ନାତି ହେଲା ବଇରୀ, ଟଙ୍କା ପାଇଁ ରଚିଲା ହତ୍ୟା ଯୋଜନା
କଟକ: ଗୃହ ଭେଦୀ ବିଭିଷଣ । ଯାହାକୁ ଭାବିଥିଲେ ନିଜର ସେ ହିଁ ରଚିଲା ମୃତ୍ୟୁର ତାଣ୍ଡବ । ସାମନ୍ୟ ସୁନା ଏବଂ ପଇସା ଲୋଭରେ ସମ୍ପର୍କୀୟ ନାତି ଭୁଲିଗଲା ସ୍ନେହ ପ୍ରେମର ବନ୍ଧନ । ଯିଏ ପାଳି ପୋଷି ବଡ଼ କରିଥିଲେ ଶେଷରେ ତାଙ୍କୁ ହିଁ ଚୋଟ ମାରିଲା । ସମ୍ପର୍କର ମାନେ ବୁଝିଲାନି ସମ୍ପର୍କୀୟ ନାତି । ସମ୍ପତ୍ତି ଲୋଭରେ ଅନ୍ଧ ହୋଇ ସମ୍ପର୍କୀୟ ଜେଜେବାପା, ଜେଜେମା’ଙ୍କୁ ରାସ୍ତାରୁ ସଫା କରିବାକୁ କଲା ଯୋଜନା କଲ। । ଖାଲି ସେତିକି ନୁହେଁ । ହତ୍ୟା ପରେ କେମିତି ପୋଲିସ କବଳରୁ ବଞ୍ଚିବ ସେ ନେଇ ମଧ୍ୟ ରଚନା କରିଥିଲା କାହାଣୀ । ହେଲେ କାହାଣୀକୁ ସଠିକ ଢଙ୍ଗରେ ଦୃଶ୍ୟପଟ୍ଟରେ ପରିଣତ କରିପାରିଲାନି ସମ୍ପର୍କୀୟ ନାତି । ଆଉ ଶେଷରେ ସବୁ କଥା ପୋଲିସ ଆଗରେ ମାନି ଯାଇଛି ହତ୍ୟାକାରୀ ନାତି ।
କଟକ ଜିଲ୍ଲା ନେମାଳ ଥାନା ଅନ୍ତର୍ଗତ ଲେଣ୍ଡୁରା ଭଗବାନପୁର ଗ୍ରାମରେ ଗତକାଲି ଘଟିଥିବା ହୃଦୟବିଦାରକ ଘଟଣା ଏବେ ନୂଆ ରୂପ ନେଇଛି । ଅଣ୍ଟି ଛୁରୀ ତଣ୍ଟି କାଟିଥିବା ଏବେ ସ୍ପଷ୍ଟ ହୋଇଛି । ଅପରପକ୍ଷେ ଘଟଣାର ମୁଖ୍ୟ ଅଭିଯୁକ୍ତ ସମ୍ପର୍କୀୟ ନାତିକୁ ପୋଲିସ ଅଟକ ରଖିଛି ।
ସୂଚନା ଅନୁସାରେ, ଗତ ଗୁରୁବାର ବିଳମ୍ବିତ ରାତିରେ ନିଜ ଘରେ ଥିବା ବେଳେ ଆକ୍ରମଣର ଶିକାର ହୋଇ ଗୁରୁତର ହୋଇ ପଡ଼ିଥିଲେ ହୃଷିକେଶ ମୁଦୁଲି । ଅତ୍ୟଧିକ ରକ୍ତସ୍ରାବ ହେତୁ ନିଜ ଘରେ ହିଁ ତାଙ୍କର ପ୍ରାଣବାୟୁ ଉଡ଼ି ଯାଇଥିଲା । ତେବେ ତାଙ୍କ ପତ୍ନୀ କନକଲତା ଏବେ ଗୁରୁତର ଅବସ୍ଥାରେ କଟକ ବଡ଼ ମେଡିକାଲରେ ଚିକିତ୍ସିତ ହେଉଛନ୍ତି । ଟଙ୍କା, ସୁନା ଲୁଟ୍ ଉଦ୍ଦେଶ୍ୟରେ ଘରେ ୪ ଦୁର୍ବୃତ୍ତ ପଶି ଏପରି କାଣ୍ଡ ଭିଆଇଥିବା ପ୍ରଥମେ ତାଙ୍କ ସମ୍ପର୍କୀୟ ନାତି ଓଁକାର ସମସ୍ତଙ୍କୁ କହିଥିଲା ।
