ପୋଲିସ ପଞ୍ଝାରେ କୁକ୍ଷାତ ଅପରାଧୀ ଟୁନା ହରିଜନ

କୋଟପାଡ଼: କୋଟପାଡ଼ ପୋଲିସକୁ ବଡ ସଫଳତା । ପୋଲିସ ପଞ୍ଝାରେ କୁକ୍ଷାତ ଅପରାଧୀ ଟୁନା ହରିଜନ । କୋରାପୁଟ ଜିଲ୍ଲାର ବିଭିନ୍ନ ଥାନାରେ ଅନେକ ଅପରାଧିକ ମାମଲାରେ ଜଡିତ ଥିଲା ଟୁନା ହରିଜନ । ଦୀର୍ଘଦିନ ଧରି ଟୁନାକୁ ଧରିବା ପାଇଁ ପୋଲିସ ଏକ ସ୍ୱତନ୍ତ୍ର ଟିମ୍ ଗଠନ କରି ବିଭିନ୍ନ ଅଞ୍ଚଳରେ ଖୋଜାଖୋଜି କରୁଥିଲା । ଶେଷରେ ନବରଙ୍ଗପୁର ଜିଲ୍ଲାର ମୈଦଲପୁର ଅଞ୍ଚଳରୁ ଟୁନାକୁ କାବୁ କରିବାରେ ସକ୍ଷମ ହୋଇଛି ପୋଲିସ । ଟୁନା ସହ ପୋଲିସ ତାର ୪ ଜଣ ସହଯୋଗୀଙ୍କୁ ମଧ୍ୟ ଗିରଫ କରିଛି । ସମସ୍ତଙ୍କୁ ସେଠାରୁ କୋଟପାଡ଼ ଥାନାକୁ ଅଣାଯାଇ ଅଧିକ ପଚରା ଉଚରା ଜାରି ରଖିଛି ପୋଲିସ । ଏ ନେଇ ସାମ୍ବାଦିକ ସମ୍ମିଳନୀ ଯୋଗେ ସୂଚନା ଦେଇଛନ୍ତି ବୋରିଗୁମ୍ମା ଏସଡିପିଓ ମଧୁସିକ୍ତା ମିଶ୍ର ।

ଗତ ନଭେମ୍ବର ମାସ ୨୬ରେ କୋଟପାଡ଼ ସୌରା ସାହି ଅଞ୍ଚଳର ଜଣକ ଘରେ ଚୋରି ହୋଇଥିଲା । ଏ ନେଇ ପୋଲିସ ୨୩୯/୨୨ରେ ମାମଲା ରୁଜୁ କରି ତଦନ୍ତ ଆରମ୍ଭ କରିଥିଲା । ଏହି ଚୋରିରେ ସମସ୍ତ ସଦସ୍ୟ ସାମିଲ ଥିବା ପୋଲିସ ସୂଚନା ଦେଇଛି । ସେମାନଙ୍କ ନିକଟରୁ ୫ଟି ମୋବାଇଲ, ସୁନା ଓ ରୂପ ଅଳଙ୍କାର ସମେତ ବିଭିନ୍ନ ପ୍ରକାରର ମାରଣାସ୍ତ୍ର, ଦୁଇଟି ବାଇକ ଏବଂ ନଗତ ତିନି ହଜାର ଟଙ୍କା ଜବତ କରିଛି ପୋଲିସ । ଟୁନା ସେହି ଦଳର ମାଷ୍ଟରମାଇଣ୍ଡ ଥିବାବେଳେ ସେମାନଙ୍କ ନାମରେ ଅବିଭକ୍ତ କୋରାପୁଟ, କଳାହାଣ୍ଡି ଏବଂ ଛତିଶଗଡ଼ରେ ଚୋରି ଡକାୟିତ ଭଳି ୫୦ରୁ ଉର୍ଦ୍ଧ୍ବ ଅପରାଧ ମାମଲା ରହିଛି । ଏହି ଡକାୟତି ଦଳ ରୀତିମତ ଭାବେ ଅପରାଧରେ ଜଡିତ ଥିବାବେଳେ ଗ୍ୟାଙ୍ଗର ଜଣେ ସଦସ୍ୟ ଗଞ୍ଜେଇ ଚାଲାଣ ମାମଲାରେ ଜଡିତ ଥିବା ମଧ୍ୟ ସୂଚନା ମିଳିଛି । ଏମାନଙ୍କୁ କଳାହାଣ୍ଡି ଏବଂ କୋରାପୁଟ ପୋଲିସ ଦୀର୍ଘ ଦିନ ହେବ ଧରିବା ପାଇଁ ସ୍ୱତନ୍ତ୍ର ଟିମ୍ ଗଠନ କରିଥିଲା । ତେବେ ଦୀର୍ଘଦିନ ପରେ ଏମାନଙ୍କୁ କାବୁ କରିବାରେ ପୋଲିସ ସଫଳ ହୋଇଛି ବୋଲି କହିଛନ୍ତି ବୋରିଗୁମ୍ମା ଏସଡିପିଓ ।

କୋରାପୁଟରୁ ସୁନୀଲ ଦାଶ