ମା’ଙ୍କ ଆଗମନ ପୂର୍ବରୁ ଧରାପୃଷ୍ଠକୁ ସଜାଉଛି ଧୋବ ଫରଫର କାଶତଣ୍ଡୀ ସମ୍ଭାର
ଗଜପତି: ଆସୁଛି ପାର୍ବଣ, ହସୁଛି କାଶତଣ୍ଡୀ । ଶରତର ଆଗମନରେ କାଶତଣ୍ଡୀର ସମ୍ଭାର ଦେଖିବାକୁ ମିଳେ । ରାସ୍ତାକଡ଼ଠାରୁ ଆରମ୍ଭ କରି ଚାଷ ଜମି, ନଇପଠା ଯାଏଁ ସବୁଠି ସୁଲୁସୁଲିଆ ପବନରେ ଦୋଦଲ୍ୟମାନ ହେଉଥାଏ କାଶତଣ୍ଡୀ ରାଣୀ । ଗଜପତି ଜିଲ୍ଲାର ବିଭିନ୍ନ ସ୍ଥାନରେ ଦେଖିବାକୁ ମିଳିଲାଣି କାଶତଣ୍ଡୀର ସମ୍ଭାର । ମଳୟ ପବନରେ ପାର୍ବଣ ଋତୁର ବାସ୍ନା ବାରି ହୋଇ ଗଲାଣି । ମାଆଙ୍କ ଆଗମନରେ ଧୋବ ଫରଫର ଚାଦରରେ ଧରଣୀ ମା’ର ଶୋଭା ମଣ୍ଡନ କରିଛି କାଶତଣ୍ଡୀ ଫୁଲ । କାଶତଣ୍ଡୀ ଫୁଲର ଚାମର ସଂସ୍ପର୍ଶରେ ମାଆ ଦୁର୍ଗା, ଧରା ପୃଷ୍ଠକୁ ଅବତରଣ କରିବେ । ଧାନ ବିଲରେ ଧରଣୀ ରାଣୀ ସବୁଜ ବନାନୀ ଓ କାଶତଣ୍ଡୀ ଫୁଲ ମାଆଙ୍କ ଆଗମନକୁ ଚାହିଁ ରହିଥାଏ । ସତେ ଯେମିତି ମର୍ତ୍ତ୍ୟ ଧାମକୁ ମାଆଙ୍କ ଆଗମନ କରିବା ପାଇଁ ପ୍ରକୃତି ରାଣୀ ସବୁଜ ବନାନୀ ଓ କାଶତଣ୍ଡୀ ଫୁଲରେ ସଜେଇ ହୋଇଛି । ରାସ୍ତାରେ ଯାଉଥିବା ପଥିକଟି ରାସ୍ତାର ଉଭୟ ପାର୍ଶ୍ୱରେ ରହିଥିବା କାଶତଣ୍ଡୀର ଅପୂର୍ବ ସୌନ୍ଦର୍ଯ୍ୟକୁ ଉପଭୋଗ କରିଥାଏ । ପବନ ଲହରୀରେ ଦୋହଲି ଦୋହଲି ଖିଲି ଖିଲି ହସୁଥାଏ କାଶତଣ୍ଡୀ ସମ୍ଭାର । ସକାଳ ଓ ସନ୍ଧ୍ୟାର ସୂର୍ଯ୍ୟ କିରଣର ଆଲୋକରେ କାଶତଣ୍ଡୀର ଅପରୂପ ସୌନ୍ଦର୍ଯ୍ୟକୁ ଦ୍ୱିଗୁଣିତ କରିଥାଏ । କବି ହେଉ ଅବା ଲେଖକ କାଶତଣ୍ଡୀର ଅପରୂପ ସୌନ୍ଦର୍ଯ୍ୟକୁ ଦେଖି ଉତଫୁଲିତ ହୋଇଯାଆନ୍ତି । ଆଉ କାଶତଣ୍ଡୀର ଏଭଳି ସମ୍ଭାରକୁ ଦେଖି ଆପେ ଆପେ ତାଙ୍କ କଲମରୁ ଝରିପଡେ ଅନେକ କବିତା ସମ୍ଭାର ।
ଗଜପତିରୁ ବିବେକାନନ୍ଦ ବେହେରା