ପୋଲିସର ଘନ ଘନ ଜେରା ପରେ କିନ୍ତୁ ସବୁ ସତ ଉଗାଳିଛି ଓଁକାର । କେବଳ ଟଙ୍କା, ସୁନା ପାଇଁ ଏହି ବୀଭତ୍ସ ହତ୍ୟାକାଣ୍ଡ ଘଟାଇଥିବା ସ୍ୱୀକାର କରିଛି । ଏପରିକି ନିଜେ ଏକୁଟିଆ ହିଁ ଏହି ସମସ୍ତ କାମ କରି ସେଥିରୁ ବର୍ତ୍ତିବା ପାଇଁ ଯୋଜନା ପ୍ରସ୍ତୁତ କରିଥିବା କଥା ମଧ୍ୟ କହିଛି । ହେଲେ ପୋଲିସର ଅଡ଼ୁଆ ପ୍ରଶ୍ନ ଆଗରେ ହାର ମାନିଗଲା ଓଁକାରର ଚାଲାକି, ଆଉ ହତ୍ୟା ପଛର ସବୁ ସତ୍ୟ ଉଗାଳି ଦେଇଛି ।
ଓଁକାରର ବୟାନ ମୁତାବକ, ପ୍ରଥମେ ୪ ଜଣ ଦୁର୍ବୃତ୍ତ ଘରେ ପଶି ସବୁ ସୁନା, ଟଙ୍କା ଲୁଟି ଜେଜେଙ୍କୁ ଓ ଜେଜେମା’ଙ୍କୁ ଆକ୍ରମଣ କରିଥିବା ଘଟଣା ସେ ପୋଲିସ ଆଗରେ କହିଥିଲା । କେବଳ ସେତିକି ନୁହେଁ, ଭୟଭୀତ ହୋଇଯାଇଥିବାରୁ ପଡ଼ୋଶୀଙ୍କୁ ବି ବିଳମ୍ବରେ ଡାକିଥିବା କହିଥିଲା । ତେବେ ଗାଁ ଭିତରେ ଦୁର୍ବୃତ୍ତ ପଶି ମରଣାସ୍ତ୍ରରେ ଆକ୍ରମଣ କରି ପଳାଇଯାଇଥିବା ଘଟଣାରେ ଗାଁ ଲୋକେ ଟେର ନ ପାଇବା ତଥା ପାଖରେ ଜଣେ ବୃଦ୍ଧା ଛଟପଟ ହେଉଥିବା ବେଳେ ପ୍ରାୟ ଘଣ୍ଟାଏ ପରେ ସାହାଯ୍ୟ ମାଗିବାକୁ ଘଟଣାକୁ ନେଇ ପୋଲିସର ସନ୍ଦେହ ବଢ଼ିଥିଲ ।
ଏହାପରେ ପୋଲିସ ଘଟଣାର ତନାଘନା କରି ଓଁକାରଙ୍କୁ ପଚରାଉଚରା କରି ସବୁ ସତ ବାହାର କରିଛି । ଆଜି ଅପରାହ୍ନରେ ଏ ନେଇ ଏକ ସାମ୍ବାଦିକ ସମ୍ମିଳନୀରେ ପୋଲିସ ସବୁ କିଛି ତଥ୍ୟ ରଖିବ ବୋଲି ଜଣାପଡିଛି ।
ସାଲେପୁରରୁ ଅଭୟ ଜେନା
