ପାଳିତ ହେଉଛି ବିଶ୍ୱ ଜଳାତଙ୍କ ଦିବସ । ରୋଗର ଭୟାବହତା ଉପରେ ସଚେତନ କରାଉଛନ୍ତି ଡାକ୍ତର

ଗଜପତି ଜିଲ୍ଲା ସଦର ମହକୁମା ପାରଳାଖେମୁଣ୍ଡି ସ୍ଥିତ ଜିଲ୍ଲା ପ୍ରାଣୀ ମୁଖ୍ୟ ଚିକିତ୍ସାଳୟରେ ବିଶ୍ୱ ଜଳାତଙ୍କ ଦିବସ ଉପଲକ୍ଷେ ଏକ ସଚେତନତା ଓ ପ୍ରତିଷେଧକ ଟିକା କାର୍ଯ୍ୟକ୍ରମ ଅନୁଷ୍ଠିତ ହୋଇଯାଇଛି । କାର୍ଯ୍ୟକ୍ରମକୁ ଜିଲ୍ଲା ମୁଖ୍ୟ ପ୍ରାଣୀ ଚିକିତ୍ସା ଅଧିକାରୀ ଡକ୍ଟର ଗିରିଶ କୁମାର ମାହାନ୍ତି ଆନୁଷ୍ଠାନିକ ଭାବେ ଉଦଘାଟନ କରିଥିଲେ । ଏହି ଅବସରରେ ସ୍ଥାନୀୟ ପ୍ରାଣୀପ୍ରେମୀମାନଙ୍କୁ ଜଳାତଙ୍କ ରୋଗ ସମ୍ପର୍କରେ ସଚେତନତା କରିବା ସଙ୍ଗେ ସଙ୍ଗେ ସେମାନଙ୍କର ପାଳିତ କୁକୁରମାନଙ୍କୁ ଜଳାତଙ୍କ ପ୍ରତିଷେଧକ ଟୀକା ଦିଆଯାଇଥିଲା । ଜଳାତଙ୍କ ପ୍ରତିଷେଧକ ଟିକାର ଉଦ୍ଭାବକ ତଥା ପ୍ରସିଦ୍ଧ ଫ୍ରାନ୍ସ ବୈଜ୍ଞାନିକ ଲୁଈ ପାଶ୍ଚଚରଙ୍କ ଜନ୍ମ ଦିବସ ସେପ୍ଟେମ୍ବର 28 ତାରିଖକୁ ପ୍ରତିବର୍ଷ ବିଶ୍ୱ ଜଳାତଙ୍କ ଦିବସ ରୂପେ ପାଳନ କରାଯାଉଛି ।

ଏହି ଅବସରରେ ଜଳାତଙ୍କ ରୋଗର ଭୟାବୟତା ବିଷୟରେ ଲୋକଙ୍କୁ ସଚେତନତା କରାଯିବା ସହ ନିଜ ପରିବେଶକୁ ସୁରକ୍ଷିତ ରଖିବା ଏବଂ ମାନବ ସମାଜ ଜଳାତଙ୍କ ରୋଗରୁ ମୁକ୍ତ ହେବା ଏହି ଦିବସର ଆହ୍ୱାନ । କାର୍ଯ୍ୟକ୍ରମରେ ଉପଖଣ୍ଡ ପ୍ରାଣୀ ଚିକିତ୍ସା ଅଧିକାରୀ ଡକ୍ଟର ରମାକାନ୍ତ ରାଣା, ଉପ ନିର୍ଦ୍ଦେଶକ ଡକ୍ଟର ବିଦ୍ୟୁତ ଶେଖର ମିଶ୍ର, ପ୍ରାଣୀ ଚିକିତ୍ସା ଅଧିକାରୀ ଡକ୍ଟର ଅଭିଜିତ ମିଶ୍ର, ମୃତ୍ୟୁଞ୍ଜୟ ଦାସ, ସେକ୍ସସନ ଅଫିସର, ଭେଟନେରୀ ଟେକ୍ନିସିୟାନ ପ୍ରମୁଖ ଉପସ୍ଥିତ ଥିଲେ ।

ଗଜପତିରୁ  ବିବେକାନନ୍ଦ ବେହେରା