ପଞ୍ଚଭୂତରେ ଲୀନ ହେଲା ମୋତି ମହଲର ଶେଷ ରାଣୀଙ୍କ ପାର୍ଥିବ ଶରୀର
କୋରାପୁଟ (ସୁନୀଲ ଦାଶ): ପଞ୍ଚଭୂତରେ ଲୀନ ହେଲା ମୋତି ମହଲର ଶେଷ ରାଣୀଙ୍କ ପାର୍ଥିବ ଶରୀର । ସହରର ଚନ୍ଦନବାଡ଼ସ୍ଥିତ ରାଜ ଶ୍ମଶାନରେ ରାଜକୀୟ ପରମ୍ପରା ଅନୁଯାୟୀ ରାଜମାତା ରମାକୁମାରୀ ଦେବୀଙ୍କ ଅନ୍ତ୍ୟେଷ୍ଟି ସଂପନ୍ନ ହୋଇଛି । ରାଣୀ ରମାଦେବୀଙ୍କ ମୃତ୍ୟୁ ସହ ଏକ ଯୁଗର ଅବସାନ ହୋଇଛି ଆଉ ଜୟପୁର ରାଜ ପରିବାରର ଶେଷ ପରିଚୟ ବି ଲୁଚି ଯାଇଛି । ଜୟପୁର ରାଜ ପରିବାରେ ଶୋକର ଛାୟା ସହ ସହରରେ ମଧ୍ୟ ଶୋକର ଛାୟା ଖେଳିଯାଇଛି ।
ରମା କୁମାରୀ ହେଉଛନ୍ତି ଜୟପୁର ରାଜ ପ୍ରସାଦର ଶେଷ ରାଜା ରାମକୃଷ୍ଣ ଦେଓଙ୍କ ପତ୍ନୀ । ମହାରାଜ ରାମକୃଷ୍ଣ ଦେଓ ହେଉଛନ୍ତି ମହାରାଜ ବିକ୍ରମ ଦେବ ବର୍ମାଙ୍କ ପୌଷ୍ୟ ପୁତ୍ର । ତେବେ ରାମକୃଷ୍ଣ ଦେଓ ମାତ୍ର ଦୁଇଦିନ ପାଇଁ ଜୟପୁରର ରାଜପଦରେ ଅଭିଷିକ୍ତ ଥିଲେ । ସୋମବାର ବିଳମ୍ବିତ ରାତିରେ ଶେଷରାଣୀ ତଥା ରାଜମାତାଙ୍କର ଦେହାନ୍ତ ହୋଇଥିଲା । ସମସ୍ତ ରିତିନୀତି ଓ ରାଜକିୟ ପରମ୍ପରାରେ ପୁଅ ବ୍ରାହ୍ମଣ ରାଜମାତାଙ୍କୁ ମୁଖାଗ୍ନି ଦେଇଥିଲେ ।
ରାଣୀ ମାଙ୍କ ଶେଷକୃତ୍ୟରେ ବଡବୋହୁ ମୟଙ୍କା ଦେବୀ, ରାଜଜେମା ଲତିକା ଦେବୀ, ସାନବୋହୂ ସାରିକା ଦେବୀ ଓ ଯୁବରାଜ ବିଶେଶ୍ବର ଚନ୍ଦ୍ରଚୁଡ ଦେବ ଓ ରାଜ ପରିବାରର ସମସ୍ତ ସେବାୟତ ଉପସ୍ଥିତ ଥିଲେ । ୧୯୬୨ ମସିହାରେ ରାଣୀ ରମାକୁମାରୀ ଦେବୀ ଆନ୍ଧ୍ରପ୍ରଦେଶର ମାଡଗୁଲ ବିଧାନସଭା ଆସନରୁ ବିଧାୟିକା ଭାବେ ନିର୍ବାଚିତ ହୋଇଥିଲେ ।
