ବିଜେଡି କହୁଛି ଆମେ ବିକାଶ କରୁଛୁ, ହେଲେ ଗ୍ରାମବାସୀଙ୍କ ସ୍ବର ହୀନସ୍ତା ହେଉଛୁ !

ବିକାଶର ଚିତ୍ରକୁ ନେଇ ପ୍ରଚାର ପ୍ରସାର କରୁଛି ବିଜେଡି । ରାଜ୍ୟକୁ ଗରିବମୁକ୍ତ କରିବା ପାଇଁ ଅଭିଯାନ ମଧ୍ୟ ଚଳାଇଛି । ଏହା ସହ ନିକଟରେ ଜନସମ୍ପର୍କ ପଦଯାତ୍ରା କରି ଲୋକଙ୍କ ନିକଟତର ହୋଇଛନ୍ତି ବିଜେଡି ନେତା ଓ କର୍ମୀ । ହେଲେ ଏ ଚିତ୍ର ଦେଖିବା ପରେ ଲାଗୁନି ଯେ ଜନତାଙ୍କ ସେବାରେ କାର୍ଯ୍ୟ କରୁଛନ୍ତି ଦଳୀୟ ନେତା ଓ କର୍ମୀ । ଜନସମ୍ପର୍କ କେବଳ ଲୋକଦେଖାଣିଆ ଭଳି ମନେ ହେଉଛି । କାରଣ ବିକାଶ ତ ଦୂରର କଥା ଏ ଅଞ୍ଚଳର ଦୃଶ୍ୟ ଦାରିଦ୍ର୍ୟଠାରୁ ମଧ୍ୟ ହୀନ ।

ଏହାବାଦ୍ ହାସ୍ୟସ୍ପଦ କଥା ହେଉଛି ଏ ଅଞ୍ଚଳ ଢେଙ୍କାନାଳ ଜିଲ୍ଲା ହିନ୍ଦୋଳ ଏନ୍ଏସି ଅନ୍ତର୍ଗତ ଅଞ୍ଚଳ ଅଟେ । ଆଉ ଗୁରୁତ୍ବପୂର୍ଣ୍ଣ କଥା ହେଲା ହିନ୍ଦୋଳ ଏନ୍ଏସି ହେବା ଦିନଠାରୁ ସେଠିକାର ଚେୟାରମ୍ୟାନ୍ ପଦ ବିଜେଡି ହାତକୁ ଯାଉଛି । ତେବେ ଏଠି ଆମର ପ୍ରଶ୍ନ ବିଜେଡି, ଉକ୍ତ ଅଞ୍ଚଳର ବିକାଶ ପାଇଁ କରିଛି କଣ । ନା ଲୋକଙ୍କୁ କେବଳ ଉପର ଦେଖାଣିଆ ଆଶ୍ବସନା ଦେଇ ଭୋଟ ହାତେଇବାରେ ବ୍ୟସ୍ତ ରହିଛନ୍ତି ଦଳୀୟ କର୍ମୀ ।

ଗାଁର ନାମ ଖରମୁଳ । ଏହା ହିନ୍ଦୋଳ ଏନ୍ଏସି ଅନ୍ତର୍ଗତ ୧୬ ନମ୍ବର ୱାର୍ଡ଼ । ବିଶେଷ କରି ଏଠିକାର ବାସିନ୍ଦା କନ୍ଧ ସମ୍ପ୍ରଦାୟର ଅଟନ୍ତି । ଉକ୍ତ ଅଞ୍ଚଳରେ ଅନେକ ଲୋକ ଦିନ ମଜୁରିଆ ଭାବେ ଅବା ଦାଦନ ଭାବେ ଖଟି ପରିବାର ପ୍ରତିପୋଷଣ କରନ୍ତି । ଚର୍ତୁପାର୍ଶ୍ଵ ବଣ ଜଙ୍ଗଲରେ ଘେରା । ଉକ୍ତ ଅଞ୍ଚଳ ହାତୀ ପ୍ରବଣ ଅଞ୍ଚଳ ହୋଇଥିବାରୁ ଦିନରେ ମଧ୍ୟ ଏହି ଗାଁକୁ ଯିବା କାଠିକାର ପାଠ । ତେବେ ଏତେ ସବୁ ବାଧାବିଘ୍ନ ସତ୍ତ୍ବେ ଆମ ପ୍ରତିନିଧି ସୁଜିତ୍ କୁମାର ଗ୍ରାଉଣ୍ଡ ଜିରୋରୁ ତଥ୍ୟ ସଂଗ୍ରହ ପାଇଁ ସେହି ଗାଁକୁ ଯାଇଥିଲେ । ଆଉ ଗାଁକୁ ଯାଇ ଲୋକଙ୍କଠାରୁ ତଥ୍ୟ ସଂଗ୍ରହ କରିବା ପରେ ଜଣାପଡିଲା ଯେ, ଏହି ଅଞ୍ଚଳବାସୀ ଆଜି ବି ତାଙ୍କର ମୌଳିକ ସୁବିଧାରୁ ବଞ୍ଚିତ ।

