ଚିହ୍ନା ଲୋକ ଭାବି ରାତି ଅଧରେ କବାଟ ଖୋଲିଲେ, ଆଉ ଆକ୍ରମଣରେ ଚାଲିଗଲେ…
କଟକ: କଟକ ଜିଲ୍ଲା ନେମାଳ ଥାନା ଅନ୍ତର୍ଗତ ଲେଣ୍ଡୁରା ଭଗବାନପୁର ଗ୍ରାମରେ ଘଟିଛି ଅଭାବନୀୟ ଘଟଣା । ବିଳମ୍ବିତ ରାତିରେ ଜଣଙ୍କ ଘରେ ପଶି ଡକାୟତି କରିବା ସହ ବୃଦ୍ଧ ଦମ୍ପତ୍ତିଙ୍କୁ ମରଣାନ୍ତକ ଆକ୍ରମଣ କରିଛନ୍ତି ଦୁର୍ବୃତ୍ତ । ଦୁର୍ବୃତ୍ତଙ୍କ ମାରଣାସ୍ତ୍ର ଚୋଟରେ ଘଟଣାସ୍ଥଳରେ ବୃଦ୍ଧଙ୍କ ମୃତ୍ୟୁ ହୋଇଥିବା ବେଳେ ବୃଦ୍ଧାଜଣକ ମୃତ୍ୟୁ ସହ ସଂଗ୍ରାମ କରୁଛନ୍ତି । ତାଙ୍କୁ କଟକ ବଡ଼ ମେଡିକାଲରେ ଭର୍ତ୍ତି କରାଯାଇଛି । ମୃତ ବୃଦ୍ଧ ଜଣକ ହେଲେ ହୃଷିକେଶ ମୁଦୁଲି । ଦୁର୍ବୃତ୍ତଙ୍କ ଆକ୍ରମଣରେ ତାଙ୍କ ପତ୍ନୀ କନକଲତା ଗୁରୁତର ହୋଇପଡ଼ିଛନ୍ତି । ଅପରପକ୍ଷେ ବୃଦ୍ଧ ଦମ୍ପତ୍ତିଙ୍କ ନାତି ମଧ୍ୟ ଦୁର୍ବୃତ୍ତଙ୍କ ଆକ୍ରମଣରେ ଆହତ ହୋଇଥିବା ଜଣାପଡିଛି ।
ସୂଚନା ଅନୁସାରେ ବିଳମ୍ବିତ ରାତିରେ ହୃଷିକେଶ ତାଙ୍କ ପତ୍ନୀ ଏବଂ ନାତି ଓଁକାର ଘରେ ଶୋଇଥିଲେ । ଏହି ସମୟରେ କେହି ଜଣେ ହୃଷିକେଶଙ୍କ ନାମ ଧରି ତାଙ୍କ କବାଡ ବାଡେଇଥିଲେ । ଚିହ୍ନା ଲୋକ ଭାବି ସେ କବାଟ ଖୋଲିବାରୁ ତାଙ୍କୁ ଦୁର୍ବୃତ୍ତ ମରଣାସ୍ତ୍ରରେ ଆକ୍ରମଣ କରିବା ସହ ଘରୁ ଅନେକ ଗୁରୁତ୍ବପୂର୍ଣ୍ଣ ସାମଗ୍ରୀ ଲୁଟପାଟ୍ କରି ନେଇଥିବା ଜଣାପଡିଛି । ତେବେ ଦୁର୍ବୃତ୍ତମାନେ ହୃଷିକେଶଙ୍କୁ ଆକ୍ରମଣ କରୁଥିବା ଦେଖି ତାଙ୍କ ପତ୍ନୀ ଏହାକୁ ବିରୋଧ କରିବାରୁ ଦୁର୍ବୃତ୍ତମାନେ ତାଙ୍କୁ ମଧ୍ୟ ଆକ୍ରମଣ କରିଥିଲେ । ଫଳରେ ସେ ମଧ୍ୟ ଗୁରୁତର ଆହତ ହୋଇ ଏବେ ମୃତ୍ୟୁ ସହ ସଂଗ୍ରାମ କରୁଛନ୍ତି । ଅପରପକ୍ଷେ ଦୁର୍ବୃତ୍ତଙ୍କ ଆକ୍ରମଣରେ ବୃଦ୍ଧ ଦମ୍ପତିଙ୍କ ନାତି ଓଁକାର ସାମାନ୍ୟ ଆହତ ହେବା ସହ ଭୟଭୀତ ହୋଇପଡ଼ିଥିଲେ । ତେଣୁ ସେ ଚିତ୍କାର କରି ନ ପାରି ଘରେ ଚୁପଚାପ ରହିଥିଲେ ।
ଖବର ପ୍ରଚାରିତ ହେବା ପରେ ହୃଷିକେଶଙ୍କ ଘର ଆଗରେ ଗାଁ ଲୋକଙ୍କ ଗହଳି ଜମିଥିଲା । ତୁରନ୍ତ କନକଲତାଙ୍କୁ କଟକ ବଡ ମେଡିକାଲ ପଠାଯାଇଥିବା ବେଳେ ତାଙ୍କ ସହ ଓଁକାରଙ୍କୁ ବି ଚିକିତ୍ସା ପାଇଁ ପଠାଯାଇଛି । ଖବର ପାଇ ନେମାଳ ପୋଲିସ ସାଇଣ୍ଟିଫିକ ଟିମ୍ ସହ ଘଟଣା ସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଛି ।
ସାଲେପୁରରୁ ଅଭୟ ଜେନା
