ଚିନ୍ତା ବଢାଉଛି ଚର୍ମବିଣ୍ଡି ରୋଗ
ଗଜପତି: ଜିଲ୍ଲାରେ ଆତଙ୍କ ଖେଲାଇଛି ଚର୍ମବିଣ୍ଡି ରୋଗ । ଗଜପତି ଜିଲ୍ଲାରେ ଗାଈଗୋରୁମାନେ ଏହି ଚର୍ମବିଣ୍ଡି ରୋଗର ଶିକାର ହେଉଥିବାରୁ ଗୋ ପାଳକମାନେ ଚିନ୍ତାରେ । ଏହି ରୋଗରେ ଆକ୍ରାନ୍ତ ଗାଇ ଗୋରୁଙ୍କ ଦେହରେ ପ୍ରଥମେ ଆବୁ ଭଳି ଫୋକା ଫୋକା ଦେଖାଯାଇ ପରେ ଏହା ଘା ସୃଷ୍ଟି କରୁଛି । ଫଳରେ ଗାଈଗୋରୁମାନେ ଖାଦ୍ୟ ଖାଇବା ଛାଡ଼ି ଦେବା ସହ ମୃତ୍ୟୁ ମୁଖରେ ପଡ଼ୁଛନ୍ତି । ତେବେ ଜିଲ୍ଲାରେ ବର୍ତ୍ତମାନ ସୁଦ୍ଧା ସରକାରୀ ଭାବେ ଆକ୍ରାନ୍ତ ଗାଈଗୋରୁଙ୍କ ସଂଖ୍ୟା ୮୦ କୁହାଯାଉଥିଲେ ବେଳେ ବେସରକାରୀ ଭାବେ ଏହି ସଂଖ୍ୟା ଆହୁରି ଅଧିକ ବୋଲି କହିଛନ୍ତି ଚାଷୀ ତଥା ଗୋପାଳକ ।
ପୂର୍ବରୁ ଅନ୍ୟ ରାଜ୍ୟ ସମେତ ରାଜ୍ୟର ବିଭିନ୍ନ ସ୍ଥାନରେ ଚର୍ମବିଣ୍ଡି ରୋଗ ବ୍ୟାପି ଥିବାବେଳେ ଏହା ଏବେ ଗଜପତି ଜିଲ୍ଲାରେ ବ୍ୟାପିବାରେ ଲାଗିଛି । ପାରଳାଖେମୁଣ୍ଡି ସମେତ ଜିଲ୍ଲାର ଗୋଷାଣୀ, କାଶୀନଗର, ଗୁମ୍ମା, ରାୟଗଡ ଏବଂ ନୂଆଗଡ ଆଦି ବିଭିନ୍ନ ବ୍ଲକରେ ଏହି ରୋଗ ବ୍ୟାପିବାରେ ଲାଗିଛି । ଯାହାକୁ ନେଇ ଏବେ ଚିନ୍ତାରେ ଗୋପାଳକ । ପଡୋଶୀ ଆନ୍ଧ୍ରରେ ରୋଗ ବ୍ୟାପିବା ପରେ ଗୋଚାଲାଣ ଓ ବିକ୍ରିରେ ରୋକ ଲଗାଇବା ସହ ପ୍ରାଣୀଧନ ବିଭାଗ ଭକ୍ସିନେସନ କାର୍ଯ୍ୟ ଜାରି ରଖିଛି । ଏଥିସହ ଆକ୍ରାନ୍ତ ଗାଈଗୋରୁଙ୍କୁ ସଙ୍ଗରୋଧରେ ରଖିବା ସହ ତୁରନ୍ତ ଚିକିତ୍ସା କରାଗଲେ ସେମାନେ ସୁସ୍ଥ ହୋଇପାରିବେ ବୋଲି ପରାମର୍ଶ ଦେଇଛି । ତେଣୁ ଏଥିପ୍ରତି ଆତଙ୍କିତ ନ ହୋଇ ଆବଶ୍ୟକୀୟ ପଦକ୍ଷେପ ଗ୍ରହଣ କରିବାକୁ ଜିଲ୍ଲା ପ୍ରାଣୀଧନ ବିଭାଗ ପକ୍ଷରୁ କୁହାଯାଇଛି ।
ଅନ୍ୟପକ୍ଷରେ ଚର୍ମବିଣ୍ଡି ସଂକ୍ରମଣରେ ଶିକାର ହୋଇଥିବା ଗାଇଗୋରୁ ମାଲିକମାନେ କହିଛନ୍ତି ଯେ, ପ୍ରାଣୀଧନ ବିଭାଗ ପକ୍ଷରୁ ସ୍ୱଳ୍ପ କେତେକ ଔଷଧ ମାଗଣାରେ ଦିଆଯାଇଥିବାବେଳେ ବହୁମାତ୍ରାରେ ଔଷଧ ବାହାରୁ କ୍ରୟ କରିବାକୁ ପଡୁଛି । ଫଳରେ ଗୋଚାଷୀଙ୍କୁ ହଜାର ହଜାର ଟଙ୍କା ଖର୍ଚ୍ଚ କରିବାକୁ ପଡୁଛି । ଏ ନେଇ ପ୍ରାଣୀଧନ ବିଭାଗ ପକ୍ଷରୁ ସହାୟତା ପାଇଁ ଅନୁରୋଧ କରିଛନ୍ତି ଗୋଚାଷୀ ।
ଗଜପତିରୁ ବିବେକାନନ୍ଦ ବେହେରା
