ମନବାଞ୍ଛା ପୂରଣ କରନ୍ତି ଶୀତଳା ମାଁ

କୋଟପାଡ଼ (ସୁନୀଲ ଦାଶ): କୋରାପୁଟ ଜିଲ୍ଲା କୋଟପାଡ଼ ସହରରେ ରହିଛି ମାଁ ଶୀତଳା ଠାକୁରାଣୀଙ୍କ ପୀଠ । ଆସ୍ଥା ରହିଛି ଯେଉଁ ଭକ୍ତ ଏଠି ଆସି ମାଁଙ୍କ ଦର୍ଶନ କରି ନିଜର ମନସ୍କାମନା କହେ ମାଁ ତାର ସମସ୍ତ ଦୁଃଖ ହରଣ କରନ୍ତି । ସେଥିପାଇଁ ତ ବହୁ ସଂଖ୍ୟାରେ ଭକ୍ତ କାହିଁ କେଉଁ ଦୂରଦୂରାନ୍ତରରୁ ଧାଇଁ ଆସନ୍ତି ମାଁଙ୍କ ଦର୍ଶନ ପାଇଁ । ଖାଲି ରାଜ୍ୟ ନୁହେଁ ରାଜ୍ୟ ବାହାରୁ ତଥା, ଜାମ୍ମୁ କାଶ୍ମୀର, ମହାରାଷ୍ଟ୍ର, ଆନ୍ଧ୍ରପ୍ରଦେଶ, ଛତିଶଗଡ ଏବଂ ତେଲେଙ୍ଗାନା ଭଳି ବହୁ ଦୂର ଦୁରାନ୍ତରରୁ ଭକ୍ତ ମନସ୍କାମନା ନେଇ ମାଁଙ୍କ ପୀଠରେ ଦଣ୍ଡବତ ହୁଅନ୍ତି । ଆଉ ମାଁ ତାଙ୍କର ମନବାଞ୍ଛା ପୂରଣ ମଧ୍ୟ କରନ୍ତି ।

ଏହା ଏକ ପୁରାତନ ପୀଠ ଏବଂ ରାଜା ରାଜୁଡା ସମୟରୁ ଏଠାରେ ପାରମ୍ପରିକ ଢଙ୍ଗରେ ଧୁମଧାମରେ ସହ ପ୍ରତି ତିନିବର୍ଷରେ ଥରେ ପାଳିତ ହୁଏ ମାଁଙ୍କ କଳସ ଯାତ୍ରା । ଯେଉଁଥିରେ ଲକ୍ଷାଧିକ ସଂଖ୍ୟାରେ ଭକ୍ତଗଣ ଯୋଗ ଦିଅନ୍ତି । ଯେଉଁ ଭକ୍ତଙ୍କ ମନସ୍କାମନା ପୂର୍ତ୍ତି ହୁଏ ସେମାନେ ଏଠାକୁ ଆସି ମାଁଙ୍କ ଦର୍ଶନ କରିବା ସହ କଳସ ଯାତ୍ରାରେ ଯୋଗ ଦେଇ ମାଁଙ୍କ ଆଶିଷ ପ୍ରାପ୍ତ କରିଥାଆନ୍ତି ।

ମାଁଙ୍କ ଏହି ପୀଠରେ ପ୍ରତ୍ୟେକ ସଂକ୍ରାନ୍ତିରେ ଅନ୍ନ ଭୋଗ ଲାଗି ହୋଇଥାଏ । ଏଠାକୁ ଭକ୍ତ ଆସି ପ୍ରସାଦ ସେବନ କରିବା ସହ ନିଜ ମନରେ ରହିଥବା ସ୍ବପ୍ନ ଏବଂ କାମନାର ପୂର୍ତ୍ତି ପାଇଁ ମାଁଙ୍କ ନିକଟରେ ପ୍ରାର୍ଥନା କରନ୍ତି । ଚଳିତ ମକର ସଂକ୍ରାନ୍ତିରେ ଶୀତଳା ମାଁଙ୍କ ପୀଠରେ ଭକ୍ତଙ୍କ ବେଶ୍ ସମାବେଶ ଦେଖିବାକୁ ମିଳିଥିଲା l