ଗାଁକୁ ଗମନାଗମନ ସୁବିଧା ନଥିବାବେଳେ ସରକାରୀ ଭତ୍ତା କିମ୍ବା ରାସନ ଚାଉଳ ପାଇଁ ଲୋକଙ୍କୁ ଯିବାକୁ ପଡେ ୧୦ କିଲୋମିଟର ରାସ୍ତା । ଘୋଡା ଛଅ ଟଙ୍କାକୁ ଦାନା ନଅ ଟଙ୍କା ଭଳି, ଯିବା ଆସିବାରେ ଭତ୍ତା ଟଙ୍କାର ପ୍ରାୟ ଅର୍ଦ୍ଧେକ ଭାଗ ସରିଯାଏ । ଅପରପକ୍ଷେ ଏହି ଅଞ୍ଚଳ ହାତୀ ଉପଦ୍ରବ ଅଞ୍ଚଳ ହୋଇଥିବାବେଳେ ରାଜ୍ୟ ସରକାରଙ୍କ ବନ ବିଭାଗର କର୍ମଚାରୀ ମଣିଷ ଜୀବନର ସୁରକ୍ଷା ପାଇଁ ସେମିତି କିଛି ଆଖି ଦୃଶିଆ ପଦକ୍ଷେପ ନେଇ ନଥିବା କହିଛନ୍ତି ଗ୍ରାମବାସୀ । ଫଳରେ କାଳେ ରାସ୍ତାରେ ହାତୀ ପଡିଯିବା ଆଶଙ୍କା ନେଇ ଉକ୍ତ ରାସ୍ତା ଦେଇ ଦିନରେ ବି ଯିବାକୁ ଭୟ କରନ୍ତି ଗ୍ରାମବାସୀ । ଆଉ ବର୍ଷା ଦିନ କଥା ନ କହିବା ଭଲ । ଟାପୁ ଭିତରେ ଜୀବନ ଅତିବାହିତ କଲା ଭଳି ଜୀବନ ବିତାନ୍ତି ଗ୍ରାମବାସୀ । ଯଦି କେହି ଗ୍ରାମବାସୀ ଅସୁସ୍ଥ ହୁଏ ତେବେ କଥା ସରିଲା । ତେବେ ଗ୍ରାମବାସୀଙ୍କ ସହ କଥାବର୍ତ୍ତା ପରେ ଶୁଣିବାକୁ ମିଳୁଛି ଯେ, ଖରମୁଳ ଗାଁରୁ ମୁଖ୍ୟ ରାସ୍ତାକୁ ସଂଯୋଗ କରିବା ଲାଗି ଏକ ରାସ୍ତା ନିର୍ମାଣ ନିମନ୍ତେ ଟେଣ୍ଡର ହୋଇଥିଲା । ତେବେ ଏହି ରାସ୍ତା କାମ ନେଇଥିବା ଠିକାଦାର ରାସ୍ତାର ଏକ ଚତୁର୍ଥାଂଶ କାମ ସାରି ଟଙ୍କା ନେଇଥିବା ଅଭିଯୋଗ କରିଛନ୍ତି ଗ୍ରାମବାସୀ । ତେବେ ଦେଖିବାକୁ ବାକି ରହିଲା ଖରମୁଳ ଗ୍ରାମ ସମ୍ପର୍କରେ ଖବର ପ୍ରସାରଣ ପରେ ସରକାରଙ୍କ ପକ୍ଷରୁ ଏ ନେଇ କି ପଦକ୍ଷେପ ଗ୍ରହଣ ହେଉଛି ।

ହିନ୍ଦୋଳରୁ ସୁଜିତ କୁମାର ବେହେରା