ନୂଆ ରୂପରେ ଫିଲ୍ଡରେ କମାଲ ଦେଖାଇବ ଭାରତୀୟ ଦଳ
ନୂଆ ଜୋସ୍ ସହ ନୂଆ ଆଶା ଏବଂ ନୂଆ ଲୁକ୍ ନେଇ ଫିଲ୍ଡକୁ ଅବତୀର୍ଣ୍ଣ କରିବ ଟିମ୍ ଇଣ୍ଡିଆ । ଗ୍ୟାଲେରୀରେ ପରିଚିତ ମ୍ୟାନ୍ ଇନ୍ ବ୍ଲୁ ଏବେ ନୂଆ ରଙ୍ଗରେ ଦର୍ଶକଙ୍କୁ ରଙ୍ଗେଇବେ । ବିସିସିଆଇ ପକ୍ଷରୁ ଏହି ନୂଆ ଜର୍ସିର ଆଉଟଲୁକ୍ ଟ୍ବିଟ୍ କରାଯାଇଛି । ଆଗାମୀ ଟି୨୦ ବିଶ୍ୱକପ୍ ପାଇଁ ଭାରତୀୟ ଦଳ ନୂଆ ଜର୍ସି ପିନ୍ଧିବ ।
2007 ମସିହା ଟି20 ୱାର୍ଲ୍ଡ କପ୍ ଜର୍ସି ଭଳି ଏହାର ରଙ୍ଗ ଲାଇଟ୍ ସେଡ୍ ବ୍ଲୁ ରହିଛି । ଏଥିରେ ଥିବା ତ୍ରିଭୁଜାକାର ଆକୃତିର ଅର୍ଥ ହେଉଛି ପ୍ରଶଂସକଙ୍କ ଶକ୍ତି, ସାମର୍ଥ୍ୟ ଏବଂ ଉତ୍ସାହ । ସେହିପରି ନୂଆ ଜର୍ସିରେ ଥିବା ପେଟାଲ୍ସ ବିସିସିଆଇର ଲୋଗୋରୁ ପ୍ରେରଣା ପାଇଥିବାବେଳେ ଏହା ଦଲର ଯୋଗ୍ୟତା ଏବଂ ନିଷ୍ଠାପରତାକୁ ବୁଝାଉଛି । ଅପରପକ୍ଷେ ଜର୍ସିରେ ଥିବା 3ଟି ଷ୍ଟାର ଭାରତୀୟ ଦଳର 3ଟି ୱାର୍ଲ୍ଡ କପ୍ ବିଜୟ ଉଲ୍ଲାସକୁ ଅଙ୍କିତ କରିଛି ।
ବିସିସିଆଇ ପକ୍ଷରୁ ପୋଷ୍ଟ ହୋଇଥିବା ଫଟୋରେ କ୍ୟାପଟେନ୍ ରୋହିତ ଶର୍ମାଙ୍କ ସହ ହାର୍ଦ୍ଦିକ ପାଣ୍ଡ୍ୟା, ସୂର୍ଯ୍ୟକୁମାର ଯାଦବଙ୍କ ସହ ମହିଳା କ୍ରିକେଟ୍ ଟିମ୍ ଅଧିନାୟକ ହରମନପ୍ରିତ କୋର୍, ରେଣୁକା ସିଂହ, ଶେଫାଳୀ ବର୍ମା ନଜର ଆସିଛନ୍ତି ।
ସେପ୍ଟେମ୍ବର ୨୦ ତାରିଖରୁ ମୋହାଲିରେ ଅଷ୍ଟ୍ରେଲିଆ ବିପକ୍ଷରେ ଅନୁଷ୍ଠିତ ହେବାକୁ ଥିବା ଟି୨୦ ସିରିଜ୍ ସମୟରେ ଟିମ୍ ଇଣ୍ଡିଆ ନୂଆ ଜର୍ସିରେ ଫିଲ୍ଡକୁ ଓହ୍ଲାଇବ । ଏସିଆ କପ୍ରେ ନୈରାଶ୍ୟଜନକ ପ୍ରଦର୍ଶନ ପରେ ଟିମ୍ ଇଣ୍ଡିଆ ପାଇଁ ଏହି ସିରିଜ୍ ବେଶ ଗୁରୁତ୍ୱବହନ କରୁଛି ।
