେ ବିଜୟୀ ପ୍ରାର୍ଥୀଙ୍କ ନାମ ଘୋଷଣା କରାଯିବ । ୧୦ ତାରିଖରେ ଔପଚାରିକ ଭାବେ ବିଜୟୀ ଏନ୍ଏସି ଚେୟାରମ୍ୟାନ ଓ କାଉନସିଲରଙ୍କ ନାମ କାର୍ଯ୍ୟାଳୟ ନୋଟିସ୍ ବୋର୍ଡରେ ସଂଲଗ୍ନ କରାଯିବା ସହ ନିର୍ବାଚନ କମିଶନଙ୍କ ନିକଟକୁ ପଠାଇ ଦିଆଯିବା ନେଇ ବିଜ୍ଞପ୍ତିରେ ଉଲ୍ଲେଖ କରାଯାଇଛି । ସେହିଭଳି ୧୧ରେ ଏନ୍ଏସି ଉପାଧ୍ୟକ୍ଷ ନିର୍ବାଚନ ନେଇ ବିଜୟୀ କାଉନସିଲର ଓ ଚେୟାରମ୍ୟାନଙ୍କ ମଧ୍ୟରେ ବୈଠକ ଅନୁଷ୍ଠିତ ହେବ । ଏପ୍ରିଲ ୧୯ରେ ଏନ୍ଏସି କାର୍ଯ୍ୟାଳୟରେ ଉପାଧ୍ୟକ୍ଷ ପଦବୀ ନିମନ୍ତେ ଭୋଟ୍ ଦାନ କରାଯିବାକୁ କମିଶନଙ୍କ ପକ୍ଷରୁ ସ୍ଥିରୀକୃତ ହୋଇଛି । ସମ୍ପୂର୍ଣ୍ଣ ନିର୍ବାଚନ ପ୍ରକ୍ରିୟାକୁ ଉପଜିଲ୍ଲାପାଳ ନିର୍ବାଚନ ଅଧିକାରୀ ଭାବେ ଦାୟିତ୍ଵ ନିର୍ବାହ କରିବା ନେଇ କମିଶନଙ୍କ ପକ୍ଷରୁ ନିର୍ଦ୍ଦେଶ ପ୍ରକାଶ ପାଇଛି ।
