କାଗଜ କଲମରେ ଲୁଟିନେଲେ ୧୪ ଲକ୍ଷ ଟଙ୍କା …

ରାଜ୍ୟରେ ଚାଲିଛି ଅନ୍ଧ ସରକାର ଶାସନ । ଜନତାଙ୍କୁ ଅଟ୍ଟହାସ୍ୟ କରୁଛି ଯୋଜନା । ତଳଠୁ ଉପର ସମସ୍ତ ଅଫିସର ଦୁର୍ନିତୀରେ ଲିପ୍ତ । ଗୋଟିଏ ସରକାର ଦୀର୍ଘ ସମୟ ଧରି ଶାସନ କରିବା ପରେ ଜନତାଙ୍କୁ ଲୁଟୁଛନ୍ତି ସରକାରୀ ଅଧିକାରୀ । ଏ କଥା ଆମେ କହୁନାହୁଁ । ଜନତାଙ୍କ ଆକ୍ରୋଶ ହିଁ ବୟାନ କରୁଛି ଜନତା ସରକାରୀ କଳ ପ୍ରତି କେତେ ଅସନ୍ତୁଷ୍ଟ ଅଛନ୍ତି ।
କହିବା କଥା ହେଲା ସରକାର ଶ୍ରମିକଙ୍କୁ ନିଜ ରାଜ୍ୟରେ ରୋଜଗାର ଦେବା ଲାଗି ମନରେଗା ଭଳି ଯୋଜନା ପ୍ରସ୍ତୁତ କରିଛନ୍ତି । ଏବଂ ଏଥିଲାଗି କୋଟି କୋଟି ଟଙ୍କାର ବ୍ୟୟ ଅଟକଳ ମଧ୍ୟ ପ୍ରସ୍ତୁତ କରୁଛନ୍ତି । ହେଲେ ଏହାର ପ୍ରକୃତ ଚିତ୍ର କେତେ ଭୟଙ୍କର ତାହା ଆମେ ଆପଣଙ୍କୁ ଦେଖାଇବୁ । କୌଣସି ପ୍ରକଳ୍ପ ପାଇଁ ଶିଳାନ୍ୟାସ କରିବା ଯେତିକି ଗୁରୁତ୍ବପୂର୍ଣ୍ଣ, କାମ ହେଲା କି ନାହିଁ ତାହାର ତଦାରଖ କରିବା ମଧ୍ୟ ଗୁରୁତ୍ବପୂର୍ଣ୍ଣ ହେବା ଆବଶ୍ୟକ । କାରଣ ଆମେ ଆଜି ଆପଣଙ୍କୁ ଦୁର୍ନିତୀର ଖୋଲିଚିଠା ଦେଖାଇବୁ ।
ଏ ହେଉଛି କୋରାପୁଟ ଜିଲ୍ଲା ବୈପାରୀଗୁଡା ବ୍ଲକର ଗୁପ୍ତେଶ୍ୱର ପଞ୍ଚାୟତ । ଏହି ପଞ୍ଚାୟତରେ ହୋଇଥିବା ଦୁର୍ନିତୀ ଖବର ସମସ୍ତଙ୍କ ଅକଲ ଗୁଡୁମ କରିଦେବ । କାରଣ ପଞ୍ଚାୟତର ଉନ୍ନତି ପାଇଁ ୨୦୨୦/୨୧ ଏବଂ ୨୦୨୧/୨୨ ମସିହାରେ ୪ ଟି ମନରେଗା ଯୋଜନାରେ ପ୍ରସ୍ତୁତ କାମ ପାଇଁ ହୋଇଥିବା ବ୍ୟୟ ଅଟକଳର କାଣିଚାଏ କାମ ନ ହୋଇ ୧୪ ଲକ୍ଷ ୧୮ ହଜାର ୪୭୭ ଟଙ୍କା ଆତ୍ମସାତ୍ ଘଟଣା ସମସ୍ତଙ୍କୁ ଚକିତ କରିଛି ।
