ଏମକେସିଜି ମେଡିକାଲରେ ବିରଳ ଅସ୍ତ୍ରୋପଚାର, ଯୁବକଙ୍କ ପେଟରୁ ବାହାରିଲା ଷ୍ଟିଲ୍ ଗ୍ଲାସ୍
ମଦ୍ୟପଙ୍କ ଉନ୍ମତ୍ତ କାଣ୍ଡ । ବନ୍ଧୁଗଣ ମିଶି ମଦ୍ୟପାନ କଲେ । ଆଉ ନିଶାଶକ୍ତ ଅବସ୍ଥାରେ ଅନ୍ୟ ଜଣେ ମଦ୍ୟପ ବନ୍ଧୁଙ୍କ ମଳଦ୍ୱାରରେ ଏକ ଷ୍ଟିଲ ଗ୍ଲାସ ପୁରେଇ ଦେଲେ । ପ୍ରାୟ ୮ ଦିନ ଧରି ଗ୍ଲାସ୍ ମଳଦ୍ୱାରରେ ରହିବା ପରେ ଧୀରେ ଧୀରେ ପେଟକୁ ପଳାଇଥିଲା । ଅସହ୍ୟ ଯନ୍ତ୍ରଣାରେ ଛଟପଟ ହେବାରୁ ଡାକ୍ତରଙ୍କ ପାଖକୁ ଯାଇ ଅପରେସନ ହେଇଛନ୍ତି ଜଣେ ୪୫ବର୍ଷୀୟ ଯୁବକ । ବ୍ରହ୍ମପୁର ଏମ୍କେସିଜିରେ ସଂପୃକ୍ତ ଯୁବକଙ୍କ ଅସ୍ତ୍ରୋପଚାର କରାଯାଇ ଷ୍ଟିଲ୍ ଗ୍ଲାସ୍ ପେଟରୁ ବାହାର କରାଯାଇଛି । ବର୍ତ୍ତମାନ ସେ ସୁସ୍ଥ ଥିବା ବେଳେ ତାଙ୍କର ଚିକିତ୍ସା ଜାରି ରହିଛି ।
ବ୍ୟକ୍ତି ଜଣକ ଗୁଜୁରାଟର ସୁରଟକୁ ଯାଇ ସେଠାରେ ସୂତା କଳରେ କାମ କରୁଥିଲେ । ପ୍ରାୟ 10 ଦିନ ପୂର୍ବରୁ, ସେ ନିଜ ସାଙ୍ଗମାନଙ୍କ ସହିତ ମଦ୍ୟପାନ କରୁଥିବାବେଳେ ସେମାନେ ନିଶାସକ୍ତ ଅବସ୍ଥାରେ ତାଙ୍କ ମଳଦ୍ୱାରରେ ଷ୍ଟିଲ୍ ଗ୍ଲାସ୍ ଭର୍ତ୍ତି କରିଦେଇଥିଲେ । ଯନ୍ତ୍ରଣା ଅସହ୍ୟ ହେବାରୁ ସେ ସୁରଟ ଛାଡି ନିଜ ଗାଁକୁ ଫେରି ଆସିଥିଲେ । ପରେ ପେଟ ଓ ଗୋଡ଼ ଫୁଲିବାରେ ଲାଗିଥିଲା ।
ପୀଡ଼ା ଅସହ୍ୟ ହେବା ପରେ ସେ ଏମକେସିଜି ଡାକ୍ତର ଟିମ ସହ ପରାମର୍ଶ କରିବା ସହ ଘଟଣା ସଂପର୍କରେ କହିଥିଲେ । ଏକ୍ସରେ ପରେ ଏମକେସିଜିର ଡାକ୍ତରୀ ଟିମ୍ ଗତ ୧୯ ତାରିଖରେ ତାଙ୍କ ଅସ୍ତ୍ରୋପଚାର କରିଥିଲେ। ଡାକ୍ତରୀ ଟିମ୍ ପ୍ରଥମେ ମଳଦ୍ୱାର ଦେଇ ଗ୍ଲାସକୁ ବାହାର କରିବାକୁ ଚେଷ୍ଟା କରିଥିଲେ । ମାତ୍ର ବିଫଳ ହେବା ପରେ ପେଟ ଅପରେସନ କରି ତାହାକୁ ବାହାର କରିଥିଲେ । ଅପରେସନ ପରେ ବ୍ୟକ୍ତି ଜଣଙ୍କର ସ୍ୱାସ୍ଥ୍ୟବସ୍ଥା ସ୍ଥିର ଥିବା ଜଣାପଡିଛି ।
ବ୍ରହ୍ମପୁରରୁ ନିକୁଞ୍ଜ ବିହାରୀ ପଟ୍ଟନାୟକ
