ଦୁର୍ନୀତିଗ୍ରସ୍ତ ଅଧିକାରୀଙ୍କୁ ଜିଲ୍ଲାପାଳ ଦଣ୍ଡ ଦେଇଥିବା ଚର୍ଚ୍ଚା
ହିନ୍ଦୋଳ: ହିନ୍ଦୋଳ ଜନଶୁଣାଣୀ ଅଭିଯୋଗ ପ୍ରକୋଷ୍ଠରେ ଜିଲ୍ଲାପାଳଙ୍କ ପ୍ରଶଂସା । ହିନ୍ଦୋଳରେ ଚର୍ଚ୍ଚିତ ଟେଣ୍ଡର ଫିକ୍ସିଂ ଘଟଣାକୁ ନେଇ ଚର୍ଚ୍ଚା ଜୋର ଧରିଥିବାବେଳେ ଜନଶୁଣାଣୀ ଅଭିଯୋଗ ପ୍ରକୋଷ୍ଠରେ କାର୍ଯ୍ୟନିର୍ବାହୀ ଅଧିକାରୀ ଏମ୍ ଶ୍ରୀନିବାସ ଷ୍ଟେଜ୍ ତଳେ ବସିବା ଘଟଣା ଏବେ ଆଉ ଏକ ଚର୍ଚ୍ଚାର ବିଷୟ ପାଲଟିଛି । ତେବେ କାର୍ଯ୍ୟନିର୍ବାହୀ ଅଧିକାରୀ ଷ୍ଟେଜ୍ ତଳେ ନିଜେ ବସିଥିଲେ ନା ତାଙ୍କ କାର୍ଯ୍ୟକଳାପ କରାଣରୁ ତାଙ୍କୁ ଜିଲ୍ଲାପାଳ ତଳେ ବସିବା ପାଇଁ କହିଥିଲେ ତାକୁ ନେଇ ଚର୍ଚ୍ଚା ସରଗରମ ରହିଛି ।
ସୂଚନା ଅନୁସାରେ ହିନ୍ଦୋଳ ବ୍ଲକ ପରିସରରେ ଥିବା ସଭାଗୃହରେ ଜିଲ୍ଲାପାଳଙ୍କ ମିଳିତ ଜନଅଭିଯୋଗ ଶୁଣାଣୀ କାର୍ଯ୍ୟକ୍ରମ ଅନୁଷ୍ଠିତ ହୋଇଥିଲା । ଢେଙ୍କାନାଳ ଜିଲ୍ଲାପାଳ ସରୋଜ କୁମାର ସେଠୀଙ୍କ ତତ୍ୱାବଧାନରେ ଅନୁଷ୍ଠିତ ମିଳିତ ଜନଅଭିଯୋଗ ଶୁଣାଣୀରେ ହିନ୍ଦୋଳ ଏନ୍ଏସି କାର୍ଯ୍ୟନିର୍ବାହୀ ଅଧିକାରୀ ଷ୍ଟେଜ ତଳେ ବସିଥିଲେ । ସବୁବେଳେ ଷ୍ଟେଜ୍ ଉପରେ ବସୁଥିବା ଲୋକକୁ ଷ୍ଟେଜ୍ ତଳେ ଦେଖି ଜନସାଧାରଣରେ ଚର୍ଚ୍ଚା ଜୋର ଧରିଥିଲା । ତେବେ ହିନ୍ଦୋଳରେ ହେଉଥିବା ଦୁର୍ନୀତି କାରଣରୁ ଜିଲ୍ଲାପାଳ ତାଙ୍କୁ ଏଭଲି ଦଣ୍ଡ ଦେଇଥାଇପାରନ୍ତି ବୋଲି ସାଧାରଣରେ କୁହାକୁହି ହେଉଥିବା ଶୁଣିବାକୁ ମିଳିଛି । ଅପରପକ୍ଷେ ଏହି ଘଟଣା ଏବେ ହିନ୍ଦୋଳର ଗଳିକନ୍ଦିରେ ଚର୍ଚ୍ଚାର ବିଷୟ ପାଲଟିଥିବାବେଳେ ଏହାକୁ ନେଇ ହିନ୍ଦୋଳବାସୀଙ୍କ ମଧ୍ୟରେ ଖୁସିର ଚମକ ଦେଖିବାକୁ ମିଳିଛି ।
ଆୟୋଜିତ ମିଳିତ ଜନଅଭିଯୋଗ ଶୁଣାଣୀ ଶିବିରରେ ହିନ୍ଦୋଳ ଉପଜିଲ୍ଲାପାଳ ଶିବାନନ୍ଦ ସ୍ବାଇଁ, ତହସିଲଦାର ସୁଶାନ୍ତ ମିଶ୍ର, ଅତିରିକ୍ତ ଗୋଷ୍ଠୀ ଉନ୍ନୟନ ଅଧିକାରୀ, ଜିଲ୍ଲା ଅତିରିକ୍ତ ଆରକ୍ଷୀ ଅଧିକ୍ଷକ, ସିଡିଏମ୍ଓ, ହିନ୍ଦୋଳ ବ୍ଲକ ଉପାଧ୍ୟକ୍ଷଙ୍କ ସମେତ ଅନ୍ୟାନ୍ୟ ବିଭାଗୀୟ ଅଧିକାରୀମାନେ ଯୋଗ ଦେଇଥିଲେ । ଜିଲ୍ଲାପାଳଙ୍କ ଅଭିଯୋଗ ଶୁଣାଣୀରେ ୪୨ଟି ଅଭିଯୋଗ ଆସିଥିବାବେଳେ ସେଥିମଧ୍ୟରୁ ୩୯ଟି ନିଜସ୍ଵ ଏବଂ ୩ଟି ସାମୁହିକ ଅଭିଯୋଗ ରହିଥିଲା । ଏଥିରେ ରେଡ଼କ୍ରସ ତରଫରୁ ୧୩ ହଜାର ଟଙ୍କାର ସହାୟତା ରାଶି ଯୋଗ୍ୟ ହିତାଧିକାରୀଙ୍କୁ ପ୍ରଦାନ କରାଯାଇଥିଲା । ମିଳିତ ଜନଅଭିଯୋଗ ଶୁଣାଣୀ ଶାନ୍ତି ପୂର୍ଣ୍ଣ ଭାବେ ସମ୍ପନ୍ନ ହୋଇଥିବାବେଳେ ହିନ୍ଦୋଳବାସୀ ଜିଲ୍ଲାପାଳ, ଉପଜିଲ୍ଲାପାଳ, ତହସିଲଦାର ଓ ଆରକ୍ଷୀ ଅଧିକାରୀଙ୍କୁ ଏ ନେଇ ଧନ୍ୟବାଦ ଜ୍ଞାପନ କରିଛନ୍ତି ।
ଢେଙ୍କାନାଳରୁ ସୁଜିତ କୁମାର ବେହେରାଙ୍କ ସହ ଗୋପବନ୍ଧୁ ବାରିକ