ସୂଚନା ଅନୁସାରେ, ଗୁପ୍ତେଶ୍ୱରପୀଠ ମଡେଲ ଟ୍ୟାଙ୍କ ପାଇଁ ଅଟକଳ ମୂଲ୍ୟ ୯ ଲକ୍ଷ ଟଙ୍କା ହୋଇଥିବାବେଳେ କାମ ନହୋଇ ବିଲ୍ ହୋଇଛି ୬ ଲକ୍ଷ ୨୭ ହଜାର ୮୩୧ ଟଙ୍କା । ସେହିପରି ଗୋୟଳକୁଣ୍ଡ ଗ୍ରାମରେ ଖେଳପଡିଆ ନିର୍ମାଣ ପାଇଁ ୮ ଲକ୍ଷ ଟଙ୍କାର ବ୍ୟୟ ଅଟକଳ ପ୍ରସ୍ତୁତ ହୋଇଥିବାବେଳେ ବିନା ଖେଳ ପଡିଆରେ ବିଲ୍ ହୋଇଛି ୩ ଲକ୍ଷ ୪୧ ହଜାର ୮୯୦ ଟଙ୍କା । ଅପରପକ୍ଷେ ମଜାରଗୁଡା ଗ୍ରାମରେ ଖେଳ ପଡିଆ ଅଟକଳ ମୂଲ୍ୟ ୫ ଲକ୍ଷ ଟଙ୍କା ହୋଇଥିବାବେଳେ କାମ ନ ହୋଇ ଖର୍ଚ୍ଚ ହୋଇଛି ୨ ଲକ୍ଷ ୧୮ ହଜାର ୭୬୪ ଟଙ୍କା ଏବଂ ମୁର୍ଜାଚୁଆଁ ଗ୍ରାମରେ ପୋଖରୀ ଅଟକଳ ୯ ଲକ୍ଷ ଟଙ୍କା ହୋଇଥିବାବେଳେ କାମ ନ ହୋଇ ବିଲ୍ ହୋଇଛି ୨ଲକ୍ଷ ୨୯ ହଜାର ୯୯୨ ଟଙ୍କା ।
ବିନା କାମରେ ବିଲ୍ ସବୁ କିଏ ପାସ୍ କଲା ତାକୁ ନେଇ ଅଭିଯୋଗ କରିଛନ୍ତି ପଞ୍ଚାୟତବାସୀ । ଏପରିକି ପଞ୍ଚାୟତବାସୀ ଏକ ଲିଖିତ ଅଭିଯୋଗ କୋରାପୁଟ ଜିଲ୍ଲାପାଳ ଏବଂ ଭିଜିଲାନ୍ସକୁ ଦେବା ପରେ ଏବେ ଚାଲିଛି ତନାଘନା । ଆମ ପ୍ରତିନିଧି ଏ ନେଇ ଗ୍ରାଉଣ୍ଡ ଜିରୋରୁ ଖବର ସଂଗ୍ରହ କରୁ କରୁ ଖୋଲିଛି ଏହି ଦୁର୍ନୀତିର ଗୁମର ।
ପାହାଡ଼ ଜଙ୍ଗଲ ଘେରା ଗୁପ୍ତେଶ୍ୱର ପଞ୍ଚାୟତର ସରଳ ନିରୀହ ଆଦିବାସୀ ବସ୍ତିରେ ହୋଇଛି ଏହି କେଳେଙ୍କାରୀ । ସହକାରୀ ଯନ୍ତ୍ରୀ, ପଞ୍ଚାୟତ ଅଫିସର, ଗ୍ରାମ୍ୟ ରୋଜଗାର ସେବକ ଏବଂ ଠିକାଦାରଙ୍କ ମଧୁଚନ୍ଦ୍ରିକାରେ ହୋଇଛି ଏହି ଚଞ୍ଚକତା । ଗୁପ୍ତେଶ୍ୱର ମଡେଲ ଟ୍ୟାଙ୍କର ଫଳକ ଯୁଦ୍ଧକାଳୀନ ଭିତ୍ତିରେ ରାତି ଅଧିଆ ହୋଇଛି । ବାଘରାଗନିଗୁଡା ଗ୍ରାମରେ ଦୁଇବର୍ଷ ତଳୁ କାମ ହୋଇ ବିଲ୍ ହୋଇଥିବା ପୁରୁଣା ପୋଖରୀ ହିଡ଼ରେ ଫୋଟ ଉଠାଇ ଗ୍ରାମର ନାମ ଏବଂ କାର୍ୟ୍ୟର କୋଡ଼ ନମ୍ବରକୁ ମଧ୍ୟ ଲିଭା ଯାଇଥିବା ଦୃଶ୍ୟ ସାମ୍ନାକୁ ଆସିଛି ।
ସେହିପରି ଗୋୟଳକୁଣ୍ଡ ଗ୍ରାମର ସ୍କୁଲ ନିକଟରେ କୌଣସି ଖେଳପଡିଆ ନଥିବା ବେଳେ ଚଞ୍ଚକତାରେ ହୋଇଛି ଦୁଇ ଦୁଇ ଥର ଫଲସ୍ ବିଲ୍ । ଅପରପକ୍ଷେ ମଜାରଗୁଡା ଅଞ୍ଚଳରେ ମଧ୍ୟ କୌଣସି ଖେଳ ପଡିଆ ରହିଥବାର ସୂଚନା ଗ୍ରାମବାସୀଙ୍କ ପାଖରେ ନାହିଁ କିନ୍ତୁ ଖେଳପଡିଆ ନାଁରେ ଉଠିଛି ୨ ଲକ୍ଷରୁ ଉର୍ଦ୍ଧ୍ବ ଟଙ୍କା । ଏବଂ ମୁର୍ଜାଚୁଆଁ ଗ୍ରାମରେ ପୋଖରୀ ନାହିଁ କିନ୍ତୁ ଗୋଟିଏ ପ୍ରାକୃତିକ ଖାଲ ପାଖରେ ନିର୍ମାଣ ହୋଇଛି ଅଟକଳ ମୂଲ୍ୟ ଲେଖା ଯାଇଥିବା ଫଳକ ।
ରାଜ୍ୟ ସରକାର ଦୁର୍ନୀତି ମୁକ୍ତ ଓଡିଶା ଏବଂ ମୋ ସରକାରର ବାହାସ୍ପଟ ମାରୁଥିବା ବେଳେ ଏଭଳି ଦୁର୍ନୀତି ହେଉଛି କିପରି ? ପ୍ରଶାସନର ବିନା ତଦାରଖରେ ଫଲସ୍ ବିଲ୍ ପାସ୍ ହେଉଛି କେମିତି ? ଏଭଳି ଅନେକ ପ୍ରଶ୍ନ ସହ ପ୍ରଶାସନର କାର୍ୟ୍ୟପନ୍ଥା ଉପରେ ଏକ ବଡ଼ ପ୍ରଶ୍ନବାଚୀ ସୃଷ୍ଟି କରୁଛନ୍ତି ସାଧାରଣ ଜନାତ ।

ଏଣେ ଗୁପ୍ତେଶ୍ୱର ପଞ୍ଚାୟତ ବାସୀ ଏହି ଦୁର୍ନୀତିରେ ସଂଶ୍ଲିଷ୍ଟ ପ୍ରଶାସନିକ ଅଧିକାରୀଙ୍କ ବିରୁଦ୍ଧରେ କଡା କାର୍ୟ୍ୟନୁଷ୍ଠାନ ପାଇଁ ରାଜ୍ୟ ସରକାରଙ୍କ ନିକଟରେ ଗୁହାରି କରିଛନ୍ତି । ତେବେ ଦେଖିବାକୁ ବାକି ରହିଲା ଭିଜିଲାନ୍ସ ଟିମ୍ ଏବଂ ରାଜ୍ୟ ସରକାର ତଦନ୍ତ ଦୁର୍ନୀତି ଗ୍ରସ୍ତ ବାବୁମାନଙ୍କ ପର୍ଦ୍ଦାଫାଶ୍ କରୁଛି ନାଁ ମୋଟା ମୋଟା ଫାଇଲ ତଳେ ଏହି ଘଟଣା ଦାବି ହୋଇ ରହିଯାଉଛି ।

କୋଟପାଡ଼ରୁ ସୁନୀଲ ଦାଶ